Соғлом оила барпо этишда тиббий-генетик кўрикнинг аҳамияти
Жамиятимизнинг асосий бўғини — оила. Оилаларнинг барқарорлиги, тинч ва хотиржамлиги келажагимиз бунёдкорлари бўлган ёшларнинг ҳам жисмонан, ҳам руҳан соғлом вояга етишига бевосита таъсир қилувчи муҳим омилдир. Ақлий ва жисмоний етук, баркамол авлодни тарбиялаш, энг аввало, соғлом оиладан бошланади.
Шу боис, турмуш остонасида турган йигит-қизларимиз айрим касалликларнинг ирсий хусусиятга эга эканлиги ҳақида етарли тушунчага эга бўлишлари зарур. Умумий ўрта таълим мактабларининг 9-синф биология дарсликларида ҳам ирсий касалликлар ва уларнинг келиб чиқиш хавфи ҳақида батафсил маълумотлар берилиб, ёшлар турмуш қуришда бунга алоҳида эътибор қаратиши лозимлиги уқдирилган.
Оила қураётган ёшларни тиббий-генетик кўрикдан ўтказиш ва уларга мутахассис маслаҳатини бериш ўта муҳим масаладир. Чунки айрим ирсий касалликлар рецессив (яширин) шаклда кечади. Агар турмуш қураётган йигит ва қизнинг ҳар иккисида ҳам ушбу касалликни ташувчи рецессив генлар мавжуд бўлса, дунёга келажак фарзандда мазкур ирсий хасталикнинг юзага чиқиш эҳтимоли кескин ортади. Бу хавфни фақатгина ўз вақтида тиббий кўрикдан ўтиш ва мутахассислардан генетик маслаҳат олиш орқали аниқлаш мумкин.
Ҳар қандай оилага, албатта, соғлом фарзандлар зарур. Афсуски, баъзида ёшларимиз турмуш қуриш арафасида бундай эҳтимолий хавфларга етарлича эътибор қаратишмайди. Оқибатда носоғлом фарзандлар туғилиши, оиладаги тинчлик ва тотувликнинг бузилиши, ҳаттоки ажримлар каби кўнгилсиз ҳолатлар юзага келмоқда. Шундай экан, бўлажак келин-куёвлар тиббий кўриклардан ўтишга ва мутахассис тавсияларига бефарқ бўлмасликлари лозим.
Мамлакатимизда бу каби салбий ҳолатларнинг олдини олиш мақсадида тиббий-генетик маслаҳат марказлари фаолияти йўлга қўйилган бўлиб, никоҳланувчи шахсларни мажбурий тиббий кўрикдан ўтказиш тизими яратилган. Ушбу марказларда оила қуришга қарор қилган ёшларга бўлажак фарзандларининг саломатлиги борасида зарур тушунтириш ва тавсиялар бериб борилади. Биз соғлом оила барпо этишга масъулият билан ёндашиб, давлатимиз томонидан яратилган бундай имкониятлардан ўз вақтида ва тўғри фойдаланишни билишимиз шарт.
Нодира ЭНДИРБОЕВА, Амударё тумани ММТБга қарашли 65-умумтаълим мактабининг олий тоифали биология фани ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
