БАРЧАМИЗ БИР ОИЛАМИЗ

Биз - ўзбек, қозоқ, қорақалпоқ, туркман ва бошқа миллат вакиллари бир ягона Ватан – Ўзбекистон фарзандларимиз. Ота-боболаримиз шу заминда ўсиб-улғайишди ва бу муқаддас заминни бизларга бебаҳо мерос қилиб қолдиришди. Бизлар ҳам шу заминни ўз уйим-ўлан тўшагим, дея ардоқлаб, униб-ўсиб, тубимиз бир, шохларимиз минг бўлиб кўпаймоқдамиз.

Бу йил баҳорда саксон ёшни тўлдириб, саксон бирга қадам қўйдим. Олма - Ота зооветеринария институтида ўқиб, 1958 йили зоотехник мутахассислиги бўйича дипломга эга бўлиб, ўзимизнинг Амударё туманига қайтдим. Узоқ йиллар туманимиз чорвачилик соҳасида раҳбарлик лавозимларида фаолият юритдим.

Оилавий ҳаётимга тўхталадиган бўлсам, рафиқам Гулжоной Есимбет қизи билан 55 йилдан буён катта ва аҳил оилани бошқариб келмоқдамиз. Биз беш нафар ўғил, тўрт нафар қизларни тарбиялаб вояга етказдик ва уларнинг барчасини уйли-жойли қилиб, мустақил ҳаётга йўлладик. Улардан ўттиз нафардан зиёд невара ва эвара кўриб, бахтли-саодатли ҳаёт кечирмоқдамиз.

Маълумки, мамлакатимизда 130 дан зиёд миллат ва элат вакиллари бир оиланинг аъзоларидек аҳил ва иноқ ҳаёт кечиришмоқда ҳамда улар жамиятимизнинг янада ривожланиб, гуллаб-яшнаши йўлида хизмат қилишмоқда. Энг қувончлиси шундаки, юртимиз тинч-осойишталигидан кўнглимиз тўқ, энг муҳими, миллий ва ирқий камситишлар бизнинг менталитетимизга мутлақо ёт нарса. Барча миллат вакиллари тенг ҳуқуқли. Ҳамма бирдек муносиб ҳаёт кечиришга, меҳнат қилишга, ўқиб, билим олишга, ўзи танлаган касб-ҳунар ва мутахассисликни эгаллашга, қобилиятига яраша барча даражадаги раҳбарлик лавозимларини ёки  илм-фан даражаларини эгаллашга, ўз вақтида дам олиб, соғлигини яхшилашга ва нафақага чиқишга ҳақли. Бунга ота-боболарим ва менинг ўзим ҳамда фарзандларим ҳаёти,  умуман барча миллат вакиллари, хусусан бизнинг қозоқ миллатига мансуб кишилар ҳаёти гувоҳ. Шу давргача бирон кишининг сенинг миллатинг қозоқ, бизда бош зоотехник ёки хўжалик раҳбари бўлиб ишлашга ҳаққинг йўқ, деганини эшитмадим. Қайтанга  бир-бировни қўллаб-қувватлаб, умум иши учун бир ёқадан бош чиқариб жон куйдириб, виждонан ишлаш, фидойилик кўрсатиш халқимизга хос хусусиятдир. Умуман, барча соҳаларда ҳаммамизнинг ҳақ-ҳуқуқларимиз бир хил тенг. Бизда қайси миллат вакили бўлишимиздан қатъий назар, чинакам инсонларча яшаш учун барча шарт-шароитлар ва имкониятлар яратилган. Тўй-маъракаларимиз бир, ўзбеклар, қозоқлар, қорақалпоқлар ва бошқа миллат вакиллари бир-бирлари билан қиз олиб, қиз беришиб, қуда-анда бўлиб умргузаронлик қилмоқдамиз. Бизнинг мамлакатимизда барча миллат вакиллари ҳам ҳуқуқий, ҳам моддий, ҳам маънавий жиҳатдан тенг ҳаёт кечиришмоқда. Турмушимиз йилдан-йилга юксалиб, фаровон ва обод бўлмоқда. Барчамиз учун қулай шарт-шароитлар ва имкониятлар яратиб бераётган давлатимиздан, давлатимиз раҳбари – муҳтарам Президентимиз И.А.Каримовдан чексиз миннатдормиз. Шундай бетакрор гўзал, жаннатмакон юртда яшаётганимиздан бениҳоя бахтиёрмиз. Озод ва обод Ўзбекистонимиз ҳамиша бор бўлсин!

Жонузоқ ЖАҒАЛОВ,

меҳнат фахрийси, "Олмазор”маҳалласи фаоли.

(Фото - http://icc.uz)