ЧОЙКЎЛ ОВУЛИДА "БИЗ КОРРУПЦИЯГА ҚАРШИМИЗ!" ГРАНТ-ЛОЙИҲАСИ ДОИРАСИДА УЧРАШУВ ЎТКАЗИЛДИ

Коррупция — жамият тараққиётининг кушандаси, демократик ислоҳотлар йўлидаги жиддий тўсиқдир. Бу иллат —  халқона тилда айтганда, фирибгарлик, товламачилик, манфаатлар тўқнашуви, ошна-оғайнигарчилик, уруғ-аймоқчилик, порахўрлик каби кўринишларда намоён бўлади ва "хуфиёна иқтисодиёт"нинг илдиз отишига замин яратади, жамиятда тенглик, ишонч ва адолат тамойилларига путур етказади.

Коррупция илдиз отган давлатда ижтимоий-иқтисодий муаммолар кучайиб, ҳатто хорижий инвестицияларнинг кириб келишига хавф солади. Ижтимоий жиҳатдан эса фуқаролар орасида тенгсизлик муҳитини юзага келтиради. Айниқса, соғликни сақлаш, таълим соҳалари ҳамда ижтимоий таъминот тизимидаги порахўрлик ижтимоий ҳимояга муҳтож бўлган аҳоли қатламларининг тиббий, таълимий ва  ижтимоий хизматлардан фойдаланиш имкониятларини чеклайди.

Бу каби коррупцион ҳолатлар давлат хизматчиларининг ўз мансаб-мавқеидан шахсий мақсадларда фойдаланиши билан боғлиқ жиноят тури ҳисобланади ва бу жиноятга қарши курашиш ҳар бир ҳалол ва виждонли инсоннинг зиммасидаги фуқаролик бурчидир. Бу борада "Тараққиёт кўзгуси" газетаси таҳририятининг Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди томонидан молиялаштирилган "Биз коррупцияга қаршимиз!" грант-лойиҳаси доирасида амалга оширилаётган тадбирлар муҳим аҳамият касб этмоқда.

Тажрибали ҳуқуқшунослар, жамоат ташкилотлари фаоллари ва лойиҳа координаторлари ҳамкорлигида ташкил этилаётган учрашувлар ва очиқ мулоқот тадбирларида малакали ҳуқуқшунослар томонидан аҳоли вакилларининг ҳуқуқий билимларини мустаҳкамлаш, коррупцияга қарши курашишда ҳамжиҳатлик билан ҳаракат қилишга мойиллик уйғотишга қаратилган маърузалар ўқилаётгани ўзининг ижобий самарасини бермоқда.

Ана шундай тадбирлардан бири яқинда Чойкўл овул фуқаролар йиғини биносида ҳам ўтказилиб, унда малакали ҳуқуқшунослар, жамоатчилик фаоллари, Чойкўл ОФЙ еттилиги аъзолари ва "Биз коррупцияга қаршимиз!" лойиҳаси координаторлари, журналистлар иштирок этдилар.

Жамиятда коррупцияга нисбатан ҳуқуқий иммунитетни шакллантиришга қаратилган мазкур учрашувда лойиҳа координаторларидан бири, журналист Шоҳзод Қурбонбоев тадбир иштирокчиларига "Биз коррупцияга қаршимиз!" лойиҳасини амалга оширишдан кўзланган мақсад ва кутилаётган натижалар хусусида батафсил маълумот берди. Шундан сўнг "Тараққиёт кўзгуси" газетаси махсус мухбири Робия Йўлдошева коррупциянинг тарихий илдизлари, унинг ижтимоий-иқтисодий зарарлари, манфаатлар тўқнашуви, айниқса, уруғ-аймоқчилик, фирибгарлик, товламачилик ҳамда жамиятимизда чуқур илдиз отган порахўрлик иллатлари ва уларнинг келиб чиқиш сабаблари тўғрисида ҳаётий мисоллар тариқасида кенг тушунчалар бериб, коррупцияга қарши курашишнинг бирдан-бир ва асосий йўли жамият аъзоларида бу иллатга нисбатан ҳуқуқий иммунитетни шакллантириш эканлигини алоҳида таъкидлади.

Учрашув давомида Амударё тумани Адлия бўлими Юридик хизмат кўрсатиш Маркази бошлиғи Шавкат Ваисниязов тадбир иштирокчиларига 2017 йил 3 январда қабул қилинган "Коррупцияга қарши курашиш тўғрисида"ги Ўзбекистон Республикаси Қонунининг мазмун-моҳияти ҳақида батафсил тўхталиб, коррупцияга оид ҳуқуқбузарлик ва манфаатлар тўқнашуви, порахўрлик каби иллатлар юзасидан кенг тушунчалар берди.

Шунингдек, мазкур Қонун устуворлигини таъминлаш мақсадида очиқлик ва шаффофлик, тизимлилик, давлат ва фуқаролик жамиятининг ҳамкорлиги, коррупциянинг олдини олишга доир чора-тадбирларнинг устуворлиги ҳамда жавобгарликнинг муқаррарлиги қонун билан мустаҳкамлаб қўйилганлиги хусусида батафсил маълумотлар тақдим этиб, туманимизда коррупцияга қарши тизимли равишда кураш олиб борилаётганини, бу борада туман Адлия бўлимининг Юридик хизмат кўрсатиш Маркази мутахассислари аҳолига ҳуқуқий маслаҳатлар бериш орқали қўллаб-қувватлаб келаётганини қайд этди.

Учрашувда сўзга чиққан Амударё туман Ички ишлар бўлими катта инспектори Инобат Ўрозматова Ўзбекистонда сўнгги йилларда коррупцияга қарши курашиш борасида қабул қилинган меъёрий-ҳуқуқий ҳужжатлар, айниқса, хотин-қизларни коррупцион таҳдидлардан ҳимоялаш борасида мамлакатимизда амалга оширилаётган ишлар тўғрисида тўхталиб, коррупцияга қарши курашишда аёл-қизларнинг ролини янада ошириш бўйича фикрларини билдирди.

Учрашувда Чойкўл овули аёллари томонидан коррупцияга қарши курашиш юзасидан тушган ҳуқуқий саволларга  ҳуқуқшунослар  батафсил жавоблар бердилар ва бу каби учрашувлар  ҳар бир фуқарода  коррупцияга нисбатан ҳуқуқий иммунитетни  шакллантириш билан бирга жамиятда ҳуқуқий-ижтимоий фаолликни оширишга хизмат қилишини алоҳида таъкидладилар.

РАВШАН  БАҲРОМОВ,  лойиҳа координатори.