16 ноябрь – Халқаро бағрикенглик куни муносабати билан 76-сонли мактабда фестивал ўтказилди

Халқаро ЮНЕСКО ташкилоти дунёда тинчлик, динлар ва конфессиялараро мулоқотни ўрнатиш, миллатлар ва эллатлар ўртасида ҳамкорликни ривожлантириш борасида бир қатор ишлар амалга оширириб, ҳозирда бағрикенгликка оид 70 дан зиёд халқаро ҳужжатлар қабул қилинган.

Уларнинг ёрқин намунаси 1995 йил 16 ноябрда Парижда ЮНЕСКО Бош конференциясининг 28-сессиясида эълон қилинган “Бағрикенглик тамойиллари декларацияси”дир. Ҳозирда ушбу кун бутун дунёда “Ҳалқаро бағрикенглик куни” сифатида кенг нишонланади.

Мамлакатимизда  тинчлик, осойишлатик омили бўлган диний бағрикенглик тамойилларини янада мустаҳкамлаш ва ривожлантиришга алоҳида эътибор қаратиб келинмоқда. Юртимизда хилма–хил диний эътиқодга эга бўлган кишиларнинг бир заминда буюк ғоя ва соф ниятлар йўлида хамкор ва ҳамжихат бўлиб яшашлиги бағрикенгликнинг ёрқин намунасидир.

Юртимизда  бағрикенглик ва инсонпарварлик маданиятини ривожлантириш, миллатлараро ва конфессиялараро ҳамжиҳатликни, жамиятда фуқаролар тотувлигини мустаҳкамлаш, барча фуқароларга миллати ва диний эътиқодидан қатъи назар, тенг ҳуқуқ ва имкониятлар яратиш, ёш авлодни ватанпарварлик, миллий ва умуминсоний қадриятларга ҳурмат, Ватанга муҳаббат ва садоқат руҳида тарбиялаш Ўзбекистонда давлат сиёсатининг муҳим устувор йўналишларидан бири этиб белгиланган.

16 ноябрь – “Халқаро бағрикенглик куни”  муносабати билан туманимиздаги 76-сонли умумтаълим мактабида “Бағрикенглик куни” фестивали бўлиб ўтди. Фестивалда иштирок этган мактабнинг бешинчи, олтинчи, еттинчи, саккизинчи, тўққизинчи  ҳамда 10-синф ўқувчилари иншо ёзиш ва тасвирий санъат йўналишлари бўйича ўз қобилиятларини синовдан ўтказдилар.

Фестивал 5 та шартдан иборат бўлиб, 1-шарт “Миллий анъана ва удумлар” шартида  ўқувчилар миллий қадриятларимиз, урф-одатларимиз ҳамда қардош халқлар анъаналри, уларнинг миллий урф-одатлари ҳақида чиқишлар қилишди.
2-шарт “Миллий либослар” шартида ўқувчилар бувижонларимиз, онажонларимиз, момоларимиз кийган либослар кўргазмасини намойиш этишди.

3-шарт “Миллий қўшиқ ва рақслар” шартида ўқувчилар миллий куй-қўшиқларимизни куйлашди ва рақслар ижро этишди.

4-шарт “Менинг бағрикенг дунём” шартида иштирок этган ўқувчилар ўзларининг бағрикенглик тушунчаларига қараб тасвирий санъат йўналишида  ижод этдилар. Бағрикенгликни тасвирловчи расмлар чизишди.

 5-шарт “Бағрикенглик менинг наздимда” шартида ўқувчилар бағрикенглик  ҳақида иншо ёзишди.

Фестивал якунида қатнашчилар ўзлари  иштирок этган йўналишлар бўйича номинациялар билан тақдирландилар.

Албатта, бу каби фестиваллар фуқаролар тотувлиги барқарорлигини, турли миллатлар вакиллари ўртасидаги тинчлик ва ҳамжиҳатликни таъминлашда, қардош миллатлар билан маданий-маърифий алоқаларни кенгайтиришда ва энг асосийси, ёшлар онгида кўп миллатли ягона оила туйғусини мустаҳкамлашда муҳим пойдевор бўлиб хизмат қилади.

Ирода Эрдошева,
жамоатчи мухбир.