YoNGʻIN XAVFSIZLIGIGA RIOYa QILISh VA IS GAZIDAN ZAHARLANIShNING OLDINI OLISh HAR BIR FUQARONING VAZIFASI

Yongʻin xavfsizligi talablarini amalga oshirish har bir yurtdoshimizning muqaddas burchidir. Afsuski, ayrim kishilarning bu oddiy haqiqatni yetarlicha anglamay yongʻin xavfsizligi qoidalariga eʼtiborsizligi tufayli yongʻinlar kelib chiqmoqda.

2019-yil 10 oy davomida tumanimizda 26 ta yongʻin hodisasi qayd qilindi. Bunday katta-kichik yongʻinlar fuqarolarga anchagina moddiy va maʼnaviy zarar keltirmoqda. Yongʻin kelib chiqishi sabablarini taxlil qilib koʻrganimizda bularga uylarda gaz va elektr tarmoqlaridan toʻgʻri foydalanmasak, uyda yosh bolalarni qarovsiz qoldirib, ularning gugurt oʻynashlariga eʼtibor bermayotganligimiz aniqlandi. Bunday noxush hodisalarning oldini olish uchun har birimiz yongʻinning oldini olishga doir talab qoidalarga amal qilishimiz, gaz va elektr uskunalaridan toʻgʻri foydalanishimiz, bolalarni uyda qarovsiz qoldirmasligimiz, turar joylar, korxona va muassasa binolaridagi isitish qozonlarining oʻchoq hamda pechlarning yaroqliligini, moʻrilari va gaz plitalarning jumraklari sozligini tekshirib, ularni yongʻinga qarshi kurashish jamiyati orqali koʻrikdan oʻtkazib qoʻyishimiz lozim boʻladi.

Yongʻin xavfining oldini olib, noxush oqibatlari haqida gapirganda koʻz oldimizga avvalo kuyib kulga aylangan uy-joylar, binolar, kasalxonalarda kuyish tufayli tan jarohati olib azoblanayotgan kishilar keladi. Qanchadan-qancha odamlar boshpanasiz qoladi, salomatligini yoʻqotadi, ayrim hollarda esa kishi hayotdan bevaqt koʻz yumadi.

Yil davomida yongʻinlarning koʻpchilik qismi fuqarolarning turar joylarida sodir boʻlgan. Shuning uchun olovdan toʻgʻri foydalanish chora-tadbirlarini yana bir bor eslatib oʻtamiz. Uy joylarni toʻgʻri loyihalash, namunali qurish, gaz va elektr jihozlaridan mazkur qoidalarga amal qilgan holda ehtiyotkorlik bilan foydalanish lozim boʻladi.

Oʻzbekiston Respublikasi Vazirlar Mahkamasi Rayosati majlisining 2019-yil 14-oktyabrdagi 150-sonli bayoniga asosan Respublikamiz boʻyicha “Is gazi” tadbiri oʻtkazilmoqda oʻtgan davr mobaynida sodir boʻlgan yongʻinlar hamda gaz va havo aralashmasining chaqnashi va is gazidan zaharlanishiga bogʻliq baxtsiz hodisalarni inobatga olib, bunday noxush holatlarning oldini olish va aholi turar joylarda yongʻin xavfsizligini taʼminlash ishlari kuchaytirilgan tartibda olib borilmoqda.

Tumanimizda 4 ta ishchi guruh tashkil qilinib, tuman hududidagi mahallalarda fuqarolarning xavfsizligini taʼminlash maqsadida qish faslining xalovatli oʻtkazilishini taʼminlashda bir qancha ishlar amalga oshirilmoqda. Shu bilan birga ayrim mahallalarda yongʻin xavfsizligi qoidalarini qoʻpol ravishda buzayotgan fuqarolarga nisbatan maʼmuriy bayonnomalar rasmiylashtirilmoqda.

Tuman Yongʻin xavfsizligi boʻlinmasi Mangʻit shahri 3-Kasbiylashtirilgan yongʻin xavfsizligi qismi va Qipchoq shaharchasi 4-Kasbiylashtirilgan yongʻin xavfsizligi qismi shaxsiy tarkibi tomonidan tumanimiz hududida tadbir boshlangandan shu kunga qadar 1834 ta fuqarolarga yongʻinning oldini olish va is gazidan zaharlanishlarning oldini olish boʻyicha gaz ballonlardan, gaz va elektr moslamalaridan xavfsizlik qoidalari talablariga  asosan toʻgʻri foydalanishlari, isitish pechlarining moʻrikonlari sozligini doimiy nazorat qilishlari, nosoz qoʻlbola va oʻzboshimchalik bilan oʻrnatilgan gaz va elektr uskunalaridan foydalanmasliklari boʻyicha tushunchalar, suhbat va yoʻriqnoma berib borildi va sodir boʻlishi  mumkin boʻlgan yongʻinlar, gaz va havo aralashmasining chaqnashi, fuqarolarning is gazidan zaxarlanishi va boshqa noxush holatlarning oldini olishga qaratilgan targʻibot qiluvchi eslatma va yoʻriqnomalar tarqatildi.

Azizbek YuSUPOV, YoXB katta inspektori, katta serjant.