Коррупцияга қарши кураш барчамизнинг бурчимиз

Коррупция — бу адолатсизликнинг юзага чиқиши, билим ва меҳнатнинг инкор этилиши, инсоф ва виждоннинг четга сурилиши демакдир. Иккала одамнинг битта қўл сиқиб келишиши, оқибатда йиллаб меҳнат қилиб, ўқиб-изланиб келаётган инсоннинг орзу-умидлари поймол бўлиши — ана шу ҳолатни коррупция деб аташ мумкин. Ёки ўз билимсизлигини яшириш мақсадида илм йўлида шам мисоли ёниб, олий таълим муассасасига киришни орзу қилган ёшнинг келажагини ноҳақ тарзда тортиб олиш — бу ҳам коррупциянинг ёмон оқибатидир.

Тарихий манбаларга кўра, коррупцияга қарши курашиш борасида илк ҳаракатни бошлаган давлат — Шумер давлати ҳисобланади. Кейинчалик бошқа давлатлар ҳам бу борада тадқиқотлар олиб бориб, самарали чора-тадбирларни амалга оширишга киришдилар.

Юртимизда ҳам бу йўналишда салмоқли ишлар қилинмоқда. Хусусан, 2017 йил 3 январ куни “Коррупцияга қарши кураш тўғрисида”ги Қонуннинг қабул қилиниши мамлакат ҳаётида муҳим воқеа бўлди. Қонуннинг мазмуни — давлат ва жамиятнинг барча соҳаларида коррупцияга чек қўйиш, унга нисбатан тоқатсизликни кучайтириш, ушбу иллатни ўз вақтида аниқлаб, унга йўл қўйган шахсларни жазога тортиш каби устувор вазифаларни қамраб олади. Бу борада кенг кўламли тадқиқотлар, профилактик чоралар ва аниқ иш услублари жорий этилган.

Бироқ ҳаракат қилинса-ю, амалий натижа кўринмаса, бунинг оқибати аянчли бўлиши мумкин. Аввало, мамлакатимиз бошқа давлатлар қаторида тараққиёт йўлидан бориш, иқтисод, таълим ва маърифат соҳаларида юксалишни мақсад қилган экан, бунда коррупцияга барҳам бериш зарур. Коррупция устига қурилган жамият маънавий жиҳатдан заифлашган, ривождан қолган жамиятдир. Маънавиятсиз ва маърифатсиз жамият эса, ўз-ўзидан инқироз сари юз тутади.

XXI аср — билим олиш, ривожланиш ва тараққий этиш учун кенг имкониятлар яратилаётган даврдир. Шу боис, ёшларимиз коррупцияга нисбатан мустаҳкам фикр ва етук тушунчага эга бўлиши лозим. Чунки бу иллат фақатгина иқтисодий ёки ижтимоий эмас, балки маънавий инқирозга ҳам сабаб бўлади.

Ҳар биримизнинг ҳаётимизда “Келажак ёшлар қўлида” деган ибора бор. Бу ибора шунчаки гап эмас, балки юрт равнақига хизмат қилувчи улкан масъулиятдир. Давлат тизими ва ёшлар ўртасидаги алоқалар фақат шаффоф ва адолатли асосда қурилса, келажак мустаҳкам бўлади.

Ҳиндистоннинг собиқ президенти Пратибҳа Патил шундай деган эди: “Коррупция — тараққиёт ва яхши бошқарувнинг душманидир. Ундан қутулиш керак. Бу мақсадни амалга ошириш учун ҳукумат ҳам, бутун халқ ҳам бирлашиши керак”. Дарҳақиқат, агар келажак бизнинг қўлимизда бўлиб, биз эса коррупцион тизим қўлида бўлсак, бу парадокс — яъни ақлга сиғмайдиган ҳолатдир.

Мамлакатимизда амалга оширилаётган ислоҳотлар ўз самарасини бермоқда. Жамиятда коррупцияга нисбатан муносабат сезиларли даражада ўзгариб бормоқда. Айниқса таълим соҳасида, олий таълим муассасаларида талабаларнинг коррупция ҳолатлари тўғрисида хабар беришлари учун тегишли механизмлар жорий этилган. Бу билан нафақат жиноят аниқланади, балки унинг олдини олишга хизмат қилувчи муҳим қадам ташланади.

Олий ўқув юртларида “Коррупцияга қарши курашамиз”, “Энг ёмон иллат — коррупция”, “Коррупция — бу зулм!” каби баннерлар орқали тушунтириш ишлари олиб борилмоқда. Ёшлар ўртасида мунозаралар ташкил қилиниб, уларнинг ҳуқуқий онги ва фаол фуқаролик позицияси мустаҳкамланмоқда.

Ҳақиқий ватанпарвар, билимли ва адолатпарвар ёшлар коррупцияга дуч келмаслиги, унда иштирок этмаслиги керак. Ана шундагина биз ҳар бир соҳада юқори чўққиларни забт этишимиз, юртимиз байроғини юксакларга кўтаришимиз мумкин.

Биз — ёшлар, коррупцияга қаршимиз!

Машҳура Хайитбоева, Ўзбекистон давлат жаҳон тиллари университети талабаси.