ЭЛ ЁДИДА БАРҲАЁТ ИНСОН

Инсон умри давомида умум манфаати йўлида меҳнат қилса, ҳалол яшаб, ўзидан яхши ном қолдирса, хизматларини эл эътироф этса, қандай яхши! Ахир инсон умри узун ё қисқалиги билан эмас, балки мазмуни билан ўлчанади. Шунинг учун ҳам ҳаётда эзгу ишлар қилиб яшамоқ лозим.

“Ёмон ҳам ўтар, яхши ҳам бил,

Сени яхши ном бирла ёд этсин эл”, деб ёзган эди Саъдий.

Туманимизнинг Куюк кўпир овули таркибидаги Қизилчоли маҳалласида дунёга келиб, қисқа умри давомида ўзидан ёрқин хотиралар қолдиришга эришган Нурулла Ўтаганов ҳам амалга оширган эзгу ишлари билан барҳаёт.

У 1956 йилда туғилди. Ўрта мактабни тамомлаб, Тошкент Автомобиль йўллари институтига ўқишга кирди ва 1979 йилда муваффақиятли тугатиб, йўл қурилиши муҳандиси ихтисослигига эга бўлиб туманимизга қайтди. 1979-1980 йилларда туман автомобиль йўллари устаси, 1980-1983 йилларда туман магистрал йўлларни таъмирлаш бўйича участка бошлиғи, 1983-1987 йилларда туман автомобиль йўл қурилиш участкаси бош инженери, 1987-1992 йилларда туман йўл қурилиш бошқармаси бошлиғи, 1993-2007 йилларда туман магистрал йўлларни таъмирлаш бўйича участка бошлиғи, 2007-2009 йилларда туман автомобиль йўл қурилиш участкаси бош инженери бўлиб ишлади.

У қандай лавозимда бўлсада, ўзига топширилган вазифани сидқидилдан адо этишга интилди, ўз фикрига эга мутахассис, қўл остидаги ишчи-хизматчиларга ғамхўр раҳбар эди.

Нурулла Ўтаганов ўтган асрнинг саксонинчи-тўқсонинчи йилларида таъмирланиши режага киритилаётган йўлларнинг тўғриланиши лозим бўлган жойларини кўрсатиб, мутахассис сифатида бу ишнинг амалга оширилиши аҳамиятини исботлаб берган. Бироқ ўша вақтда пахта яккаҳокимлиги авж олгани сабаб, айрим йўлларни тўғрилаш пахта далаларига тўғри келгани учун рад этилган, айрим таклифлари инобатга олиниб, йўллардаги кескин бурилишлар тўғриланган ва автотранспорт воситаларининг меъёрда ҳаракатланиши учун шароит яратилган.

У ўз касбининг билимдони ва жонкуяри эди. Эл ишончини қозониб, халқ депутатлари туман Кенгашига депутат бўлиб ҳам сайланган. Турмуш ўртоғи Энажон Шомуродова билан икки ўғил, уч қиз кўриб, элга муносиб қилиб тарбиялашга интилди, тўнғич қизи олий маълумотли ўқитувчи бўлиб, катта ўғли ўзининг соҳаси бўйича энди иш бошлаган кезларда, 2009 йилда касаллик туфайли вафот этди.

Бугун Нурулла Ўтаганов орамизда йўқ. Бироқ, бутун эл уни юртнинг бир жонкуяр ва меҳнаткаш ўғлони сифатида ёд этади, унутмайди.

Ойгул РАЖАБОВА.