ЎЗБЕКИСТОН – ОЗОД ВА ОБОД УЙИМИЗ
Тотувлик – миллатларни бирбирига суйгун, элатларни гулгун қилувчи туйғу. Тотувлик бор жойда қут-барака, файз, тинчлик ва аҳиллик, меҳр-оқибат, тараққиёт бўлади. Кўнгилларни роҳат-фароғат қучади. Роҳат-фароғатга етишган дилларда фақат эзгулик туғилади. Шунинг учун ҳам Ўзбекистондай жаннатмакон юртни ўзларига Ватан қилган 136 та миллат вакилларининг барчаси бир-бирига дўст, иноқ, бир-бирлари ила томирлари туташ. Бу томирлар меҳр-оқибатдан, қон-қардошлик тафтидан куч олади. Ана шу кучдир мамлакатимизда дилларни, тилларни, миллатларни бир-бирига эл қилган!
Бугунги Ўзбекистон мактабларида дарслар 7 тилда олиб борилади. 10 тилда телевидение кўрсатувлари намойиш этилиб, радио эшиттиришлар эфирга узатилади. 100 га яқин миллий-маданий марказлар фаолият олиб боради. Салкам 1,5 миллиардга яқин аҳоли истиқомат қилаётган Хитойдек ривожланган мамлакатда 52 миллат вакиллари яшаркан. Эътибор беринг: бизнинг 33 миллионлик халқи бор Ўзбекистонимизда эса 136 та миллат вакиллари ўзаро ҳамжиҳатликда, мамлакат иқболи учун фидойи меҳнат қиладилар ва тотув яшайдилар. Демак, мамлакатимизда яшаётган барча миллат вакилларининг Ўзбекистонни ўзларига Ватан қилишлари учун мустаҳкам ва ишончли асослари бор. Бу – худди эт билан тирноқни бир-биридан ажратиб бўлмагани каби, халқимизни бир-бирлари ила мустаҳкам жипслаштириб турган ўзаро ҳурмат-иззат, меҳр-оқибат, тотувлик ва бағрикенглик илдизларининг теранлигидир.
Иккинчи жаҳон уруши йилларини бир эсланг-а! Уруш бошланишидан сал олдин фақат Ўзбекистоннинг ўзидан 100 мингдан зиёд бегуноҳ кишилар қатағон қилинди. 13 минг нафар айбсиз айбдорлар “халқ душмани” сифатида отувга ҳукм этилди. Дунё қалқиб турган бир вазиятда, бир миллатни иккинчи миллатга гиж-гижлаш авжига чиққан, эл-у юртлардан ҳамжиҳатлик, меҳр-оқибат кўтарилган бир пайтда, машъум уруш туфайли миллионлаб кишилар уруш олови ичра қолганда Ўзбекистон барча миллат болаларига қучоғин кенг очди. Уруш, хўрлик, жабр-ситам ўзбек халқининг бағрикенглик хислатини, илдизлари теран тотувлик неъматини сидириб ташлай олмади. Биргина ўзбек оиласи – Баҳрихон ая ва Шоаҳмад ота Шомаҳмудовлар бағрига олган ўндан ортиқ миллат болалари бир қозондан таом еб, ўзбекнинг қуроқ кўрпасида ухлаб, ором олдилар.
Академик шоир Ғафур Ғулом бобомиз: “Сен етим эмассан, тинчлан жигарим!” дея дунёга ўзбекнинг ўз сўзи билан бонг урди, тотувлик ва бағрикенглик туғини баланд тутди. Ҳали-ҳануз уруш йилларида ўзбек хонадонларидан паноҳ топиб, ўзбекнинг тузини ичиб, меҳридан баҳраманд бўлган “уруш болалари” Ўзбекистонга талпиниб туришларида ҳам тотувликнинг минг бир ҳикмати мужассам эмасми, азизлар!
Бу ҳикматлар моҳиятида улуғлик бор, ўзаро ҳурмат-иззат, юксак одамгарчилик, кўнгиллар кўнгилларга туташ, қонлар қоришиб, эт ва тирноқ каби узилмас риштага айланган қариндошлик бор унда! Этни тирноқдан ажратиб кўринг-чи! Ажратолмайсиз, жон-у жаҳонингиз зирқираб кетади оғриқдан. Ўзбекистонда 136 та миллат вакили бир-бирларисиз яшай олмайди: ҳар ўзбекнинг ҳеч бўлмаганда битта қозоқ қариндоши-қурдоши, тожик ё туркман ошнаси бўлгани каби бошқа миллат вакилларининг ҳам кўнглига яқин қон-қариндошлари бор. Бу – бизнинг мамлакат халқи учун энг улуғ қадрият – мазмун ва моҳиятида юксак инсонийлик фазилатларини мужассам этган тотувликнинг улуғ хислатидир!
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
