ChOYKOʻL OVULIDA "BIZ KORRUPTsIYaGA QARShIMIZ!" GRANT-LOYIHASI DOIRASIDA UChRAShUV OʻTKAZILDI

Korruptsiya — jamiyat taraqqiyotining kushandasi, demokratik islohotlar yoʻlidagi jiddiy toʻsiqdir. Bu illat —  xalqona tilda aytganda, firibgarlik, tovlamachilik, manfaatlar toʻqnashuvi, oshna-ogʻaynigarchilik, urugʻ-aymoqchilik, poraxoʻrlik kabi koʻrinishlarda namoyon boʻladi va "xufiyona iqtisodiyot"ning ildiz otishiga zamin yaratadi, jamiyatda tenglik, ishonch va adolat tamoyillariga putur yetkazadi.

Korruptsiya ildiz otgan davlatda ijtimoiy-iqtisodiy muammolar kuchayib, hatto xorijiy investitsiyalarning kirib kelishiga xavf soladi. Ijtimoiy jihatdan esa fuqarolar orasida tengsizlik muhitini yuzaga keltiradi. Ayniqsa, sogʻlikni saqlash, taʼlim sohalari hamda ijtimoiy taʼminot tizimidagi poraxoʻrlik ijtimoiy himoyaga muhtoj boʻlgan aholi qatlamlarining tibbiy, taʼlimiy va  ijtimoiy xizmatlardan foydalanish imkoniyatlarini cheklaydi.

Bu kabi korruptsion holatlar davlat xizmatchilarining oʻz mansab-mavqeidan shaxsiy maqsadlarda foydalanishi bilan bogʻliq jinoyat turi hisoblanadi va bu jinoyatga qarshi kurashish har bir halol va vijdonli insonning zimmasidagi fuqarolik burchidir. Bu borada "Taraqqiyot koʻzgusi" gazetasi tahririyatining Oʻzbekiston Respublikasi Oliy Majlisi huzuridagi Fuqarolik jamiyati institutlarini qoʻllab-quvvatlash jamoat fondi tomonidan moliyalashtirilgan "Biz korruptsiyaga qarshimiz!" grant-loyihasi doirasida amalga oshirilayotgan tadbirlar muhim ahamiyat kasb etmoqda.

Tajribali huquqshunoslar, jamoat tashkilotlari faollari va loyiha koordinatorlari hamkorligida tashkil etilayotgan uchrashuvlar va ochiq muloqot tadbirlarida malakali huquqshunoslar tomonidan aholi vakillarining huquqiy bilimlarini mustahkamlash, korruptsiyaga qarshi kurashishda hamjihatlik bilan harakat qilishga moyillik uygʻotishga qaratilgan maʼruzalar oʻqilayotgani oʻzining ijobiy samarasini bermoqda.

Ana shunday tadbirlardan biri yaqinda Choykoʻl ovul fuqarolar yigʻini binosida ham oʻtkazilib, unda malakali huquqshunoslar, jamoatchilik faollari, Choykoʻl OFY yettiligi aʼzolari va "Biz korruptsiyaga qarshimiz!" loyihasi koordinatorlari, jurnalistlar ishtirok etdilar.

Jamiyatda korruptsiyaga nisbatan huquqiy immunitetni shakllantirishga qaratilgan mazkur uchrashuvda loyiha koordinatorlaridan biri, jurnalist Shohzod Qurbonboyev tadbir ishtirokchilariga "Biz korruptsiyaga qarshimiz!" loyihasini amalga oshirishdan koʻzlangan maqsad va kutilayotgan natijalar xususida batafsil maʼlumot berdi. Shundan soʻng "Taraqqiyot koʻzgusi" gazetasi maxsus muxbiri Robiya Yoʻldosheva korruptsiyaning tarixiy ildizlari, uning ijtimoiy-iqtisodiy zararlari, manfaatlar toʻqnashuvi, ayniqsa, urugʻ-aymoqchilik, firibgarlik, tovlamachilik hamda jamiyatimizda chuqur ildiz otgan poraxoʻrlik illatlari va ularning kelib chiqish sabablari toʻgʻrisida hayotiy misollar tariqasida keng tushunchalar berib, korruptsiyaga qarshi kurashishning birdan-bir va asosiy yoʻli jamiyat aʼzolarida bu illatga nisbatan huquqiy immunitetni shakllantirish ekanligini alohida taʼkidladi.

Uchrashuv davomida Amudaryo tumani Adliya boʻlimi Yuridik xizmat koʻrsatish Markazi boshligʻi Shavkat Vaisniyazov tadbir ishtirokchilariga 2017-yil 3-yanvarda qabul qilingan "Korruptsiyaga qarshi kurashish toʻgʻrisida"gi Oʻzbekiston Respublikasi Qonunining mazmun-mohiyati haqida batafsil toʻxtalib, korruptsiyaga oid huquqbuzarlik va manfaatlar toʻqnashuvi, poraxoʻrlik kabi illatlar yuzasidan keng tushunchalar berdi.

Shuningdek, mazkur Qonun ustuvorligini taʼminlash maqsadida ochiqlik va shaffoflik, tizimlilik, davlat va fuqarolik jamiyatining hamkorligi, korruptsiyaning oldini olishga doir chora-tadbirlarning ustuvorligi hamda javobgarlikning muqarrarligi qonun bilan mustahkamlab qoʻyilganligi xususida batafsil maʼlumotlar taqdim etib, tumanimizda korruptsiyaga qarshi tizimli ravishda kurash olib borilayotganini, bu borada tuman Adliya boʻlimining Yuridik xizmat koʻrsatish Markazi mutaxassislari aholiga huquqiy maslahatlar berish orqali qoʻllab-quvvatlab kelayotganini qayd etdi.

Uchrashuvda soʻzga chiqqan Amudaryo tuman Ichki ishlar boʻlimi katta inspektori Inobat Oʻrozmatova Oʻzbekistonda soʻnggi yillarda korruptsiyaga qarshi kurashish borasida qabul qilingan meʼyoriy-huquqiy hujjatlar, ayniqsa, xotin-qizlarni korruptsion tahdidlardan himoyalash borasida mamlakatimizda amalga oshirilayotgan ishlar toʻgʻrisida toʻxtalib, korruptsiyaga qarshi kurashishda ayol-qizlarning rolini yanada oshirish boʻyicha fikrlarini bildirdi.

Uchrashuvda Choykoʻl ovuli ayollari tomonidan korruptsiyaga qarshi kurashish yuzasidan tushgan huquqiy savollarga  huquqshunoslar  batafsil javoblar berdilar va bu kabi uchrashuvlar  har bir fuqaroda  korruptsiyaga nisbatan huquqiy immunitetni  shakllantirish bilan birga jamiyatda huquqiy-ijtimoiy faollikni oshirishga xizmat qilishini alohida taʼkidladilar.

RAVShAN  BAHROMOV,  loyiha koordinatori.