МАСТЛИК ОИЛАГА МОДДИЙ ЗАРАР ЕТКАЗДИ
Мастлик – ихтиёрий телбалик, дейдилар. Агар шундай бўлмаганида Нурилла Эшимов (исм-фамилиялар ўзгартирилди) ғафлат босиб, маст ҳолатида автомобиль бошқарармиди? Боши айланиб, кўз олдида нарсалар бир-бирига қоришиб кетаётганини билса-да, “тоза ҳавога чиқсам, ўтиб кетади, ўзимга келиб қоламан”, - деган ўй билан ишончнома билан ўзи бошқариб юрган “Спарк” русумли автомашинага ўтирди-ю, кўзлаган манзили томон елдай учди. Аммо...
Бошини ғовлатиб турган спиртли ичимлик ўз ишини қилди. Мастлик туфайли бошқарувни йўқотган Нуриллабой шундоқ йўл чеккасида турган фуқаро Мурод Аметовга (исм-шарифи ўзгартирилди) тегишли “Нексия” русумли авомобилнинг орқа томонидан бориб урилди. Натижада нафақат бошқа бир бегуноҳ фуқарога, балки ўз оиласига ҳам моддий ва маънавий зарар етказди.
Ҳуқуқбузар Нурилла Эшимов бу ҳатти-ҳаракатлари билан Ўзбекистон Республикаси Маъмурий жавобгарлик тўғрисидаги Кодекснинг тегишли моддалари билан маъмурий жавобгарликка тортилиб, маъмурий ишлар бўйича туман суди томонидан жазоланди. Унга кўра, ҳуқуқбузар Нурилла Эшимов 1 йил 6 ой муддатга транспорт воситасини бошқариш ҳуқуқидан маҳрум этилиб, Маъмурий жавобгарлик тўғрисидаги Кодекснинг тегишли моддалари бўйича унга нисбатан катта миқдорда жарима жазоси тайинланди.
Шуни айтадилар-да, “маст бўлдинг, паст бўлдинг”, деб. Энг ёмони, у энди мастлик оқибатида йўл қўйган хатоси туфайли ўз оиласи ризқидан узиб, катта миқдорда жарима тўлашга мажбур.
Мунаввар КАРИМБОЕВА,
Маъмурий ишлар бўйича туман суди раиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
