VATAN OSUDALIGI IShONChLI QOʻLLARDA

Dunyoda inson uchun tinchlikdan, mustaqillikdan-da ulugʻ va aziz neʼmat yoʻq. Yer yuzidagi 200 dan ortiq mamlakatlar aholisining koʻpchiligi oʻzaro urush-nizolar, tahlikalar, ofatlar girdobida yashayotgan bir vaqtda yurtimizning osmoni osuda, tunlari orombaxsh, kunlari ezgu va xayrli amallar, shu yurt ravnaqi yoʻlidagi saʼy-harakatlar bilan kechayotganidan, xalqimizning turmushi tobora farovonlashib, sifati oshib borayotganidan har qancha faxrlansak, shukrona aytsak, arziydi.

Mamlakatimizning tinchlik-osudaligi barqaror boʻlmogʻi uchun yurtboshimiz tashabbusi bilan istiqlolning ikkinchi yilida tashkil etilgan milliy armiyamiz mustaqilligimizni mustahkamlash, osoyishtalikni asrash, xalqimizning tinch-osoyishta hayotini taʼminlashdek sharafli vazifani uddalab kelmoqda. Oʻtgan 22-yil davomida Oʻzbekiston Respublikasi Prezidenti, Qurolli Kuchlar Oliy Bosh qoʻmondoni I.Karimov rahnamoligida mamlakatimizda bugungi kuntalablariga javob beradigan tezkor va ixcham, zamonaviy qurol-yarogʻ va texnika bilan taʼminlangan, jangovar qobiliyat va tayyorgarlikka ega milliy armiya shakllandi.

Harbiy xizmatchilarga, muddatli harbiy xizmatga chaqirilgan askarlarga jahon andozalariga mos sharoitlar yaratildi, ijtimoiy muhofazasi mustahkamlandi. Shu boisdan bugun yurtimiz oʻgʻlonlari armiya safida xizmat qilishni oʻzlariga sharaf deb biladilar.

Mamlakatimiz sarhadlarining daxlsizligi, yurtimizda hukm surayotgan tinchlik va osoyishtalik barcha sohalarda yuksalishlarga, taraqqiyotga asos boʻlmoqda. Bu mamlakat hayotida milliy armiyaning oʻrni nechogʻlik ulkanekanligini koʻrsatadi.

Yurtboshimizning 2013-yil 12-dekabrdagi 4174-sonli "Vatan himoyachilari kunini nishonlashga tayyorgarlik koʻrish va uni oʻtkazish toʻgʻrisida”gi Farmoyishi ham Qurolli Kuchlarimizning nufuzi va unga halqimizning hurmat-ehtiromi namunasidir.

Ayni kunlarda butun mamlakatimizda qutlugʻ sana - Qurolli Kuchlarimiz tashkil etilganligining 22 yilligi ulkan bayram qilinmoqda, "Oʻzbekiston yagona Vatanim” shiori ostida madaniy-maʼrifiy, siyosiy maʼnaviy tadbirlar oʻtkazilmoqda.

Ha, Vatan – yagona, Vatan- muqaddas! Uning daxlsizligini, osudaligini hushyorlik, matonat, fidoyilik bilan qoʻriqlab turgan Qurolli Kuchlarimiz har qancha sharafga, ehtiromga munosibdir.

Bayramingiz muborak boʻlsin, tinchligimiz posbonlari!

(Foto - http://uza.uz)