Ногиронлиги бўлган болаларни қўллаб-қувватлаш – барчамизнинг бурчимиз

Ҳар йили 1 июнь санаси дунё бўйлаб Халқаро болаларни ҳимоя қилиш куни сифатида кенг нишонланади. Бу кун болалар ҳуқуқларини ҳимоя қилиш, уларнинг бахтли ва соғлом ҳаёт кечиришларига эътибор қаратиш, шунингдек, жамиятда болаларнинг ўрни ва аҳамиятини юксак қадрлаш мақсадида ташкил этилган.

Юртимизда ҳам 1 июнь куни катта байрам сифатида муносиб нишонланади. Мактабгача таълим муассасалари, мактаблар, маданият ва санъат марказларида турли байрам тадбирлари, концертлар, болалар учун спорт мусобақалари, кўргазмалар ва кўнгилочар дастурлар ташкил этилади. Шунингдек, ижтимоий ҳимояга муҳтож болаларга алоҳида эътибор қаратилиб, уларга совғалар топширилади.

Ушбу сана муносабати билан амударёлик ташаббускор саховатпеша тадбиркор Дилдора Хайитбоева томонидан хайрия тадбири ташкил этилди. Тадбирда Ногиронлар жамиятининг туман бўлинмаси томонидан имконияти чекланган, ногиронлиги бўлган 40 нафардан ортиқ 7-17 ёш оралиғидаги болажонлар иштирок этди ва улар ўртасида расм чизиш бўйича “Мафтункор ранглар жилоси” номли беллашув ўтказилди.

Хайрия тадбирига Ўзбекистон касаба уюшмалари федерацияси Қорақалпоғистон кенгаши раиси Улуғбек Жалменов ташриф буюриб, барча болажонларни байрам билан самимий табриклади.

Улуғбек Жалменов ўз сўзида болалар эртанги келажагимиз эгалари эканлигини, эртанги куннинг етук мутахассислари, олимлари, шоирлари, спортчилари бугунги болажонлар орасидан етишиб чиқишини, ҳар бир бола меҳр, эътибор ва ғамхўрликка лойиқ эканлигини таъкидлади. Уларнинг ҳар томонлама камол топиши учун соғлом муҳит яратиш, тўғри тарбия бериш ва ҳуқуқларини ҳимоя қилиш – ҳар бир катталарнинг, ота-оналарнинг, устозлар ва жамиятнинг муқаддас бурчи эканлигини алоҳида қайд этди.

Ногиронлиги бўлган болалар ҳаётда кўпроқ қўллаб-қувватлаш, меҳр-шафқат ва ғамхўрликни талаб қилади. Уларнинг жамиятда ўз ўрнини топиб, соғлом муҳитда улғайиши, салоҳиятини рўёбга чиқариши учун ҳар томонлама кўмак зарур.

Ногиронлиги бўлган болаларни қўллаб-қувватлаш, уларга юқори кайфият улашиш мақсадида ташкил этилган байрам тадбири мобайнида болаларга совғалар улашилди, маданий кўнгилочар дастурлар намойиш этилди. Турли ноз-неъматларга, ширинликларга тўла дастурхон ёзилди.

Хайрия тадбирида туман Маданият бўлими хонандалари иштирокида шўх-шодон куй-қўшиқлар ижро этилди. 2-сонли давлат мактабгача таълим ташкилоти тарбияланувчилари ижросидаги бетакрор чиқишлар барчага юқори байрамона кайфият улашди. Тадбирда байрам ташаббускори Дилдора Хайитбоева томонидан 3 нафар болажонларга велосипедлар совға қилинди.

Тадбирда сўзга чиққан туман ҳокими ўринбосарлари, бўлимлар раҳбарлари тадбиркорнинг бу эзгу ташаббуси жамиятимизда меҳр-оқибат, инсонпарварлик ва хайр-саховатлилик қадриятларини янада мустаҳкамлашга хизмат қилишини таъкидладилар. Шунингдек, “Мафтункор ранглар жилоси” расмлар танлови ғолибларига фахрий ёрлиқ ҳамда эсдалик совғалари топширилди.

Ногиронлиги бўлган болаларни қўллаб-қувватлаш – бу фақат давлат ёки муайян ташкилотларнинг эмас, бутун жамиятнинг бурчидир. Ҳар бир инсон, ҳар бир оиланинг бу жараёнга қўшган ҳиссаси катта аҳамиятга эга. Кимдир кўнгиллилик асосида тадбирлар ўтказади, яна кимдир моддий ёрдам беради, кимдир эса меҳрли сўз ва табассум билан болага руҳий далда бўлади.

Ногиронлиги бўлган болалар ҳам бизнинг фарзандларимиз, келажагимизнинг бир бўлагидир. Уларнинг бахтли ҳаёти, ўзларига бўлган ишончини мустаҳкамлаш бизнинг меҳримиз, ғамхўрлигимиз ва эзгу амалларимиз билан чамбарчас боғлиқ.

Чарос Арслонова, туман ҳокимлигининг Ахборот хизмати раҳбари.