Ободлик барқ урсин

Меҳнат кишисининг жамият ҳаётида фаол иштирокини таъминлаш, энг аввало она ва бола репродуктив саломатлигига эришиш, ҳар бир оила, ҳар битта хонадонда соғлом турмуш тарзини шакллантириш борасида истиқлол йилларида жуда катта миқёсда ишлар олиб борилди.

Бизнинг "Чойкўл” овулимиз ҳудуди 2591 гектарни ташкил этади. Овулимизда 5,5 минг нафарга яқин аҳоли истиқомат қилади. 772 та хонадонга бириккан 870 дан зиёд оилаларда ўзбек, қорақалпоқ, қозоқ, туркман, татар, рус ва бошқирд миллатлари вакиллари ўзаро аҳил, ҳамжиҳатликда яшашади. Овулимизда 1 та маданият уйи, 1 та кутубхона, ТТБга қарашли "Саломатлик” маркази, 1 та қишлоқ врачлик пункти ва 2 та фельдшер-акушерлик пунктлари мавжуд. 2 та умумтаълим мактабларида фарзандларимизнинг умумий ўрта таълим олишлари, спорт билан шуғулланишлари учун барча шарт-шароитлар яратилган.

Биз аҳолининг турмуш фаровонлигини юксалтириш, оилаларда соғлом турмуш тарзини шакллантириш тўғрисида кўп гапирамиз. Ва ана шу мақсадларни ифода этувчи режалар тузамиз. Аҳоли учун эса ана шу режаларнинг амалий ижроси муҳим. Биз ана шундай режаларимизни амалга ошириш  жараёнида кўплаб муаммоларни ҳал қиламиз. Чунончи, овул ҳудудидаги 9 та аҳоли пунктидаги кўча ва ҳовлиларнинг тозалиги, аҳолининг тоза ичимлик суви билан таъминланиш аҳволи, ёшлар тарбияси, айниқса, ўсиб келаётган ёш авлоднинг ҳар хил диний-экстремистик оқимлар таъсирига тушиб қолмасликлари учун уларнинг бўш вақтларини мазмунли ўтказишларини, иш билан бандлигини таъминлаш каби масалалар доимий диққат марказимизда.

Баҳор ва куз мавсумларида олиб борилган ободонлаштириш ва кўкаламзорлаштириш тадбирларида барча оилалар фаол иштирок этишди. Натижада ҳудудимизда яшил майдонлар йил сайин кенгайиб, янги-янги боғ-роғлар бунёд этилмоқда. Аҳоли томорқаси учун ажратилган 30 гектардан зиёд унумдор ерлар мўл-кўл даромад манбаига айланган. Чойкўлликлар ҳаёти ҳалол ва фидойи меҳнатлари билан кун сайин фаровонлашиб бораётганлари ҳам шундан. Аҳоли хонадонларида 3500 бошга яқин йирик шохли қорамоллар, 2100 бош қўй-қўзи, салкам 1000 бош  парранда зооветеринария қоидалари асосида парвариш қилинмоқда. Овул аҳли учун гўшт ва сут маҳсулотлари, мева-чева, дон-дун, полиз ва сабзавот маҳсулотларини танлаб истеъмол қилиш имкониятининг мавжудлиги фарзандларимизнинг ҳар томонлама соғлом вояга етишларида муҳим омил ҳисобланади.

Оилавий ва хусусий тадбиркорлик, касаначилик ва уй меҳнати билан шуғулланувчилар сони йил сайин ортиб бормоқда. 3 та хусусий дўкон, 1 та ошхона, 1 та ҳаммом ва 14 та маиший хизмат кўрсатиш шохобчаларида овул ёшлари фаолият олиб боришмоқда. 120 нафардан зиёд ёшлар эса уй меҳнати ва касаначилик билан шуғулланишади. 3 та хусусий тикувчилик цехида устоз-шогирд анъанаси асосида овул ёшлари касб-ҳунар сирларини ўрганишмоқда.

Халқимизда: "сен элим, деб қайишсанг, эл сени дейди”, - деган ҳикматли ибора бор. Бу ҳикматнинг ҳаётий ифодаси шундаки, кимки эл-юрт ободлиги, фаровонлиги йўлида фидойилик қилиб яхшилик ниҳолларини ўстирар экан, бу яхшилик йўли ҳамиша ободдир. Зеро, бу ҳаётда ўзимиздан қолгуси улуғ неъмат ана шу - яхшилик, гўзаллик, эзгулик барқ урган ибратли ва обод турмуш, муҳтарам Президентимиз таъбири билан айтганда: "озод ва обод Ватан!”. Ортимизда улғайиб камолга етаётган фарзандларимиз эса ана шу буюк Ватаннинг ворисларидир.

Рашиджон ЙЎЛДОШЕВ,

"Чойкўл” О.Ф.Й раиси.