ЎҒРИЛИК ФАОЛИЯТИГА ЧЕК ҚЎЙИЛДИ

Орамизда шундай инсонлар ҳам борки, улар ҳалол меҳнат билан эмас, балки енгил-елпи, нопок ҳаракатлар билан даромад топишни, ҳатто бойиб кетишни ҳам орзу қиладилар.

Ҳамюртимиз Расулов Сардор Баҳром ўғли (исм, фамилиялари ўзгартирилган) қирчиллама йигитлик ёшига етганида ҳам тенгқурлари қатори далада ёки корхона ва ташкилотларда меҳнат қилиб даромад топишни, шу йўл билан оиласини боқишни ният қилмади. Ётса ҳам, турса ҳам унинг хаёлида осонгина пул топиб, бойиб кетиш орзуси пайдо бўлди, холос. Мана шундай хунук орзу-ҳавас уни жиноят ботқоғига етаклади.

У қишлоқда яшаганлиги боис одамларнинг қорамоллари кундузи ҳам, тунда ҳам далада, экиндан бўшаган майдонларда боғлиқ туришини яхши биларди.

У дастлабки “фаолияти”ни 2017 йилнинг 25 июнь тонгида кўз остига олиб қўйгани – ҳамқишлоғи М.Холбоевнинг баҳоси 2 млн. 700 минг сўмлик бир бош қорамолини ўғирлаб Манғит мол бозорига етаклашдан бошлади. Бозорда у молни фуқаро И.Еримбетовга 1 млн. 400 минг сўмга “пуллади”.

Ўрганган кўнгил ўртанса ҳам қўймас, деганларидек, Сардор Расулов ўз “фаолияти”ни яна давом эттиришга қарор қилди ва 2017 йилнинг 3 сентябрь тонгида ҳамқишлоғи Қ.Матёқубовнинг баҳоси 2 млн. 500 минг сўм турадиган бир бош молини Манғит чорва бозорига етаклади.

Аммо бу қорамол Сардорнинг шум ниятини сезди шекилли, унга бўйсунмасдан қочиб кетишга муваффақ бўлди. Шундай қилиб бу гал Сардор ўз ниятига эриша олмади.

Орадан кўп ўтмай Сардор Расулов яна “ов”га чиқди. У 2017 йилнинг 7 сентябрь тонгида яна бир ҳамқишлоғи А.Каримовга тегишли бўлган, баҳоси 1 млн. 500 минг сўмлик бир бош қорамолни Манғит мол бозорига етаклади. У бу молни фуқаро Х.Худоёровга бир миллион сўмга сотиб юборди.

“Кўза кунда эмас, кунида синади” деганлари ҳақ гап экан. Кунлардан бир куни ўғриликни ўзига касб қилиб олган Сардор Расуловнинг ғайриқонуний фаолиятига чек қўйилди. У ҳуқуқни муҳофаза қилиш органлари ходимлари томонидан ашёвий далиллар билан қўлга олинди.

Ўғирлик йўли билан даромад топиб, оиласини боқишни ва шу йўл билан бойиб кетишни орзу қилган Сардор Расуловнинг жиноят иши 2018 йилнинг 24 январь куни Жиноят ишлари бўйича туман судининг очиқ мажлисида кўриб чиқилди.

Жиноятга жазо муқаррар, дейишади. Шу боисдан ҳам суд фуқаро Расулов Сардор Баҳром ўғлининг жиноий ҳаракатларига муносиб баҳо берди.

З.ИДИЕТУЛЛАЕВ,

туман прокурорининг ёрдамчиси.