ТОТУВЛИК –МАҲАЛЛАДА ШАКЛЛАНАДИ

Халқимиз салкам 12 мингга яқин маҳаллаларда яшашади. Бу маҳаллалар фуқаролари эса турфа миллат вакилларидан иборат. Яъни, Ўзбекистон халқи 136 тадан зиёд миллат вакилларидан ташкил топган ягона оила. Шуниси эътиборлики, маҳаллаларда ўтказиладиган турли байрам тадбирлари, диний байрамлар – Рамазон ва ийд Қурбон ҳайитларида барча аҳиллик билан бир-бирларини қутлашлари анъанага айланган.

Катта ёшдаги отахон ва онахонларимиз ҳайит кунларида дастурхонлар ясатишиб, ёшларни, болаларни меҳмон қилиш баробарида, уларга бобомерос қадриятлардан сабоқ беришади. Фарзандлари қўлига лаганчада бўғирсоқ ва ширинликлар тутқазиб, қўшниларга улашиб чиқиш, қозоқ, туркман, рус, қорақалпоқ миллатларига мансуб маҳалладош болалар билан турли халқ ўйинларини ташкил этишларида миллатлараро тотувликнинг ажиб ҳикматлари мужассам.

Маҳалла – ҳамжиҳатлик, меҳр-оқибат ва тотувлик маскани. Бу масканда ҳеч қачон “сеники”, “меники”, қабилидаги тушунчалар бўлмаган. Шунинг учун ҳам бугунги кунга қадар турли миллат фарзандларини бирлаштирувчи “Маҳалламиз футболи”, “Маҳаллам – менинг фахрим!”, “Маҳалланинг ораста қизлари” каби тадбирлар, спорт ўйинлари, кўрик-танловларнинг илк босқичи маҳаллаларда ўтказилади ва бу кўрик-танловларда барча миллат болалари бир жамоа бўлиб иштирок этадилар.

Айниқса, “Бир болага етти маҳалла ота-она”, деган пурмаъно, ҳар бир миллат фарзандини маънавий-ахлоқий жиҳатдан ўстирувчи ва тарбияловчи ҳикмат ҳаётимиздан тобора кенг ўрин олаётгани биз ёшларнинг маънан баркамол инсонлар сифатида камол топишимизда муҳим аҳамият касб этади.

Биз ёшлар эса ҳар қандай эзгу ишга илк қадамни маҳалла остонасидан бошлаймиз. Момоларимиз, боболаримиз амал қилган удумлар, урф-одатлар биз учун жуда қадрлидир.

Севара БОЛТАБОЕВА,

ҚДУ талабаси.