Эл дастурхонига ҳар йили 10 тоннадан ортиқ асал етказиб берилмоқда
Мустақиллик йилларида мамлакатимизда қишлоқ хўжалиги маҳсулотларини етиштиришга катта эътибор қаратилиб, озиқ-овқат хавфсизлигининг таъминланишига имконият яратилди.
Қишлоқ хўжалиги маҳсулотлари орасида етти хазинанинг бири ҳисобланган асал маҳсулотига шифобахш озуқа сифатида алоҳида эътибор берилади.
Менинг шу соҳани танлаб, халқимизни асал билан таъминлашга киришганимга салкам қирқ йил бўлаяпти. Шу касбга чин ихлос билан берилиб меҳнат қилишим бу соҳадаги тажрибамнинг кун сайин ошишига омил бўлаяпти. Айни кунгача хўжалигимизда боқилаётган асаларилар 1000 қутидан ошди. Шу боисдан ҳам бир йил давомида йиққан асалимиз 10-11 тоннани ташкил этаяпти.
Бугунги кунда бизнинг “Ўрта қалъа чорвадори” номли агрофирмамизда 15 киши меҳнат қилади.
Асаларичилик осон иш эмас. Бу ишнинг ўз машаққатлари ва қийинчиликлари бор. Шу сабабдан ҳам бу касбга алоҳида меҳр керак. Агар асалари боқишга эътиборсизлик билан ёндошадиган бўлсангиз, қанча асаларингиз бўлса ҳам ундан бир пасда ажралиб қолишингиз мумкин. Шу боисдан ҳам менинг Сийтимбат Отажонов, Файзулла Раҳимов ва Давлатбой Тўраев каби шогирдларим асалариларни боқишга алоҳида эътибор беришади. Натижада асалариларимиздан оладиган маҳсулотимиз миқдори йил сайин ошиб бораяпти. Шу сабабдан ҳам бу йил 5 тонна асални қўшни Туркманистон Республикасига экспорт қилишни режалаштирганмиз.
Ўзбекистон Республикаси Вазирлар Маҳкамасининг шу йил 14 январдаги 25-сонли қарорига асосан бизнинг “Ўрта қалъа чорвадори” агрофирмамизга Қорақалпоғистон Республикаси бўйлаб асалари уялари, рамкалари ва оиласи (пакети)ни етказиб бериш юзасидан кўрсатма берилган эди. Биз жорий йилнинг шу кунигача 480 дона асалари уяси, рамкалари ва оиласи (пакети)ни тайёрлаб, тумандаги ва Қорақалпоғистон Республикасининг Қораўзак, Чимбой ва Кегейли туманларидаги бир қанча ташкилотларга тарқатдик.
Биз асаларичиликни ривожлантириш орқали бу соҳа маҳсулотини кўпайтиришга ва асаларичилик билан шуғулланаётган субъектларга амалий ёрдамни кучайтиришга ҳаракат қиламиз.
Эркинбой РАСУЛОВ,
“Ўрта қалъа чорвадори” агрофирмаси раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
