МЕҲР-ЭЪТИБОРДАН ЮКСАЛДИ ДИЛЛАР...

Наврўз! Кўҳна ва ҳамиша навқирон бу байрам ўзининг мазмун-моҳияти, азалий қадриятларимиз ва урф-одатларимизни мужассам этгани билан азиз ва мўътабардир. Шу боисдан-да, юртимизнинг ҳар бир гўшасида бу байрамни нишонлашга ўзгача тадорик кўрилмоқда.

Туман Маданият бўлимининг “Қиличбой” маданият ва аҳоли дам олиш маркази меҳнат жамоаси овул аҳолисига хуш кайфият улашиш мақсадида махсус мусиқали байрам дастурини тайёрлаш билан бирга яна бир савобли ишга қўл урдилар: соҳада узоқ йиллар самарали меҳнат қилиб, айни кунда кексалик нафақасига чиққан Одина Юсупова, Ҳалима опа, Бектурсун Холмуродов, Сайёра Абдураҳмоноваларнинг хонадонларига бориб, ҳол-аҳвол сўрашиб, самимий суҳбатлашдилар, ўзларининг репертуаридаги янги қўшиқларидан айтиб, совғалар улашишди.

Бир кўнгил – минг Каъба, дейди халқимиз. Марказ раҳбари Икромжон Сийтимов, ходими Моҳира Нуруллаева, марказда фаолият юритаётган драма тўгараги раҳбари Мирсаид Қодиров, овоз режиссёри Дониёр Бобожоновлар “Қиличбой” овулида истиқомат қилувчи Фарҳод Шомуродов, 80 ёшли нуроний онахон Ўғилжон Ҳайитбоева, шунингдек, Гулшод Эшчонова, Норимбат Ўрозимбетовлар хонадонларида бўлиб, инсон зоти доимо меҳрга, эътиборга ташна бўлишини, бир оғиз илиқ сўз ҳам кўнгилларни кўтаргулик қудратга эга эканлигини дилдан ҳис қилдилар.

– Биз кирган хонадон аъзолари совға-саломимиздан ҳам кўра кўпроқ мусиқий табригимиздан хурсанд бўлишди.

Узоқ йиллар 15-сонли мактабга раҳбарлик қилиш билан бирга санъат ошуфтаси, туманимизда маданий-оммавий тадбирларнинг яхши ўтишига улкан ҳисса қўшиб келган, таълим фахрийси, айни кунда кексалик нафақасидаги Ҳамрохон опа Қосимова бизнинг ташрифимиздан кўнгли тоғдай юксалди, ҳатто беморлик ҳолатида ҳам қўшиқларимизга рақсга тушгиси келди, – дейди Икромжон Сийтимов.

Ҳа, Наврўзи оламнинг қудрати ҳам, ҳаётбахшлиги ҳам байрам баҳона кишиларни чин инсоний туйғуларга ошно қилишида, атрофимиздаги одамларга меҳр-эътиборли бўлишга ундашида. Бу амалларни адо этиш кишининг ўзига ҳам қувонч бағишлайди.

Ойгул РАЖАБОВА.