“E-IJRO AUKSION” электрон аукционларида иштирок этиш тартиби тушунтирилди

Якка тартибда уй-жой қуриш учун олинадиган ер участкалари эндиликда “E-IJRO AUKSION” электрон аукционларида савдога қўйилмоқда. Навбатдаги лавҳамиз мазкур янги тартибни аҳоли ўртасида тушунтириш мақсадида ўтказилган йиғилиш хусусида.

Ўзбекистон Республи каси Вазирлар Маҳкамасининг 2019 йил 28 январь кунги “Ер участкалари бериш ва якка тартибдаги уй-жой қуриш учун ер участкаларига мерос қилиб қолдириладиган умрбод эгалик қилиш ҳуқуқини реализация қилишнинг замонавий ва шаффоф механизмларини жорий этиш бўйича қўшимча чора-тадбирлар тўғрисида”ги қарорига мувофиқ якка тартибда уй-жой қуриш учун олинадиган ер участкалари эндиликда “E-IJRO AUKSION” электрон аукционларида савдога қўйилмоқда.

9-сонли Болалар мусиқа ва санъат мактабида туман аҳолисига мазкур қарорда кўрсатилган талаблар ва “E-IJRO AUKSION” электрон аукционларида иштирок этиш тартиби бўйича батафсил тушунча бериш мақсадида йиғилиш ўтказилди. Йиғилишда туман ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари Жасур Норимов, Қорақалпоғистон Республикаси “Ермулккадастр” давлат корхонаси туман филиали бошлиғи Шокир Давлетов, туман Адлия бўлими бошлиғи Мўминжон Матюсупов ҳамда тегишли корхона-ташкилотлар масъуллари, фуқаролар йиғинлари раислари иштирок этдилар.

Йиғилишда Вазирлар Маҳкамасининг юқоридаги қарори ҳақида батафсил тушунчалар берилди. Масъуллар томонидан якка тартибда уй-жой қуриш учун ер участкалари мерос қилиб қолдириладиган умрбод эгалик қилиш ҳуқуқини реализация қилиш бундан кейин “E-IJRO AUKSION” ягона савдо майдончасида электрон аукционлар ўтказиш йўли билан амалга оширилиши, унинг тартиби батафсил тушунтирилди. Мерос қилиб қолдириладиган умрбод эгалик қилиш ҳуқуқи электрон онлайн-аукционларда ер участкалари реализация қилиниши мазкур қарорда белгилаб қўйилгани, ер участкалари фақат шаҳарсозлик ҳужжатлари, яъни аҳоли пунктининг бош режаси ва тегишли қисмининг батафсил режаси лойиҳаси билан таъминланган ҳудудларда аукционга қўйилиши айтилди.

Шунингдек, якка тартибда уй-жой қуриш учун 4 сотихгача бўлган ва ушбу ҳажм доирасидаги ер участкалари ҳалок бўлган ҳарбий хизматчилар оилаларига, давлат ва хусусий уй-жой фондидаги ўзлари эгаллаб турган уй-жойни туман ёки шаҳар ҳокимликларига ўтказаётган фуқаролар ва мулкдорларга аукционсиз берилиши тушунтириб ўтилди.

Туман Адлия бўлими бошлиғи Мўминжон Матюсупов фуқароларга бу борада батафсил ҳуқуқий тушунчалар бериб ўтди. Шунингдек, “E-IJRO AUKSION” ягона электрон савдо майдончаси – электрон онлайн-аукционларни ташкил этиш ва ўтказиш учун зарур ахборот киритиш, сақлаш ва қайта ишлаш, манфаатдор шахсларнинг электрон онлайн-аукционлар жараёнларидан бевосита фойдаланиш имконини таъминлайдиган ахборот тизими сифатида ташкил этилганини таъкидлади.

Ундан ташқари, аукционлар ўтказилиши ҳақидаги хабарномалар 30 кун олдин “Электрон онлайн-аукционларни ташкил этиш маркази”нинг веб-порталида жойлаштирилиши, аукционда иштирок этишга буюртманомалар хабарнома жойлаштирилган кундан автоматик тарзда бошланишини, бу тизимнинг шаффоф экани қайд этиб ўтилди.

Йиғилиш давомида  иштирокчиларни қизиқтирган саволларга батафсил жавоблар ҳам берилди.

Шу ўринда айтиш керакки, айни кунларда ҳам “E-IJRO AUKSION” ягона савдо майдончасида Амударё туманининг Назархон, Амир Темур номли овуллари ҳамда Қум ёп, Тош қалъа ва бошқа маҳаллаларидан якка тартибда уй-жойлар ҳамда аҳолига маиший хизмат кўрсатиш иморатлари қуриш учун ер майдонлари электрон аукционларга қўйилган бўлиб, хоҳловчилар унда иштирок этишлари мумкин.