OʻGʻRILIK FAOLIYaTIGA ChEK QOʻYILDI

Oramizda shunday insonlar ham borki, ular halol mehnat bilan emas, balki yengil-yelpi, nopok harakatlar bilan daromad topishni, hatto boyib ketishni ham orzu qiladilar.

Hamyurtimiz Rasulov Sardor Bahrom oʻgʻli (ism, familiyalari oʻzgartirilgan) qirchillama yigitlik yoshiga yetganida ham tengqurlari qatori dalada yoki korxona va tashkilotlarda mehnat qilib daromad topishni, shu yoʻl bilan oilasini boqishni niyat qilmadi. Yotsa ham, tursa ham uning xayolida osongina pul topib, boyib ketish orzusi paydo boʻldi, xolos. Mana shunday xunuk orzu-havas uni jinoyat botqogʻiga yetakladi.

U qishloqda yashaganligi bois odamlarning qoramollari kunduzi ham, tunda ham dalada, ekindan boʻshagan maydonlarda bogʻliq turishini yaxshi bilardi.

U dastlabki “faoliyati”ni 2017-yilning 25-iyun tongida koʻz ostiga olib qoʻygani – hamqishlogʻi M.Xolboyevning bahosi 2 mln. 700 ming soʻmlik bir bosh qoramolini oʻgʻirlab Mangʻit mol bozoriga yetaklashdan boshladi. Bozorda u molni fuqaro I.Yerimbetovga 1 mln. 400 ming soʻmga “pulladi”.

Oʻrgangan koʻngil oʻrtansa ham qoʻymas, deganlaridek, Sardor Rasulov oʻz “faoliyati”ni yana davom ettirishga qaror qildi va 2017-yilning 3-sentyabr tongida hamqishlogʻi Q.Matyoqubovning bahosi 2 mln. 500 ming soʻm turadigan bir bosh molini Mangʻit chorva bozoriga yetakladi.

Ammo bu qoramol Sardorning shum niyatini sezdi shekilli, unga boʻysunmasdan qochib ketishga muvaffaq boʻldi. Shunday qilib bu gal Sardor oʻz niyatiga erisha olmadi.

Oradan koʻp oʻtmay Sardor Rasulov yana “ov”ga chiqdi. U 2017-yilning 7-sentyabr tongida yana bir hamqishlogʻi A.Karimovga tegishli boʻlgan, bahosi 1 mln. 500 ming soʻmlik bir bosh qoramolni Mangʻit mol bozoriga yetakladi. U bu molni fuqaro X.Xudoyorovga bir million soʻmga sotib yubordi.

“Koʻza kunda emas, kunida sinadi” deganlari haq gap ekan. Kunlardan bir kuni oʻgʻrilikni oʻziga kasb qilib olgan Sardor Rasulovning gʻayriqonuniy faoliyatiga chek qoʻyildi. U huquqni muhofaza qilish organlari xodimlari tomonidan ashyoviy dalillar bilan qoʻlga olindi.

Oʻgʻirlik yoʻli bilan daromad topib, oilasini boqishni va shu yoʻl bilan boyib ketishni orzu qilgan Sardor Rasulovning jinoyat ishi 2018-yilning 24-yanvar kuni Jinoyat ishlari boʻyicha tuman sudining ochiq majlisida koʻrib chiqildi.

Jinoyatga jazo muqarrar, deyishadi. Shu boisdan ham sud fuqaro Rasulov Sardor Bahrom oʻgʻlining jinoiy harakatlariga munosib baho berdi.

Z.IDIYeTULLAYeV,

tuman prokurorining yordamchisi.