Obodlik barq ursin

Mehnat kishisining jamiyat hayotida faol ishtirokini taʼminlash, eng avvalo ona va bola reproduktiv salomatligiga erishish, har bir oila, har bitta xonadonda sogʻlom turmush tarzini shakllantirish borasida istiqlol yillarida juda katta miqyosda ishlar olib borildi.

Bizning "Choykoʻl” ovulimiz hududi 2591 gektarni tashkil etadi. Ovulimizda 5,5 ming nafarga yaqin aholi istiqomat qiladi. 772 ta xonadonga birikkan 870 dan ziyod oilalarda oʻzbek, qoraqalpoq, qozoq, turkman, tatar, rus va boshqird millatlari vakillari oʻzaro ahil, hamjihatlikda yashashadi. Ovulimizda 1 ta madaniyat uyi, 1 ta kutubxona, TTBga qarashli "Salomatlik” markazi, 1 ta qishloq vrachlik punkti va 2 ta feldsher-akusherlik punktlari mavjud. 2 ta umumtaʼlim maktablarida farzandlarimizning umumiy oʻrta taʼlim olishlari, sport bilan shugʻullanishlari uchun barcha shart-sharoitlar yaratilgan.

Biz aholining turmush farovonligini yuksaltirish, oilalarda sogʻlom turmush tarzini shakllantirish toʻgʻrisida koʻp gapiramiz. Va ana shu maqsadlarni ifoda etuvchi rejalar tuzamiz. Aholi uchun esa ana shu rejalarning amaliy ijrosi muhim. Biz ana shunday rejalarimizni amalga oshirish  jarayonida koʻplab muammolarni hal qilamiz. Chunonchi, ovul hududidagi 9 ta aholi punktidagi koʻcha va hovlilarning tozaligi, aholining toza ichimlik suvi bilan taʼminlanish ahvoli, yoshlar tarbiyasi, ayniqsa, oʻsib kelayotgan yosh avlodning har xil diniy-ekstremistik oqimlar taʼsiriga tushib qolmasliklari uchun ularning boʻsh vaqtlarini mazmunli oʻtkazishlarini, ish bilan bandligini taʼminlash kabi masalalar doimiy diqqat markazimizda.

Bahor va kuz mavsumlarida olib borilgan obodonlashtirish va koʻkalamzorlashtirish tadbirlarida barcha oilalar faol ishtirok etishdi. Natijada hududimizda yashil maydonlar yil sayin kengayib, yangi-yangi bogʻ-rogʻlar bunyod etilmoqda. Aholi tomorqasi uchun ajratilgan 30 gektardan ziyod unumdor yerlar moʻl-koʻl daromad manbaiga aylangan. Choykoʻlliklar hayoti halol va fidoyi mehnatlari bilan kun sayin farovonlashib borayotganlari ham shundan. Aholi xonadonlarida 3500 boshga yaqin yirik shoxli qoramollar, 2100 bosh qoʻy-qoʻzi, salkam 1000 bosh  parranda zooveterinariya qoidalari asosida parvarish qilinmoqda. Ovul ahli uchun goʻsht va sut mahsulotlari, meva-cheva, don-dun, poliz va sabzavot mahsulotlarini tanlab isteʼmol qilish imkoniyatining mavjudligi farzandlarimizning har tomonlama sogʻlom voyaga yetishlarida muhim omil hisoblanadi.

Oilaviy va xususiy tadbirkorlik, kasanachilik va uy mehnati bilan shugʻullanuvchilar soni yil sayin ortib bormoqda. 3 ta xususiy doʻkon, 1 ta oshxona, 1 ta hammom va 14 ta maishiy xizmat koʻrsatish shoxobchalarida ovul yoshlari faoliyat olib borishmoqda. 120 nafardan ziyod yoshlar esa uy mehnati va kasanachilik bilan shugʻullanishadi. 3 ta xususiy tikuvchilik tsexida ustoz-shogird anʼanasi asosida ovul yoshlari kasb-hunar sirlarini oʻrganishmoqda.

Xalqimizda: "sen elim, deb qayishsang, el seni deydi”, - degan hikmatli ibora bor. Bu hikmatning hayotiy ifodasi shundaki, kimki el-yurt obodligi, farovonligi yoʻlida fidoyilik qilib yaxshilik nihollarini oʻstirar ekan, bu yaxshilik yoʻli hamisha oboddir. Zero, bu hayotda oʻzimizdan qolgusi ulugʻ neʼmat ana shu - yaxshilik, goʻzallik, ezgulik barq urgan ibratli va obod turmush, muhtaram Prezidentimiz taʼbiri bilan aytganda: "ozod va obod Vatan!”. Ortimizda ulgʻayib kamolga yetayotgan farzandlarimiz esa ana shu buyuk Vatanning vorislaridir.

Rashidjon YOʻLDOShEV,

"Choykoʻl” O.F.Y raisi.