ГАЗЕТА – ЭЛЛИК ЙИЛЛИК ҚАДРДОНИМ

Мен туманимиз ойнаси – “Амударё ҳақиқати” – бугунги “Тараққиёт кўзгуси” газетаси билан салкам 60 йилдан бери ошнаман. Чунки “Амударё ҳақиқати”нинг ҳақиқий мухлисига айланганимда 8-9 ёшли қизалоқ эдим.

Аввал мактабда, кейинчалик олий ўқув юртида таҳсил олган кезларимда ҳам туман газетасининг ҳар бир сонини алоҳида меҳр билан кутиб олардим. Талабалик йилларимда эса дўстларим, ота-онам почта конвертларида газетанинг янги сонларини жўнатиб турардилар.

Менинг илк мақолаларим ҳам 1960-70 йилларда туман газетаси орқали ёруғликка чиққан. Узоқ йиллар тумандаги қурилиш ташкилотларида қурувчи-муҳандис бўлиб ишладим. Ишда ҳам, ўқишда ҳам, ҳатто оила даврасида ҳам мен учун туман газетаси энг яқин дўст, маслаҳатгўй бўлиб келмоқда.

Мен газетанинг бундан 30-40, қўйингки, 10-15 йил олдинги қиёфаси билан бугунги салоҳиятини солиштириб кўриб, тўғриси, туманимизда мустақилликнинг сўнгги 8-10 йили давомида шиддаткор замон билан баравар тараққий этаётган, ҳатто ўз номи, халқимиз ҳаётида тутган ўрни билан туманимизнинг ҳақиқий “Тараққиёт кўзгуси”га айланиб улгурганидан қувониб кетаман. Ҳақиқатдан ҳам газета давр талаб қилган тараққиёт пиллапояларидан дадил юксалиб, бугунги замон тезкор матбуоти талаблари даражасидаги оммавий нашрга айланди.

Мен газетанинг деярли ҳар бир сонини севиб ўқийман ва газетанинг 50 йиллик обуначисиман. Шуни қувонч билан айтаманки, amunews.uz мустақил интернет нашрини ҳам интернет тармоғи орқали ўқиш, ўзим учун муҳим бўлган мавзулардаги мақолаларни юклаб олишнинг ҳам уддасидан чиқаман. Туман матбуоти билан ошнолик менга замонавий ахборот технологиялари билан ишлашни ҳам ўргатди. Мен бундан хурсандман.

Туманимиз матбуоти жадал ривожланмоқда. Бугунги кунда “Тараққиёт кўзгуси” ва унинг илова нашри “Менинг оилам” газеталари ҳамда “Жайхун садоси” интернет радиоси эшиттиришлари, Амударё телевидениеси кўрсатувлари кириб бормаган хонадон йўқ туманимизда.

Амударё телевидениеси кўрсатувлари ҳам мазмуни ва жуғрофий қамрови жиҳатидан тобора кенгайиб, сифати яхшиланиб бораётгани қувонарли. Мен малакали ва интилувчан муҳаррир Ғуломжон Эшниёзов, журналистлардан Алламберган Жуманиёзов, Ойгул Ражабова, Робия Йўлдошевалар ва Озода Худойбергановаларнинг ҳар бир мақоласини катта қизиқиш билан ўқиб бораман. Албатта, ўзим ҳам мақолалар ёзиб тураман.

27 июнь – Матбуот ва ОАВ ходимлари кунини ҳар гал ўз байрамимдай кутиб оламан ва байрамона қувончларимни ҳамиша ижодкорлар билан бўлишгим келади. Шу боис, туманимиз матбуоти фидойилари бўлган журналистларни, “Тараққиёт кўзгуси” газетасининг жамоатчи мухбирларини 27 июнь – касб байрамлари муносабати билан самимий муборакбод этаман. Халқимиз маънавий-маърифий ҳаётини юксалтиришдек хайрли ишларида, мамлакатимиз мустақиллигини мустаҳкамлаш, ислоҳотларни амалга ошириш жараёнидаги эзгу ва шарафли вазифаларни адо этишда мустаҳкам соғлик, синмас қатъият, ирода ва жўшқин ижод тилайман.

Ойимжон ЎРОЗАЛИЕВА, Беруний МФЙ фаоли, меҳнат фахрийси.