Эл-юртда иззатли ўғлон

Ота-оналар фарзандларига меҳр билан шундай таъриф берадилар:

– Ўнта бўлса ўрни, қирқта бўлса қилиғи бошқа!

Туманимизнинг “Боғ” маҳалласида истиқомат қилувчи Давлатбой оға Ўринов ҳамда Жамила опа Жуманиёзоваларнинг аҳил ва тотув оиласида вояга етган беш нафар фарзанд ҳам ўз дунёлари, орзу-интилишлари билан овул-элда, оилада бири-биридан ажралиб турувчи фазилатлари туфайли ҳурматга муносиб инсонлар сифатида танилдилар.

Айниқса, оиланинг тўнғичи Даврон ўзининг қатъиятлилиги, эпчиллиги ва уддабуронлиги билан бошқалардан ажралиб турарди.

У 1995 йилда овулдаги 13-сонли мактабни аъло баҳоларга тугатди. Икки йил давомида овулда оддий ишчи бўлиб ишлади. 1997 йилда у Самарқанд Олий ҳарбий Автомобиль қўшинлари қўмондонлик билим юртининг озиқ-овқат таъминоти тактик қўмондонлик мутахассислиги бўйича ўқишга кирди. Билим юртини 2001 йилда муваффақиятли тамомлаган Даврон Ўринов учун орзусидаги жанговар ҳаёт бошланди. Илк ҳарбий фаолиятини Сурхондарё вилоятидаги ҳарбий қисмлардан бирида ҳарбий қисм озиқ-овқат ва кийим-кечак таъминоти хизмати бошлиғи лавозимида ишлашдан бошлаган Даврон Ўринов йиллар давомида мамлакатимизнинг турли ҳудудларидаги ҳарбий қисмларда фидойилик билан иш юритди. Оддий аскардан тортиб, қисм қўмондонлиги зобит ва мутахассисларининг экологик тоза, соғлом овқатланишлари учун жон куйдирди.

У қаерда, қандай вазифада хизмат қилмасин, доимий ҳамроҳи – умр йўлдоши Ферузахон Қурбонова билан биргаликда қурган оила қўрғонининг чинакам ғамхўри бўлди. Олий маълумотли ўзбек тили ва адабиёти фани ўқитувчиси, ҳозирги кунда туман хотин-қизлар қўмитаси мутухассиси бўлган Ферузахон Қурбонова билан жажжи фарзанди Турсунойнинг келажаги учун оилапарвар ота бўлди.

– Ҳарбий зобитнинг рафиқаси бўлиш осон эмас, – дейди Даврон Ўринов. – Pўзғор қанчалик яхши таъминлангани билан оилада отанинг ўрни баъзан ярим тунгача, баъзан тонггача бўш турса, фарзандлар “тиқ” этса, эшикдан кўзини узмай кутиб, ухлаб қолишса-ю, аёлингиз то Сиз келгунингизча бедор кутса. Бунинг учун аёлга мислсиз сабр-бардош, матонат керак бўлади. Шуларни ўйласам, Ферузахон ҳам ҳарбийлардан кам эмас, дейман.

Айни пайтда заҳирадаги зобит Д.Ўринов 2015 йилдан бери туман Мудофаа бўлимининг сафарбарлик чақирув резерви хизмати бўлими бошлиғи вазифасида фаолият юритмоқда.

Ўзининг билими ва тажрибаларини ёшларга ўргатиш баробарида туманимизнинг ўқув муассасаларида, маҳаллаларда ўтказиладиган “Мардлик ва жасорат” дарсларида, давра суҳбатларида миллий Армиямиз қудрати, замонавий ҳарбий техника ва технологиялар хусусида сўзлаб беради.

– Ҳарбий хизматчининг оиласи – она Ватани, – дейди Даврон Ўринов. – Унинг ана шу оиласи осойишта бўлса, фарзандлари ва рафиқаси бахтиёр, эл-юрти тинч Биз Даврон Ўринов ва унинг оиласини 14 январь – Ватан ҳимоячилари куни билан чин дилдан табриклаймиз. Барчамиз учун азиз ва муқаддас ягона оила – она Ўзбекистонимиз ҳамиша тинч ва осойишта тараққий этишида ҳамиша камарбаста ўғлонларимиз омон бўлсин!

Pобия Йўлдошева.