БЕРУНИЙ НОМЛИ МАҲАЛЛА ФУҚАРОЛАР ЙИҒИНИ БИНОСИДА "БИЗ КОРРУПЦИЯГА ҚАРШИМИЗ!" НОМЛИ ГРАНТ ЛОЙИҲАСИ ДОИРАСИДА УЧРАШУВ ЎТКАЗИЛДИ

Мамлакатимизда сўнгги йилларда коррупцияга қарши курашиш масаласи тобора долзарб аҳамиятга эга бўлиб бормоқда. Оммавий ахборот воситаларида деярли ҳар куни коррупция билан боғлиқ жиноятлар ёритилиб борилиши, бу мазкур йўналишда барча соҳалар бўйича жиддий ва самарали иш олиб борилаётгани, жамиятимизда коррупцияга нисбатан ҳуқуқий иммунитетнинг шаклланаётганидан далолат беради.

Аввало шуни таъкидлаш лозимки, коррупция инсоният томонидан ўйлаб топилган энг хунук ва ёқимсиз иллатдир. Президентимиз таъкидлаганларидек, "коррупция иллати ҳатто энг қудратли ва кучли давлатларни ҳам жар ёқасига олиб келган ва пароканда қилган". Чунки коррупциялашган жамиятда инсонларда давлатга ишонч йўқолади, мақсадга интилиш, инсоннинг ўзи севиб шуғулланадиган муайян фаолиятга нисбатан иштиёқ ҳиссини сўндиради.

2017 йил 3 январда "Коррупцияга қарши кураш тўғрисида"ги Ўзбекистон Республикаси Қонунининг қабул қилиниши ушбу йўналишда том маънода катта ўзгаришлар ясалишини таъминлади ва коррупцияга қарши курашиш нафақат ҳуқуқни муҳофаза қилиш органлари ходимларининг, балки бутун жамиятимизнинг зиммасидаги масъулиятли вазифага айланди.

Бу "Тараққиёт кўзгуси" газетаси таҳририятининг Олий Мажлис ҳузуридаги фуқаролик жамияти институтларини қўллаб-қувватлаш жамоат фонди томонидан молиялаштирилган "Биз коррупцияга қаршимиз!" номли грант лойиҳаси доирасида амалга оширилаётган тадбирларда ҳам ўз ифодасини топмоқда. Мазкур лойиҳа доирасидаги ошкора ва очиқ мулоқот шаклидаги учрашувлар ва давра суҳбатларига Амударё туманининг энг чекка ҳудудларидаги фуқаролар ҳам қамраб олиниб, коррупцияга қарши кураш бўйича аҳолининг ҳуқуқий саводхонлигини оширишга ҳисса қўшилмоқда.

8 сентябрь куни Манғит шаҳрининг Беруний номли маҳалласида лойиҳа доирасида ўтказилган учрашувда фуқаролар йиғини масъуллари, ҳуқуқшунослар, грант лойиҳаси координаторлари ва маҳалла фаоллари иштирок этдилар.

Учрашувни маҳалла фуқаролар йиғини раиси Маъруфжон Ҳожисолиев очди ва иштирокчиларга жамиятимизда чуқур илдиз отган коррупция иллатига қарши курашиш нафақат давлатимиз, балки кўп миллатли халқимиз, қолаверса ҳар бир оила ва ҳар бир фуқаронинг келажаги учун ўта муҳим аҳамиятга эгалиги хусусида батафсил сўз юритди.

Тадбир давомида лойиҳа координатори Робия Йўлдошева грант лойиҳасининг мазмун-моҳияти ва мазкур лойиҳа доирасида амалга оширилаётган учрашувлар ва давра суҳбатларидан кутилаётган натижалар тўғрисида батафсил маълумот берди. Айниқса, лойиҳа доирасида ҳуқуқшунослар томонидан аҳолига тақдим этилаётган ҳуқуқий маслаҳатлар, коррупцияга қарши кураш бўйича тушунча ва тавсиялар аҳолининг ҳуқуқий саводхонлигини оширишда муҳим аҳамият касб этаётганини таъкидлади.

Шундан сўнг Амударё тумани Адлия бўлими мутахассиси Аброр Тожибоев учрашув иштирокчиларига мамлакатимизда коррупцияга қарши курашиш соҳасида сўнгги йилларда амалга оширилаётган кенг кўламли ислоҳотлар хусусида сўз юритиб, соҳага оид қабул қилинган норматив-ҳуқуқий ҳужжатлар, амалга оширилаётган маъмурий ислоҳотлар ва инсон омилини камайтиришга қаратилган рақамлаштириш жараёнлари тўғрисида атрофлича маълумотлар берди.

Шунингдек, учрашув давомида Беруний номли маҳалла фуқаролар йиғини хотин-қизлар фаоли Маҳфуза Иброҳимова ҳам сўзга чиқиб, ҳар қандай коррупциявий ҳолат инсон омилининг иштироки туфайли содир бўлиши, коррупциянинг оқибатларига қарши курашишдан кўра, бу иллатнинг олдини олиш сари қўйилган ҳар бир қадам жамият учун жуда катта фойда келтириши тўғрисида фикрларини билдирди.

Учрашув якунида ҳуқуқшунослар томонидан аҳолига зарур ҳуқуқий маслаҳатлар ва коррупцияга қарши кураш борасида тавсиялар берилди.

Маҳмуджон Шомуродов.