“БАРКАМОЛ АВЛОД” БОЛАЛАР МАРКАЗИ –ҚОРАҚАЛПОҒИСТОНДА ЭНГ НАМУНАЛИ МУАССАСА

Иқтидор ва қобилият ҳар бир инсонда болаликдан шаклланади. Бу хислатлар имконият ва муҳитга қараб ривожланади ва ўзини намоён қилади. Туманимиздаги “Баркамол авлод” болалар маркази болалардаги иқтидорни юзага чиқариб, қобилиятларини янада ривожлантиришлари учун имконият ва маҳорат мактаби вазифасини ўтамоқда.

Марказда “Бадиий ижодиёт”, “Техник ижодиёт”, “Ўлкашунослик ва экология” ҳамда “Чет тили” йўналишлари бўйича ташкил этилган тўгаракларда ҳунар ўрганиб, билим олаётган болажонлар учун етарли шароит яратилган. Тўгараклар ўтказиладиган хоналар зарур жиҳозлар билан таъминланган.

– Ҳар бир тўгарак раҳбари ўз йўналиши бўйича тегишли услубий қўлланмалар тайёрлаб, машғулотларни асосан шу бўйича олиб боришади –, дейди марказ директори Хонимжон Ражабова. – Янги педагогик технологиялар асосида тайёрланган услубий қўлланмаларга ҳар ўқув йилида янги ўзгартиришлар киритиб борилади.

Ўқувчилардаги яширин истеъдодларни юзага чиқариб, уларнинг ўзига бўлган ишончини янада ошириш ва кўрсата билишга ўргатиш асосий вазифамиздир.

Бугунги кунда марказда ҳунар ўрганаётган болажонлар турли кўрик-танловларда иштирок этиб, катта ютуқларни қўлга киритишмоқда.

Марказдаги “Ёш эколог” тўгараги аъзоларидан ташкил топган “Амударё” жамоаси Тошкент шаҳрида ўтказилган “Болалар ва сув” экофестивалида фахрли 2-ўринни эгаллади. Тошкент шаҳрида ўтказилган “Экология болалар нигоҳида” экофестивалида “Карвинг” йўналиши бўйича иштирок этган марказ ўқувчиси Бекпошша Абдуллаева сертификат билан тақдирланди. Нукус шаҳрида ўтказилган “Варраклар сайли” мусобақасида иштирок этган ўқувчилардан Усмон Холмуродов 1-ўринни, Асадбек Ражабов 2-ўринни, Жаҳонгир Ҳайитбоев 3-ўринни эгаллади.

“Зарб” ёш доирачилар кўрик-танловининг Фарғона шаҳрида ўтказилган босқичида 9 нафар тўгарак аъзоларидан тузилган гуруҳ ўз маҳоратини кўрсатиб, фахрли 3-ўрин ғолиби бўлдилар. “Ёш журналист ва нотиқ” тўгараги аъзоси Ёрқиной Кенжабоева эса Нукус шаҳрида ўтказилган “Яшил сайёрамиз ўз қўлимизда” кўрик-танловининг Қорақалпоғистон босқичида 1-ўринни эгаллади.

Самарқанд шаҳрида ўтказилган “Йилнинг энг ёш ихтирочиси” кўрик-танловининг Республика босқичида иштирок этган Жаҳонгир Ҳайитбоев 3-ўрин ғолиблигини қўлга киритди. “Миллий рақслар” кўрик-танловининг Қорақалпоғистон босқичида қатнашган Гулираъно Ўринбоева якка ижро йўналиши бўйича 1-ўрин ғолиби бўлди ва танловнинг Республика босқичига йўлланма олди.

Янги истеъдод эгаларини кашф этиб келаётган “Баркамол авлод” болалар маркази бу йил Қорақалпоғистон Республикасида “Энг намунали “Баркамол авлод” болалар маркази” деб топилди. Айни кунларда марказда машғулот ўтиш учун яратилган шароитларни, тўгарак раҳбарларининг ўқувчилар билан ўтказадиган машғулотлари, тайёрланган услубий қўлланмаларини, ўқувчиларнинг ижодий ишларини барча туманлардаги “Баркамол авлод” болалар марказларига намуна қилиб кўрсатиш мақсадида кўргазмали семинар ўтказишга қизғин тайёргарлик кўрилмоқда.

О.ХУДОЙБЕРГАНОВА.