Обод турмуш йили янгиликлари

Келажакка тикилган сармоялар

Истиқлол йилларида таълим соҳасига катта эътибор қаратилиб, ёшларимизнинг жисмонан ва маънан соғлом бўлиб етишишлари учун барча куч ва воситалар сафарбар қилинмоқда. Биргина туманимизда "2004-2009 йилларда мактаб таълимини ривожлантириш Давлат умумиллий дастури” доирасида 72 та таълим муассасасида қурилиш-таъмирлаш ишлари амалга оширилди. Жорий йилда 2 та мактабда капитал реконструкция ва 3 та мактабда капитал таъмирлаш ишлари амалга оширилиб, ушбу мақсадлар учун давлат бюджетидан 1 миллиард 763 миллион сўм маблағ ажратилди. Бу каби ишлар келгусида ҳар томонлама етук ва баркамол авлод тимсолида ўз самарасини бериши шубҳасиз.

Равон йўллар – ободлик тимсоли

Маълумки, Жорий йилда "Урганч шаҳри-Манғит шаҳри -Туркманистон Республикаси чегараси" давлат аҳамиятидаги автомобил йўлининг 75,5-79,0 км оралиғида смета бахоси 4 миллиард 270 млн сўмлик, реконструкция ишлари олиб борилмоқда. Шу кунгача йўл остидан ўтувчи муҳандислик-коммуникация иншоотлари янгиланди, йўл четига тўсиқлар қўйилди. Йўл бўйига симёғочлар ва ёриткичлар ўрнатилиб, йўлни ёритиш тизими барпо қилинди. Шунингдек, йўл бўйидаги пиёдалар учун йўлаклар янгидан қурилиб, мавжудлари мукаммал таъмирланмоқда.

30 август куни йўлсозлар йўлнинг қора қопламасини ётқизиш ишларини бошладилар. Уларнинг фидойи ва самарали сеҳнатлари боис тез кунларда Манғит-Гурлан йўлининг шаҳарга кириш қисми замонавий талабларга жавоб берадиган кўринишда фойдаланишга топширилади.

Ахборот-коммуникация соҳаси ривожи йўлида

Мамлакатимизда ахборот-коммуникация соҳаси тобора такомиллашиб, жаҳон стандартлари талабларига жавоб берадиган замонавий асбоб-ускуналар билан таъминланмоқда. Бу борада туман телекоммуникация тармоғида ҳам қатор амалий ишлар қилинмоқда.

Корхона бугунги кунда 4 мингдан ортиқ абонентга хизмат қилмоқда. Абонентларга янада қулайлик яратиш ва илғор технологияларни жорий қилиш мақсадида 2004 йилда аналог телефон станциялари замонавий рақамли телефон станцияларига алмаштирилгани айни муддао бўлди.

Айни кунларда корхона CDMA стандартида ишловчи уяли ва симсиз стационар телефон аппаратларини аҳолига қулай нархларда етказиб бермоқда. Шунингдек, Uzonline интернет провайдерига уланиш борасида қатор имтиёзлар берилиб, мамлакатимиз мустақиллигининг 22 йиллиги муносабати билан жорий йил 30 сентябргача тармоққа уланган абонент (жисмоний шахс)ларга 2200 мегабайт бепул интернет трафиги берилмоқда.

(Реклама ҳуқуқи асосида. Хизматлар лицензияга эга)

Спорт – соғлом турмуш гарови

Юртимизда ёшларнинг спорт билан шуғулланишлари учун барча шароитлар яратилиб, уларнинг жисмонан соғлом бўлиб вояга етишларига катта эътибор қаратилмоқда. Шу мақсадда туманимиздаги 3 та болалар ва ўсмирлар спорт мактабларида ёшларимизнинг спорт билан шуғулланиши учун барча шароитлар яратилган.

Шунингдек, туман умумтаълим мактабларидаги 40 дан ортиқ махсус спорт заллари, 250 га яқин спорт майдончалари ҳам шу мақсадга хизмат қилмоқда. Туманимиздаги спорт мажмуаларида 3000 нафардан ортиқ ёш спортчилар спортнинг турли тўгаракларига қатнашиб келмоқда.

Маҳалла – ўзини ўзи бошқаришнинг ноёб усули

Бугунги кунда туманимизда 43 та фуқароларнинг ўзини ўзи бошқариш органлари томонидан илгари маҳаллий давлат ҳокимияти органлари зиммасида бўлган 30 дан зиёд ижтимоий йўналишдаги вазифалар муваффақиятли бажариб келинмоқда.

Туманимиздаги намунали маҳалла фуқаролар йиғинлари Республикамиз бўйлаб ўтказилаётган турли танловларда ғолиблар сафида келмоқда. "Маҳалла” хайрия жамоат фонди республика бошқаруви томонидан ўтказиб келинаётган "Энг намунали фуқароларнинг ўзини ўзи бошқариш органлари” танловининг туман ва Республика босқичларида биринчи ўринларни эгаллаган Қиличбой овул фуқаролар йиғини танловнинг мамлакат босқичига қатнашиш имкониятини қўлга киритган эди. Эндиликда ушбу фуқаролар йиғинининг иш тажрибасидан кўпчилик ўзини ўзи бошқариш органлари ўрнак олмоқда.

Спортчига эътибор

"Ҳеч нарса мамлакатни спорт каби тез дунёга танита олмайди”, деган эди муҳтарам Президентимиз. Яратилаётган шароит ва имкониятлардан унумли фойдаланган, ўз устида тинимсиз ишлаб, малака ва тажрибаларини, куч ва имкониятларини ошириб бораётган туманимиз спортчилари бугун Республика, мамлакат ва дунё миқёсидаги катта мусобақаларда иштирок этиб, ғолиб бўлмоқдалар, совриндорлар сафидан жой олмоқдалар.

Ана шундай муваффақиятга эришган спортчилардан бири Элёр Машарипов спортнинг дзю-до тури бўйича дунё миқёсида эришган натижалари учун мустақиллик байрами арафасида туман ҳокимлигининг фахрий ёрлиғи ва қимматбаҳо совғалар билан тақдирланди.