Nogironligi boʻlgan bolalarni qoʻllab-quvvatlash – barchamizning burchimiz

Har yili 1-iyun sanasi dunyo boʻylab Xalqaro bolalarni himoya qilish kuni sifatida keng nishonlanadi. Bu kun bolalar huquqlarini himoya qilish, ularning baxtli va sogʻlom hayot kechirishlariga eʼtibor qaratish, shuningdek, jamiyatda bolalarning oʻrni va ahamiyatini yuksak qadrlash maqsadida tashkil etilgan.

Yurtimizda ham 1-iyun kuni katta bayram sifatida munosib nishonlanadi. Maktabgacha taʼlim muassasalari, maktablar, madaniyat va sanʼat markazlarida turli bayram tadbirlari, kontsertlar, bolalar uchun sport musobaqalari, koʻrgazmalar va koʻngilochar dasturlar tashkil etiladi. Shuningdek, ijtimoiy himoyaga muhtoj bolalarga alohida eʼtibor qaratilib, ularga sovgʻalar topshiriladi.

Ushbu sana munosabati bilan amudaryolik tashabbuskor saxovatpesha tadbirkor Dildora Xayitboyeva tomonidan xayriya tadbiri tashkil etildi. Tadbirda Nogironlar jamiyatining tuman boʻlinmasi tomonidan imkoniyati cheklangan, nogironligi boʻlgan 40 nafardan ortiq 7-17 yosh oraligʻidagi bolajonlar ishtirok etdi va ular oʻrtasida rasm chizish boʻyicha “Maftunkor ranglar jilosi” nomli bellashuv oʻtkazildi.

Xayriya tadbiriga Oʻzbekiston kasaba uyushmalari federatsiyasi Qoraqalpogʻiston kengashi raisi Ulugʻbek Jalmenov tashrif buyurib, barcha bolajonlarni bayram bilan samimiy tabrikladi.

Ulugʻbek Jalmenov oʻz soʻzida bolalar ertangi kelajagimiz egalari ekanligini, ertangi kunning yetuk mutaxassislari, olimlari, shoirlari, sportchilari bugungi bolajonlar orasidan yetishib chiqishini, har bir bola mehr, eʼtibor va gʻamxoʻrlikka loyiq ekanligini taʼkidladi. Ularning har tomonlama kamol topishi uchun sogʻlom muhit yaratish, toʻgʻri tarbiya berish va huquqlarini himoya qilish – har bir kattalarning, ota-onalarning, ustozlar va jamiyatning muqaddas burchi ekanligini alohida qayd etdi.

Nogironligi boʻlgan bolalar hayotda koʻproq qoʻllab-quvvatlash, mehr-shafqat va gʻamxoʻrlikni talab qiladi. Ularning jamiyatda oʻz oʻrnini topib, sogʻlom muhitda ulgʻayishi, salohiyatini roʻyobga chiqarishi uchun har tomonlama koʻmak zarur.

Nogironligi boʻlgan bolalarni qoʻllab-quvvatlash, ularga yuqori kayfiyat ulashish maqsadida tashkil etilgan bayram tadbiri mobaynida bolalarga sovgʻalar ulashildi, madaniy koʻngilochar dasturlar namoyish etildi. Turli noz-neʼmatlarga, shirinliklarga toʻla dasturxon yozildi.

Xayriya tadbirida tuman Madaniyat boʻlimi xonandalari ishtirokida shoʻx-shodon kuy-qoʻshiqlar ijro etildi. 2-sonli davlat maktabgacha taʼlim tashkiloti tarbiyalanuvchilari ijrosidagi betakror chiqishlar barchaga yuqori bayramona kayfiyat ulashdi. Tadbirda bayram tashabbuskori Dildora Xayitboyeva tomonidan 3 nafar bolajonlarga velosipedlar sovgʻa qilindi.

Tadbirda soʻzga chiqqan tuman hokimi oʻrinbosarlari, boʻlimlar rahbarlari tadbirkorning bu ezgu tashabbusi jamiyatimizda mehr-oqibat, insonparvarlik va xayr-saxovatlilik qadriyatlarini yanada mustahkamlashga xizmat qilishini taʼkidladilar. Shuningdek, “Maftunkor ranglar jilosi” rasmlar tanlovi gʻoliblariga faxriy yorliq hamda esdalik sovgʻalari topshirildi.

Nogironligi boʻlgan bolalarni qoʻllab-quvvatlash – bu faqat davlat yoki muayyan tashkilotlarning emas, butun jamiyatning burchidir. Har bir inson, har bir oilaning bu jarayonga qoʻshgan hissasi katta ahamiyatga ega. Kimdir koʻngillilik asosida tadbirlar oʻtkazadi, yana kimdir moddiy yordam beradi, kimdir esa mehrli soʻz va tabassum bilan bolaga ruhiy dalda boʻladi.

Nogironligi boʻlgan bolalar ham bizning farzandlarimiz, kelajagimizning bir boʻlagidir. Ularning baxtli hayoti, oʻzlariga boʻlgan ishonchini mustahkamlash bizning mehrimiz, gʻamxoʻrligimiz va ezgu amallarimiz bilan chambarchas bogʻliq.

Charos Arslonova, tuman hokimligining Axborot xizmati rahbari.