MAHALLADA XAVFSIZ MUHIT: TUMAN IIB XODIMLARI OLDIGA YaNGI VAZIFALAR QOʻYILDI
Mamlakatimizda “Xavfsiz mahalla” tamoyili asosida amalga oshirilayotgan islohotlar jinoyatchilikni jilovlash va huquqbuzarliklarning barvaqt oldini olishda oʻzining yuksak samarasini bermoqda. Joriy yilning ilk kunlarida qabul qilingan Prezident qarorlari esa soha xodimlari zimmasiga yangi va masʼuliyatli vazifalarni yukladi. Shu munosabat bilan, 2026-yil 10-yanvar kuni Amudaryo tumani Ichki ishlar boʻlimida shaxsiy tarkib uchun muhim oʻquv-amaliy seminari tashkil etildi.
Tadbirda Qoraqalpogʻiston Respublikasi Ichki ishlar vazirligidan tashrif buyurgan ishchi guruh aʼzolari — podpolkovnik Jaqsibay Patullayev va kapitan Bekmurza Abdurashidov, shuningdek, Amudaryo tumani Ichki ishlar boʻlimi boshligʻi oʻrinbosarlari — podpolkovnik Sharapat Joldasbayev va Umid Urazaliyev ishtirok etdilar.
Seminarning asosiy mavzusi Oʻzbekiston Respublikasi Prezidentining 2025-yil 3-yanvardagi “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi hamda 2026-yil 5-yanvardagi “Respublika mahallalarida xavfsiz muhitni yaratish yoʻnalishida yaxlit manzilli ishlash tizimini joriy etishga qaratilgan qoʻshimcha chora-tadbirlar toʻgʻrisida”gi qarorlarining mazmun-mohiyatini oʻrganishga qaratildi.
Maʼruzachilar taʼkidlaganidek, 2025-yil 3-yanvardagi qaror asosida oʻtgan yil davomida keng koʻlamli ishlar amalga oshirildi. Natijada mahallalarda jinoyatchilikni qariyb 1,5 baravarga qisqartirishga erishildi. Bu raqamlar tizimning toʻgʻri yoʻlga qoʻyilganidan dalolat beradi.
Yangi qabul qilingan qaror oʻtgan yilgi islohotlarning mantiqiy davomi hisoblanadi. Endilikda asosiy eʼtibor Respublika mahallalarida xavfsiz muhitni yaratish yoʻnalishida yaxlit manzilli ishlash tizimini joriy etishga qaratiladi. Bu — har bir mahallaning oʻziga xos xususiyatidan kelib chiqib, "qizil", "sariq" va "yashil" toifalarga ajratgan holda, jinoyatchilik omillarini bartaraf etish demakdir.
Oʻquv seminarida ichki ishlar organlari xodimlariga ushbu qarorlar talablaridan kelib chiqadigan aniq vazifalar tushuntirildi. Xususan, fuqarolarning huquq va erkinliklarini ishonchli himoya qilish, nizoli oilalar va huquqbuzarlik sodir etishga moyil shaxslar bilan individual ishlash, jamoat tartibini saqlashda zamonaviy texnologiyalardan va jamoatchilik yordamidan samarali foydalanish masalalariga urgʻu berildi.
Tadbir faqat maʼruza shaklida emas, balki qizgʻin savol-javob tarzida oʻtdi. Ichki ishlar boʻlimi xodimlari xizmat faoliyati davomida duch kelayotgan muammoli vaziyatlar yuzasidan Respublika Ichki ishlar vazirligi vakillariga savollar bilan murojaat qildilar. Mutaxassislar tomonidan har bir savolga atroflicha javob berilib, kelgusida yuzaga kelishi mumkin boʻlgan nostandart vaziyatlarda qanday harakatlanish boʻyicha aniq uslubiy koʻrsatmalar berildi.
Xulosa oʻrnida aytish mumkinki, Amudaryo tumani IIBda oʻtkazilgan ushbu seminar xodimlarning kasbiy malakasini oshirish, yangi qonunchilik hujjatlarini amaliyotga toʻgʻri tatbiq etish va pirovardida tuman aholisining tinchligini taʼminlashda muhim qadam boʻldi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
