Хотира ва қадрлаш кунига бағишланган оммавий спорт тадбирлари ўтказилди

Юртимизда ҳар йили кенг нишонланадиган 9 май — Хотира ва қадрлаш куни нафақат ўтганларни хотирлаш, уларнинг жасорати олдида бош эгиш, балки бугунги тинч, эркин ва осойишта ҳаётимизнинг қадрига етиш, шу билан бирга, келажак эгалари бўлмиш ёшларни соғлом ва баркамол қилиб тарбиялаш мақсадларини ҳам ўз ичига олади. 8 май куни Амударё туманида ҳам шу мақсадда оммавий спорт тадбирлари бўлиб ўтди.

Туман ҳокимлиги ҳамда туман Спорт мактабининг ўзаро ҳамкорлигида ташкил этилган мазкур спорт байрами аҳоли, хусусан, ёшлар ўртасида соғлом турмуш тарзини кенг тарғиб қилиш, уларнинг бўш вақтларини мазмунли ўтказиш ва байрам шукуҳини янада оширишдек олижаноб мақсадларга хизмат қилди. Ушбу оммавий мусобақа доирасида иштирокчилар спортнинг веломарафон ҳамда енгил атлетика турлари бўйича ўз куч, тезлик ва имкониятларини синовдан ўтказдилар.

Спорт беллашувларида умумий ҳисобда 200 дан ортиқ маҳалла ёшлари фаол иштирок этиб, ўзларининг мустаҳкам иродаси, жисмоний тайёргарлиги ва ғалабага бўлган чексиз интилишларини намойиш этишди. Мусобақа нафақат спорт беллашуви, балки чинакам дўстлик ва саломатлик байрамига айланиб кетди.

Тадбир давомида иштирокчиларнинг хавфсизлиги, тиббий муҳофазаси ва саломатлигини таъминлаш масаласига ҳам ташкилотчилар томонидан катта этибор қаратилди. Хусусан, Амударё тумани тиббиёт бирлашмасининг махсус тез тиббий ёрдам машиналари ва малакали ҳамширалари бутун тадбир давомида шай ҳолатда, ҳушёр турди. Шунингдек, туман Ички ишлар бўлими ходимларининг бевосита назорати остида жамоат тартиби ва ҳаракат хавфсизлиги таъминланиб, беллашувларнинг юқори суръатда, ҳеч қандай нохуш ҳолатларсиз ўтишига эришилди.

Жуда қизғин ва муросасиз кечган баҳслар якунига кўра турли йўналишлар бўйича ғолиблар аниқланди. Енгил атлетика йўналишида эркаклар ўртасида кечган шиддатли баҳсда Азамат Ўрозбоев марра чизиғини ҳаммадан олдин кесиб ўтиб, фахрли 1-ўринни қўлга киритди. Ундан кейинги натижаларни эса Диёрбек Шомуратов ва Алибек Ўразметовлар банд этишди. Қизлар ўртасидаги енгил атлетика мусобақасида Ойбек маҳалласидан ташриф буюрган Динора Озодова барча рақибларини ортда қолдириб, 1-ўринга сазовор бўлди. Амир Темур номли овул вакили Товус Муротбоева 2-ўринни, Холимбег овулидан келган Барчиной Зарипбоева эса 3-ўринни эгаллади.

Веломарафон баҳсларида эса Навоий маҳалласи вакили Аҳмад Ўрозбоев энг тезкор натижа қайд этиб, 1-ўринни эгаллаган бўлса, Олмазор маҳалласи шарафини ҳимоя қилган Жавоҳир Мақсетов ҳамда Бунёд Баҳодировлар мос равишда 2 ва 3-ўринларга лойиқ деб топилди ва шоҳсупага кўтарилди.

Ташкилотчилар томонидан нафақат ғолиблар, балки ўзларининг фаоллиги билан бошқаларга ўрнак бўлган қатнашчилар ҳам муносиб эътироф этилди. Жумладан, Холимбег овулидан Жавоҳир Йўлдошев ва Ўрта қалъа овулидан Бобур Жумабоевлар мусобақанинг энг ёши кичик иштирокчилари сифатида алоҳида эътиборга тушди ва рағбатлантирилди. Шунингдек, Ҳайтибой Човдиров веломарафон бўйича, Руфат Бабажанов эса енгил атлетика бўйича “Энг ёши катта иштирокчи” номинацияларига муносиб кўрилди.

9 май — Хотира ва қадрлаш кунига бағишлаб ўтказилган мазкур спорт тадбири туман аҳолисининг жисмоний тайёргарлиги ва соғлом турмуш тарзига бўлган меҳрини намойиш этиш билан бирга, улар қалбида ватанпарварлик, ўзаро оқибат, ҳурмат ва миллий анъаналаримизга бўлган садоқат туйғуларини янада мустаҳкамлашга хизмат қилди. Бу каби кенг қамровли оммавий тадбирлар аҳоли саломатлигини мустаҳкамлабгина қолмай, жамиятимизда соғлом турмуш тарзини қарор топтиришдек энг муҳим вазифани бажариши билан ҳам беқиёс аҳамиятга эгадир.