BARChAMIZ BIR OILAMIZ
Biz - oʻzbek, qozoq, qoraqalpoq, turkman va boshqa millat vakillari bir yagona Vatan – Oʻzbekiston farzandlarimiz. Ota-bobolarimiz shu zaminda oʻsib-ulgʻayishdi va bu muqaddas zaminni bizlarga bebaho meros qilib qoldirishdi. Bizlar ham shu zaminni oʻz uyim-oʻlan toʻshagim, deya ardoqlab, unib-oʻsib, tubimiz bir, shoxlarimiz ming boʻlib koʻpaymoqdamiz.
Bu yil bahorda sakson yoshni toʻldirib, sakson birga qadam qoʻydim. Olma - Ota zooveterinariya institutida oʻqib, 1958-yili zootexnik mutaxassisligi boʻyicha diplomga ega boʻlib, oʻzimizning Amudaryo tumaniga qaytdim. Uzoq yillar tumanimiz chorvachilik sohasida rahbarlik lavozimlarida faoliyat yuritdim.
Oilaviy hayotimga toʻxtaladigan boʻlsam, rafiqam Guljonoy Yesimbet qizi bilan 55-yildan buyon katta va ahil oilani boshqarib kelmoqdamiz. Biz besh nafar oʻgʻil, toʻrt nafar qizlarni tarbiyalab voyaga yetkazdik va ularning barchasini uyli-joyli qilib, mustaqil hayotga yoʻlladik. Ulardan oʻttiz nafardan ziyod nevara va evara koʻrib, baxtli-saodatli hayot kechirmoqdamiz.
Maʼlumki, mamlakatimizda 130 dan ziyod millat va elat vakillari bir oilaning aʼzolaridek ahil va inoq hayot kechirishmoqda hamda ular jamiyatimizning yanada rivojlanib, gullab-yashnashi yoʻlida xizmat qilishmoqda. Eng quvonchlisi shundaki, yurtimiz tinch-osoyishtaligidan koʻnglimiz toʻq, eng muhimi, milliy va irqiy kamsitishlar bizning mentalitetimizga mutlaqo yot narsa. Barcha millat vakillari teng huquqli. Hamma birdek munosib hayot kechirishga, mehnat qilishga, oʻqib, bilim olishga, oʻzi tanlagan kasb-hunar va mutaxassislikni egallashga, qobiliyatiga yarasha barcha darajadagi rahbarlik lavozimlarini yoki ilm-fan darajalarini egallashga, oʻz vaqtida dam olib, sogʻligini yaxshilashga va nafaqaga chiqishga haqli. Bunga ota-bobolarim va mening oʻzim hamda farzandlarim hayoti, umuman barcha millat vakillari, xususan bizning qozoq millatiga mansub kishilar hayoti guvoh. Shu davrgacha biron kishining sening millating qozoq, bizda bosh zootexnik yoki xoʻjalik rahbari boʻlib ishlashga haqqing yoʻq, deganini eshitmadim. Qaytanga bir-birovni qoʻllab-quvvatlab, umum ishi uchun bir yoqadan bosh chiqarib jon kuydirib, vijdonan ishlash, fidoyilik koʻrsatish xalqimizga xos xususiyatdir. Umuman, barcha sohalarda hammamizning haq-huquqlarimiz bir xil teng. Bizda qaysi millat vakili boʻlishimizdan qatʼiy nazar, chinakam insonlarcha yashash uchun barcha shart-sharoitlar va imkoniyatlar yaratilgan. Toʻy-maʼrakalarimiz bir, oʻzbeklar, qozoqlar, qoraqalpoqlar va boshqa millat vakillari bir-birlari bilan qiz olib, qiz berishib, quda-anda boʻlib umrguzaronlik qilmoqdamiz. Bizning mamlakatimizda barcha millat vakillari ham huquqiy, ham moddiy, ham maʼnaviy jihatdan teng hayot kechirishmoqda. Turmushimiz yildan-yilga yuksalib, farovon va obod boʻlmoqda. Barchamiz uchun qulay shart-sharoitlar va imkoniyatlar yaratib berayotgan davlatimizdan, davlatimiz rahbari – muhtaram Prezidentimiz I.A.Karimovdan cheksiz minnatdormiz. Shunday betakror goʻzal, jannatmakon yurtda yashayotganimizdan benihoya baxtiyormiz. Ozod va obod Oʻzbekistonimiz hamisha bor boʻlsin!
Jonuzoq JAGʻALOV,
mehnat faxriysi, "Olmazor”mahallasi faoli.
(Foto - http://icc.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
