ЁНҒИН ХАВФСИЗЛИГИГА РИОЯ ҚИЛИШ ВА ИС ГАЗИДАН ЗАҲАРЛАНИШНИНГ ОЛДИНИ ОЛИШ ҲАР БИР ФУҚАРОНИНГ ВАЗИФАСИ

Ёнғин хавфсизлиги талабларини амалга ошириш ҳар бир юртдошимизнинг муқаддас бурчидир. Афсуски, айрим кишиларнинг бу оддий ҳақиқатни етарлича англамай ёнғин хавфсизлиги қоидаларига эътиборсизлиги туфайли ёнғинлар келиб чиқмоқда.

2019 йил 10 ой давомида туманимизда 26 та ёнғин ҳодисаси қайд қилинди. Бундай катта-кичик ёнғинлар фуқароларга анчагина моддий ва маънавий зарар келтирмоқда. Ёнғин келиб чиқиши сабабларини тахлил қилиб кўрганимизда буларга уйларда газ ва электр тармоқларидан тўғри фойдаланмасак, уйда ёш болаларни қаровсиз қолдириб, уларнинг гугурт ўйнашларига эътибор бермаётганлигимиз аниқланди. Бундай нохуш ҳодисаларнинг олдини олиш учун ҳар биримиз ёнғиннинг олдини олишга доир талаб қоидаларга амал қилишимиз, газ ва электр ускуналаридан тўғри фойдаланишимиз, болаларни уйда қаровсиз қолдирмаслигимиз, турар жойлар, корхона ва муассаса биноларидаги иситиш қозонларининг ўчоқ ҳамда печларнинг яроқлилигини, мўрилари ва газ плиталарнинг жумраклари созлигини текшириб, уларни ёнғинга қарши курашиш жамияти орқали кўрикдан ўтказиб қўйишимиз лозим бўлади.

Ёнғин хавфининг олдини олиб, нохуш оқибатлари ҳақида гапирганда кўз олдимизга аввало куйиб кулга айланган уй-жойлар, бинолар, касалхоналарда куйиш туфайли тан жароҳати олиб азобланаётган кишилар келади. Қанчадан-қанча одамлар бошпанасиз қолади, саломатлигини йўқотади, айрим ҳолларда эса киши ҳаётдан бевақт кўз юмади.

Йил давомида ёнғинларнинг кўпчилик қисми фуқароларнинг турар жойларида содир бўлган. Шунинг учун оловдан тўғри фойдаланиш чора-тадбирларини яна бир бор эслатиб ўтамиз. Уй жойларни тўғри лойиҳалаш, намунали қуриш, газ ва электр жиҳозларидан мазкур қоидаларга амал қилган ҳолда эҳтиёткорлик билан фойдаланиш лозим бўлади.

Ўзбекистон Республикаси Вазирлар Маҳкамаси Раёсати мажлисининг 2019 йил 14 октябрдаги 150-сонли баёнига асосан Республикамиз бўйича “Ис гази” тадбири ўтказилмоқда ўтган давр мобайнида содир бўлган ёнғинлар ҳамда газ ва ҳаво аралашмасининг чақнаши ва ис газидан заҳарланишига боғлиқ бахтсиз ҳодисаларни инобатга олиб, бундай нохуш ҳолатларнинг олдини олиш ва аҳоли турар жойларда ёнғин хавфсизлигини таъминлаш ишлари кучайтирилган тартибда олиб борилмоқда.

Туманимизда 4 та ишчи гуруҳ ташкил қилиниб, туман ҳудудидаги маҳаллаларда фуқароларнинг хавфсизлигини таъминлаш мақсадида қиш фаслининг халоватли ўтказилишини таъминлашда бир қанча ишлар амалга оширилмоқда. Шу билан бирга айрим маҳаллаларда ёнғин хавфсизлиги қоидаларини қўпол равишда бузаётган фуқароларга нисбатан маъмурий баённомалар расмийлаштирилмоқда.

Туман Ёнғин хавфсизлиги бўлинмаси Манғит шаҳри 3-Касбийлаштирилган ёнғин хавфсизлиги қисми ва Қипчоқ шаҳарчаси 4-Касбийлаштирилган ёнғин хавфсизлиги қисми шахсий таркиби томонидан туманимиз ҳудудида тадбир бошлангандан шу кунга қадар 1834 та фуқароларга ёнғиннинг олдини олиш ва ис газидан заҳарланишларнинг олдини олиш бўйича газ баллонлардан, газ ва электр мосламаларидан хавфсизлик қоидалари талабларига  асосан тўғри фойдаланишлари, иситиш печларининг мўриконлари созлигини доимий назорат қилишлари, носоз қўлбола ва ўзбошимчалик билан ўрнатилган газ ва электр ускуналаридан фойдаланмасликлари бўйича тушунчалар, суҳбат ва йўриқнома бериб борилди ва содир бўлиши  мумкин бўлган ёнғинлар, газ ва ҳаво аралашмасининг чақнаши, фуқароларнинг ис газидан захарланиши ва бошқа нохуш ҳолатларнинг олдини олишга қаратилган тарғибот қилувчи эслатма ва йўриқномалар тарқатилди.

Азизбек ЮСУПОВ, ЁХБ катта инспектори, катта сержант.