El-yurtda izzatli oʻgʻlon

Ota-onalar farzandlariga mehr bilan shunday taʼrif beradilar:

– Oʻnta boʻlsa oʻrni, qirqta boʻlsa qiligʻi boshqa!

Tumanimizning “Bogʻ” mahallasida istiqomat qiluvchi Davlatboy ogʻa Oʻrinov hamda Jamila opa Jumaniyozovalarning ahil va totuv oilasida voyaga yetgan besh nafar farzand ham oʻz dunyolari, orzu-intilishlari bilan ovul-elda, oilada biri-biridan ajralib turuvchi fazilatlari tufayli hurmatga munosib insonlar sifatida tanildilar.

Ayniqsa, oilaning toʻngʻichi Davron oʻzining qatʼiyatliligi, epchilligi va uddaburonligi bilan boshqalardan ajralib turardi.

U 1995-yilda ovuldagi 13-sonli maktabni aʼlo baholarga tugatdi. Ikki yil davomida ovulda oddiy ishchi boʻlib ishladi. 1997-yilda u Samarqand Oliy harbiy Avtomobil qoʻshinlari qoʻmondonlik bilim yurtining oziq-ovqat taʼminoti taktik qoʻmondonlik mutaxassisligi boʻyicha oʻqishga kirdi. Bilim yurtini 2001-yilda muvaffaqiyatli tamomlagan Davron Oʻrinov uchun orzusidagi jangovar hayot boshlandi. Ilk harbiy faoliyatini Surxondaryo viloyatidagi harbiy qismlardan birida harbiy qism oziq-ovqat va kiyim-kechak taʼminoti xizmati boshligʻi lavozimida ishlashdan boshlagan Davron Oʻrinov yillar davomida mamlakatimizning turli hududlaridagi harbiy qismlarda fidoyilik bilan ish yuritdi. Oddiy askardan tortib, qism qoʻmondonligi zobit va mutaxassislarining ekologik toza, sogʻlom ovqatlanishlari uchun jon kuydirdi.

U qayerda, qanday vazifada xizmat qilmasin, doimiy hamrohi – umr yoʻldoshi Feruzaxon Qurbonova bilan birgalikda qurgan oila qoʻrgʻonining chinakam gʻamxoʻri boʻldi. Oliy maʼlumotli oʻzbek tili va adabiyoti fani oʻqituvchisi, hozirgi kunda tuman xotin-qizlar qoʻmitasi mutuxassisi boʻlgan Feruzaxon Qurbonova bilan jajji farzandi Tursunoyning kelajagi uchun oilaparvar ota boʻldi.

– Harbiy zobitning rafiqasi boʻlish oson emas, – deydi Davron Oʻrinov. – Poʻzgʻor qanchalik yaxshi taʼminlangani bilan oilada otaning oʻrni baʼzan yarim tungacha, baʼzan tonggacha boʻsh tursa, farzandlar “tiq” etsa, eshikdan koʻzini uzmay kutib, uxlab qolishsa-yu, ayolingiz to Siz kelguningizcha bedor kutsa. Buning uchun ayolga mislsiz sabr-bardosh, matonat kerak boʻladi. Shularni oʻylasam, Feruzaxon ham harbiylardan kam emas, deyman.

Ayni paytda zahiradagi zobit D.Oʻrinov 2015-yildan beri tuman Mudofaa boʻlimining safarbarlik chaqiruv rezervi xizmati boʻlimi boshligʻi vazifasida faoliyat yuritmoqda.

Oʻzining bilimi va tajribalarini yoshlarga oʻrgatish barobarida tumanimizning oʻquv muassasalarida, mahallalarda oʻtkaziladigan “Mardlik va jasorat” darslarida, davra suhbatlarida milliy Armiyamiz qudrati, zamonaviy harbiy texnika va texnologiyalar xususida soʻzlab beradi.

– Harbiy xizmatchining oilasi – ona Vatani, – deydi Davron Oʻrinov. – Uning ana shu oilasi osoyishta boʻlsa, farzandlari va rafiqasi baxtiyor, el-yurti tinch Biz Davron Oʻrinov va uning oilasini 14-yanvar – Vatan himoyachilari kuni bilan chin dildan tabriklaymiz. Barchamiz uchun aziz va muqaddas yagona oila – ona Oʻzbekistonimiz hamisha tinch va osoyishta taraqqiy etishida hamisha kamarbasta oʻgʻlonlarimiz omon boʻlsin!

Pobiya Yoʻldosheva.