ХАЛҚИМИЗ БУГУНИДАН РОЗИ, ЭРТАНГИ КУНИГА ИШОНЧИ БАЛАНД

Мен ҳар куни қадим Қипчоқ шаҳарчамиз кўчалари бўйлаб ишга борарканман, кун сайин қиёфаси ўзгариб бораётган қадрдон маконга боқиб, кўнглим яшнаб кетади. “Обод қишлоқ” дастури доирасида амалга оширилаётган кенг кўламли ободонлаштириш, қурилиш-таъмирлаш ишлари ҳақиқатдан ҳам шаҳарчамиз чиройини очиб юбораяпти.

Шундоқ катта гузар йўл бўйида қад ростлаётган маиший хизмат кўрсатиш мажмуалари, пиёдалар учун йўлаклар – ҳамма-ҳаммаси юртимиздаги тинчлик-осойишталик шарофатидан!

Жуда қисқа фурсат ичида шаҳарча марказидаги 11-сонли умумтаълим мактаби биноси тўлиқ жорий таъмирланди ва янги ўқув йилига тахт қилиб қўйилди.

Айниқса, аҳоли 2-сонли МТМ учун бўш турган ҚВП биноси реконструкция қилиб берилганидан мамнун. Чунки 1938 йилда қурилган 2-сонли МТМ биноси анчайин эскириб, яроқсиз ҳолатга келиб қолган эди. ҚВП биносида реконструкция ишлари учун 1 млрд. 217 млн. сўмлик маблағ сарфланди ва 150 ўринли замонавий МТМ биноси болажонлар ихтиёрига берилди.

Шаҳарчамизда икки қаватли маиший хизмат кўрсатиш мажмуасининг барпо этилиши барчанинг кўнглидаги иш бўлди. Тадбиркор Шароф Ҳайитбоев томонидан бунёд этилаётган тикувчилик цехи, Баҳодир Собиров ташкил этган хусусий дорихона, Даврон Эшмуродовнинг бизнес-режаси асосида қурилаётган мини маркет шаҳарчамиз кўркига-кўрк қўшиб турибди.

Дастур доирасида кам таъминланган 7 та оилага уй-жойларини таъмирлашда беғараз ёрдам берилди. 28 оилага эса уй-жой қуриш учун ер майдонлари ажратилди.

Шаҳарчамизнинг ички кўчаларига тош-шағал ётқизилганидан аҳоли мамнун. Бундан ташқари, аҳолини электр энергияси билан таъминлашдаги камчиликлар ҳам бартараф этилди. 2 та янги трансформатор ўрнатилиб, қолганлари тўлиқ таъмирланди ва замонавий электр узатиш кабеллари тортилди.

Аҳолини тоза ичимлик суви билан таъминлаш мақсадида 33 метр чуқурликдан сув чиқариб берувчи артезиан қудуқлари қурилиб, сув тозалаб берувчи агрегатлар ўрнатилди.

Шаҳарча фуқаролар йиғини ҳам ўз офисига эга бўлди. Аввал почта-алоқа бўлими жойлашган бино қайта таъмирланиб, ШФЙ маъмурияти офисига айлантирилди.

Хуллас, шаҳарчамиз кун сайин гўзаллашиб, обод ва фаровон гўшага айланмоқда. Бунёдкорлик ишлари эса ҳамон давом этаётир. Ўз ҳаётидан, турмуш тарзидан рози бўлган халқ бунёдкорлик ишларига бел боғлайди, ота маконини, қадами етган манзилларни обод этади. Демак, халқимиз бугунидан рози, эртанги кунига ишончи баланд, орзулари юксак.

Нураддин ХОЛБОЕВ, Қипчоқ ШФЙ раиси.