TOTUVLIK –MAHALLADA ShAKLLANADI

Xalqimiz salkam 12 mingga yaqin mahallalarda yashashadi. Bu mahallalar fuqarolari esa turfa millat vakillaridan iborat. Yaʼni, Oʻzbekiston xalqi 136 tadan ziyod millat vakillaridan tashkil topgan yagona oila. Shunisi eʼtiborliki, mahallalarda oʻtkaziladigan turli bayram tadbirlari, diniy bayramlar – Ramazon va iyd Qurbon hayitlarida barcha ahillik bilan bir-birlarini qutlashlari anʼanaga aylangan.

Katta yoshdagi otaxon va onaxonlarimiz hayit kunlarida dasturxonlar yasatishib, yoshlarni, bolalarni mehmon qilish barobarida, ularga bobomeros qadriyatlardan saboq berishadi. Farzandlari qoʻliga laganchada boʻgʻirsoq va shirinliklar tutqazib, qoʻshnilarga ulashib chiqish, qozoq, turkman, rus, qoraqalpoq millatlariga mansub mahalladosh bolalar bilan turli xalq oʻyinlarini tashkil etishlarida millatlararo totuvlikning ajib hikmatlari mujassam.

Mahalla – hamjihatlik, mehr-oqibat va totuvlik maskani. Bu maskanda hech qachon “seniki”, “meniki”, qabilidagi tushunchalar boʻlmagan. Shuning uchun ham bugungi kunga qadar turli millat farzandlarini birlashtiruvchi “Mahallamiz futboli”, “Mahallam – mening faxrim!”, “Mahallaning orasta qizlari” kabi tadbirlar, sport oʻyinlari, koʻrik-tanlovlarning ilk bosqichi mahallalarda oʻtkaziladi va bu koʻrik-tanlovlarda barcha millat bolalari bir jamoa boʻlib ishtirok etadilar.

Ayniqsa, “Bir bolaga yetti mahalla ota-ona”, degan purmaʼno, har bir millat farzandini maʼnaviy-axloqiy jihatdan oʻstiruvchi va tarbiyalovchi hikmat hayotimizdan tobora keng oʻrin olayotgani biz yoshlarning maʼnan barkamol insonlar sifatida kamol topishimizda muhim ahamiyat kasb etadi.

Biz yoshlar esa har qanday ezgu ishga ilk qadamni mahalla ostonasidan boshlaymiz. Momolarimiz, bobolarimiz amal qilgan udumlar, urf-odatlar biz uchun juda qadrlidir.

Sevara BOLTABOYeVA,

QDU talabasi.