ВАТАН ОСУДАЛИГИ ИШОНЧЛИ ҚЎЛЛАРДА

Дунёда инсон учун тинчликдан, мустақилликдан-да улуғ ва азиз неъмат йўқ. Ер юзидаги 200 дан ортиқ мамлакатлар аҳолисининг кўпчилиги ўзаро уруш-низолар, таҳликалар, офатлар гирдобида яшаётган бир вақтда юртимизнинг осмони осуда, тунлари оромбахш, кунлари эзгу ва хайрли амаллар, шу юрт равнақи йўлидаги саъй-ҳаракатлар билан кечаётганидан, халқимизнинг турмуши тобора фаровонлашиб, сифати ошиб бораётганидан ҳар қанча фахрлансак, шукрона айтсак, арзийди.

Мамлакатимизнинг тинчлик-осудалиги барқарор бўлмоғи учун юртбошимиз ташаббуси билан истиқлолнинг иккинчи йилида ташкил этилган миллий армиямиз мустақиллигимизни мустаҳкамлаш, осойишталикни асраш, халқимизнинг тинч-осойишта ҳаётини таъминлашдек шарафли вазифани уддалаб келмоқда. Ўтган 22 йил давомида Ўзбекистон Республикаси Президенти, Қуролли Кучлар Олий Бош қўмондони И.Каримов раҳнамолигида мамлакатимизда бугунги кунталабларига жавоб берадиган тезкор ва ихчам, замонавий қурол-яроғ ва техника билан таъминланган, жанговар қобилият ва тайёргарликка эга миллий армия шаклланди.

Ҳарбий хизматчиларга, муддатли ҳарбий хизматга чақирилган аскарларга жаҳон андозаларига мос шароитлар яратилди, ижтимоий муҳофазаси мустаҳкамланди. Шу боисдан бугун юртимиз ўғлонлари армия сафида хизмат қилишни ўзларига шараф деб биладилар.

Мамлакатимиз сарҳадларининг дахлсизлиги, юртимизда ҳукм сураётган тинчлик ва осойишталик барча соҳаларда юксалишларга, тараққиётга асос бўлмоқда. Бу мамлакат ҳаётида миллий армиянинг ўрни нечоғлик улканэканлигини кўрсатади.

Юртбошимизнинг 2013 йил 12 декабрдаги 4174-сонли "Ватан ҳимоячилари кунини нишонлашга тайёргарлик кўриш ва уни ўтказиш тўғрисида”ги Фармойиши ҳам Қуролли Кучларимизнинг нуфузи ва унга ҳалқимизнинг ҳурмат-эҳтироми намунасидир.

Айни кунларда бутун мамлакатимизда қутлуғ сана - Қуролли Кучларимиз ташкил этилганлигининг 22 йиллиги улкан байрам қилинмоқда, "Ўзбекистон ягона Ватаним” шиори остида маданий-маърифий, сиёсий маънавий тадбирлар ўтказилмоқда.

Ҳа, Ватан – ягона, Ватан- муқаддас! Унинг дахлсизлигини, осудалигини ҳушёрлик, матонат, фидойилик билан қўриқлаб турган Қуролли Кучларимиз ҳар қанча шарафга, эҳтиромга муносибдир.

Байрамингиз муборак бўлсин, тинчлигимиз посбонлари!

(Фото - http://uza.uz)