Ёнғинга қарши курашиш жамияти томонидан аҳоли ва ижтимоий объектларга 62 млн. сўмлик хизмат кўрсатилди

Қишнинг совуқ кунларида аҳоли иситиш мосламаларидан кўп фойдаланади. Хонадон ва бошқа объектларни иситишда электр асбоблари, табиий газ тармоқлари ёки ёқилғининг бошқа турлари ишлатилади. Лекин, электр иситиш асбоблари, печлар, табиий газ тармоқларининг соз ёки носозлигига доим ҳам жиддий эътибор қилинмайди. Айниқса, мўрикон ва дудбуронларни мунтазам текшириш лозимлигига кўп ҳолларда аҳамият берилмайди. Иситиш мосламаларига доим зарурат сезиладиган қиш мавсумида  ана шундай эҳтиётсизлик натижасида хавфли ҳодисалар содир бўлади. Афсуски, бундай ҳодисалар туфайли кўпинча инсонларнинг ҳаёти хавф остида қолади.

Ўзбекистон Ёнғинга қарши курашиш жамиятининг туман ҳудудий бўлинмаси ходимлари томонидан ушбу ҳолатларнинг келиб чиқиш сабаблари ва манбалари ўрганилиб, таҳлил қилинганида фуқароларнинг табиий газдан нотўғри фойдаланиши, назоратсиз қолдириши сабабли рўй бераётгани аниқланмоқда. Бундай эътиборсизликлар оқибатида қанча оилаларнинг ҳаёти хавф остида қолиб, бевақт ўлим ҳолатлари ҳам содир бўмоқда. Шунинг учун хонадонларимизда фойдаланиладиган табиий газ, кўмир ва бошқаларни ишлатганда доим хавфсизлик чораларини кўриш лозим. Табиий ва ис газидан заҳарланишининг олдини олиш тадбирлари нафақат мутассади ташкилот, идоралар томонидан, балки ҳар бир хонадон эгалари ва барча фуқаролар томонидан амалга оширилса куз-қиш мавсуми талофатсиз ўтади.

Ёнғинга қарши курашиш жамиятининг туман ҳудудий бўлинмаси томонидан  аҳоли хонадонлари ва ижтимоий объектлардаги иситиш мосламаларининг соз-носозлиги, куз-қиш мавсумига тайёрлиги кўрикдан ўтказилади.Туман ҳудудида овул ва маҳаллалардаги аҳоли хонадонларида, ижтимоий объектларда жамият назоратчилари Т.Алланиёзов, Н.Матирзаев, Ж.Атажонов, М.Раҳимов, Э.Атажонов, А.Тўрабоевлар хизмат кўрсатади.  Шу пайтга қадар 8 минг хонадонга эслатма, 3 минг хонадонга эса плакатлар тарқатилди.  Жамият томонидан ўтказиладиган кўрик пуллик бўлиб, ўтган 9 ой давомида кўрсатилган хизмат 62 млн.сўмдан зиёд бўлди. Шундан аҳоли хонадонларига 22 млн. сўмлик, ижтимоий объектларга 40 млн. сўмлик хизмат кўрсатилди.   

Айни кунларда Ўзбекистон Ёнғинга қарши курашиш жамиятининг туман ҳудудий бўлинмаси ходимлари томонидан хонадонларда пуллик асосда газ жиҳозларини кўрикдан ўтказиш, созлаш, мўриконларни ва дудбўронларни тозалаш ишлари амалга оширилмоқда. Ундан ташқари, шартнома асосида корхона-ташкилотлар бинолари учун бирламчи ўт ўчириш инвентарлари, жиҳозлар ҳам берилади. Агар Сиз ҳам бу хизматга эҳтиёж сезсангиз, жамиятнинг 93 619 97 79 рақамли телефонига қўнғироқ қилиб, буюртма беришингиз мумкин. Шу ўринда барча юртдошларимизни газдан заҳарланиш ва чақнаш билан боғлиқ фавқулодда вазиятларнинг олдини олишда огоҳлик ва фаолликка чақирамиз.

 Турсунбой Мадраҳимов,Ёнғинга қарши кураш жамияти туман ҳудудий бўлинмаси раиси.