ЯХШИЛИК ЙЎЛИ

Орамизда шундай одамлар борки, бутун умрини эзгуликка, яхшиликка, маърифат-у зиёга, илмга бағишлайдилар. Бундай инсонларни биз устозлар, дея яхши кўрамиз, суҳбатларини соғиниб яшаймиз. Ҳар сафар устозим Саъдулла ака хонадонига ташриф буюрар эканман, мен бу инсонни доимо ўз кутубхонасида китоб мутолаа қилаётган пайтларида учратаман.

– Мана шу китоблар бутун умрим давомида йиққан менинг давлатим, – дейди ғурур билан устоз.

Баъзи одамлар пулнинг кетидан эртадан то кечгача югуриб юрсалар, Саъдулла ака адабиётнинг, маънавиятнинг оламида юриб, ўзини энг бадавлат инсон ҳисоблайдилар.

Саъдулла аканинг бугунги кунда илм йўлида изланишлар олиб бораётган қизи Ҳулкарой Хўжаниёзова ҳам маънавият фидойиларидан. Ҳулкаройнинг ўқитувчилар учун “Диктантлар тўплами” ва “Қизиқарли она тили” деб номланган китоблари нашрдан чиқди. Ҳозирги кунда она тили ва адабиёт фани ўқитувчилари бу китоблардан самарали фойдаланаяптилар.

Бу оилада ҳамма ўғил-у қизлар илмга ташна. Айниқса, устознинг неваралари бири-биридан ақлли, зукко, билимдон.

Саъдулла ака бағри кенг, олижаноб инсон. У хонадонига ташриф буюрувчи кишиларга қўлидан келган яхшилигини аямайди.

– Яхшилик – умр безаги, – дейди устоз.

Кимдир ноҳақликка дуч келса, яна кимдир янги иш бошлаётган бўлса, устоз маслаҳати ва дуоларини олишга шошилади. Саъдулла ака Хўжаниёзов эса барчага бирдай меҳр-оқибат кўрсатишга ошиқади. Чунки яхшилик ила умр йўлини безаб яшашга одатланган устознинг кўнгли ҳам, хонадони ҳам ҳамиша яхшилар учун очиқдир.

Умрининг қирқ икки йилини туманимиз ойнаси – “Тараққиёт кўзгуси” (аввалги “Амударё ҳақиқати”) газетасига бағишлаган, энг қийин даврларда ҳам сабр ва матонат билан халққа маърифат улашган Саъдулла ака 70 ёшдан ошса ҳамки, сира тиниб-тинчимайдилар. Шогирдлар даврасида мушоиралар, адабий кечалар ташкил қилиб, мамлакатимиз келажаги бўлган ёшларга йўл-йўриқлар кўрсатади.

Мен бир шогирд сифатида устозга янада баракали ижод, узоқ умр тилайман!

Зуҳра АҲМЕДОВА.