ФАН ОЙЛИГИ ТАДБИРЛАРИ ЎҚИТУВЧИЛАР МЕҲНАТИ САМАРАСИНИ НАМОЙИШ ЭТДИ

Умумий ўрта таълим мактабларида ўқув йили давомидаги ҳар бир ой ҳар хил фанлар ойлиги деб белгиланиб, шу муносабат билан ўқитувчи ва ўқувчилар ҳамкорлигида турли тадбирлар ташкил этилмоқда. Фан ойликлари асосан ўқитувчиларнинг ижодий фаолликларини ошириш, истеъдодли, ижодкор ўқитувчиларни аниқлаш, уларнинг тажрибаларини ўрганиш, оммалаштириш, таълим сифатини ошириш ва таълим жараёнида қўлланилаётган услубларни такомиллаштириш мақсадида ўтказиб келинмоқда.

Декабрь ойи бошланғич таълим фанлари ойлиги бўлганлиги муносабати билан 26- сонли умумий ўрта таълим мактаби бошланғич синфларида ҳам турли тадбирлар, очиқ дарслар, муҳим саналарга бағишланган маънавий-маърифий кечалар ташкил этилди.

Мактабда 2 та 1-синфлар мавжуд. Аввало бошланғич синфлар услуб бирлашма йиғилиши ўтказилиб, ойлик доирасида ўқитувчиларга вазифалар тақсимланди.
Шунга мувофиқ бошланғич таълим фанлари ўқитувчилари янги педагогик технологиялардан фойдаланган ҳолда, ноанъанавий услубда очиқ дарслар ўтишди.
Очиқ дарсларда мактаб ўқитувчилари ва ота-оналар вакиллари ҳам иштирок этиб, таълим жараёни билан танишдилар.

Бошланғич синфлар ўқитувчилари Азамат Шомуродов, Роза Гулмонова, Насиба Шукурлаева, Матлуба Бекберганова, Наргиза Авазмуратова, Санжар Холимбетовлар ҳамкорликда 8 декабрь – Конституциямиз қабул қилинган кунга бағишлаб “Қомусимиз - бахтимиз” 10 декабрь Ўзбекистон Республикаси мадҳияси қабул қилинган кунга бағишлаб  “Мадҳиямиз жараёнгла, ҳар он” деб номланган кечалар ўтказилди. Тадбир давомида ўқувчилар Конституциямиз ва мадҳиямиз ҳақида шеърлар ижро этди, маълумотлар айтиб, билимдонликларини намойиш қилдилар.

Фан ойлиги доирасидаги доирасидаги тадбирлар 1-синфлар ўқувчиларининг она тилимиз алифбосидаги ҳарфларни ўзлаштириб олганликлари муносабати билан ўтказилган “Билимлар пойдеворисан, Алифбе” деб номланган саводхонлик байрамига  уланиб кетди. 2019 йилнинг 26 декабрида бўлиб ўтган ушбу тадбирда 1-синфлар ўқувчилари ҳарфлар тимсолида саҳнага чиқиб, уларга таъриф бериб, шеърлар айтдилар. Она тилимиздаги ҳарфларни ёзиш, ўқишни ўргатгани учун алифбе китобига, биринчи устозларига самимий миннатдорчилигини билдирдилар, келгусида ўқиш, она тили ва  бошқада фанларни яхши ўзлаштиришга ҳаракат қилишларини изҳор этдилар.

Ҳар қандай касб эгаси ҳам илк билим олишни алифбедан бошлайди. Буюк олимларга ҳам илм чўққилари сари интилишида бошланғич таълим фанлари илк зинапоя вазифасини ўтаган. Ўз-ўзидан кўриниб турибдики, бошланғич таълим фанларини ўқитишнинг ўзига хос масъулияти юқори.

Фан ойлиги доирасида ўтказилган тадбирлардаги ўқувчиларнинг фаоллиги, тортинмай ўз билимларини намойиш эта олишлари, ҳозиржавобликлари мазкур мактаб бошланғич таълим фанлари ўқитувчилари бу борада ўз вазифаларини яхши уддалай олаётганликларини кўрсатди.

О.Ражабова.