ОНА ЮРТ ҒАМХЎРЛИГИДАН МИННАТДОР АЁЛЛАР
Аёл. У ишчими, талабами ёки давлат идораси хизматчисими, уй бекасими – ким бўлишидан қатъий назар, барчалари бирдай давлатимизнинг меҳр ва ғамхўрлигидан четда қолмайди. Туманимизда аллақачон бошланиб кетган меҳр-оқибат, яшнаш ва яшариш айёми – Наврўз ҳаётий тасодифлар, бемаврид касалликлар туфайли ногирон бўлиб қолган бир гуруҳ аёллар учун ҳам катта шодиёналар бошлаб келди.
Наврўз кунларида ана шундай 15 нафар аёл-қизларга ногиронлик аравачалари топширилди.
–Аллоҳ суйган бандасига дард беради дейишади, – дейди Назархон овулида яшовчи Гулистон Аллаярова. – Тўғриси, бундайин оғир дардга чалинаман, деб ҳеч ўйламаган эдим. Балки ростдан ҳам хасталик Аллоҳимнинг бир синовидир. Мени яхшилар қаторида синаб кўраётгандир. Бундан ҳеч хафа эмасман. Минг-минг шукур. Қолаверса, атрофимда яхши инсонлар кўп. Менга бу касаллик ташхисини қўйишганида шифокорлар тизимли даволаниш муолажалари таъсирида соғайиб кетишимни айтишган. Мен умид қилишдан ҳеч қачон чарчамайман.
Мана, Наврўз байрами арафасида менга ногиронлик аравачасини совға қилишди. Ёнимда умр йўлдошим, ўғлим, келиним ва неварам бор. Туман ҳокими Султонбой Йўлдошевдан, Тиббиёт бирлашмаси бошлиғи Эндирбой Абдуллаевдан, ижтимоий таъминот бўйича мутахассис Ҳамид Норбоевдан, қолаверса, туман Хотин-қизлар қўмитаси раиси Марям Аҳмедовадан чексиз миннатдорман. То ҳаёт эканман, мен она, аёл сифатида фарзандларим ва невараларимни она Ватанга садоқатли инсонлар қилиб тарбиялашга ўзимнинг ҳиссамни қўшавераман.
Наврўз байрами арафасида давлатимизнинг бундай ғамхўрлигидан миннатдор бўлган аёллар дилидаги она Ватанга, эл-у халққа бўлган самимий меҳр-муҳаббат туйғуларини юрак-юрагимиздан ҳис этарканмиз, ногиронлик аравачасида кўзлари чақнаб, ҳаётга жўшқин назар билан боқаётган бу азиз инсонларни асло ногиронлар деб атагимиз келмади. Зеро, уларнинг барчасининг қалби олам узра ўз сепини ёйиб, чор-атрофимизни гуллар чаманига айлантираётган баҳор каби яратишга, яшнатишга муштоқ. Кўнгилларида баҳордай ишчанлик, фидойилик кайфияти барқ уриб турибди. Назаримда уларнинг соғлом қалбларида она юртни янада яшнатиб юборгулик қудратли куч ҳоким. Бу аёллар ана шу қудратли куч ила оиласини ва демакки, она Ватанини асраб-авайлашга қодир.
Р.ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
