“Биз ОИТСга қаршимиз”

Бугунги кунда сайёрамизда қирқ миллиондан ортиқ инсон орттирилган иммунитет танқислиги касаллигига чалинган. Шу боисдан ҳам касалликнинг тарқалиб кетишининг олдини олиш учун бутун дунё миқёсида ҳамкорликда кураш олиб борилмоқда.

Касаллик белгилари дарҳол намоён бўлмаслиги, одам 10-12 йилгача ОИВ вируси юқтирганини сезмай вирус ташиб юриши мумкинлиги унга қарши курашнинг ҳам ниҳоятда мураккаблигидан далолат беради.

Ушбу машъум касалликка чалинганлар орасида турли сабабларга кўра яшаш жойларини ўзгартирган, ўқиш, ишлаш мақсадида чет элларга чиқиб, узоқ муддатлар ўз оиласидан айро яшаганлар кўпчиликни ташкил этади.

Жаҳон соғликни сақлаш ташкилоти маълумотларига кўра, ушбу касалликнинг  тарқалишининг асосий сабаби – зино, ахлоқсизликдир. Шу боисдан ҳам ўсиб келаётган ёш авлод қалбида халқимизнинг  асрлар оша авлоддан авлодга мерос бўлиб келаётган одоб, озодалик, садоқат каби инсоний фазилатларни, соғлом турмуш тарзи афзалликларини чуқур сингдириш муҳим вазифа ҳисобланади.

1 декбарь – Бутунжаҳон ОИТСга қарши кураш куни - бутун дунёда ОИТСнинг ҳалокатли оқибатларидан омманинг хабардорлигини ошириш, соғлом турмуш тарғиботи куни сифатида нишонланади.

Сана муносабати билан туманимизда ҳам касаллик ҳақида аҳолини хабардор қилиш, аянчли оқибатларини тарғиб қилиш мақсадида кўпгина тадбирлар ўтказилди.

28-сонли мактабнинг биология фани ўқитувчиси Тўлғоной Кенжабоева юқори синф ўқувчилари иштирокида ўтказган “Биз ОИТСга қаршимиз” мавзусидаги тадбири ҳам шу мақсадга қаратилди.

Тадбир аввалида юқори синфлар ўқувчилари орасида шу мавзуда иншолар, расмлар танлови эълон қилинди. Тақдим этилган ижодий ишлар мактаб маъмурияти билан бамаслаҳат одилона баҳоланди ва тадбирда  ғолиб ўқувчилар эълон қилиниб, тақдирланди.

Тадбирда 1 декабрь санаси ҳар йили юртимизда ва бутун дунёда соғлом турмуш тарзи тарғиботи сифатида нишонланиши ва касалликка қарши кураш борасида амалга оширилаётган ишлар хусусида маъруза ўқилди. Шундан сўнг ўқувчилар ҳақиқий инсоний фазилатлар, юртга фидойилик тараннум этилган шеърлар ижро этдилар.

2 та 10 синфлар ўқувчилари ота-онасининг қаршилигига  қарамай ўзга юртларга ишлаш учун кетиб, номақбул кимсаларга қўшилиб қолган йигитнинг аянчли қисматини саҳна кўриниши орқали ифодалаб бердилар.
Тадбир барча ўқувчиларда чуқур таассуротлар қолдирди, соғлом турмуш афзалликларини кўнгилларига муҳрлади.

Ойгул РАЖАБОВА.