Obod turmush yili yangiliklari

Kelajakka tikilgan sarmoyalar

Istiqlol yillarida taʼlim sohasiga katta eʼtibor qaratilib, yoshlarimizning jismonan va maʼnan sogʻlom boʻlib yetishishlari uchun barcha kuch va vositalar safarbar qilinmoqda. Birgina tumanimizda "2004-2009-yillarda maktab taʼlimini rivojlantirish Davlat umumilliy dasturi” doirasida 72 ta taʼlim muassasasida qurilish-taʼmirlash ishlari amalga oshirildi. Joriy yilda 2 ta maktabda kapital rekonstruktsiya va 3 ta maktabda kapital taʼmirlash ishlari amalga oshirilib, ushbu maqsadlar uchun davlat byudjetidan 1 milliard 763 million soʻm mablagʻ ajratildi. Bu kabi ishlar kelgusida har tomonlama yetuk va barkamol avlod timsolida oʻz samarasini berishi shubhasiz.

Ravon yoʻllar – obodlik timsoli

Maʼlumki, Joriy yilda "Urganch shahri-Mangʻit shahri -Turkmaniston Respublikasi chegarasi" davlat ahamiyatidagi avtomobil yoʻlining 75,5-79,0 km oraligʻida smeta baxosi 4 milliard 270 mln soʻmlik, rekonstruktsiya ishlari olib borilmoqda. Shu kungacha yoʻl ostidan oʻtuvchi muhandislik-kommunikatsiya inshootlari yangilandi, yoʻl chetiga toʻsiqlar qoʻyildi. Yoʻl boʻyiga simyogʻochlar va yoritkichlar oʻrnatilib, yoʻlni yoritish tizimi barpo qilindi. Shuningdek, yoʻl boʻyidagi piyodalar uchun yoʻlaklar yangidan qurilib, mavjudlari mukammal taʼmirlanmoqda.

30-avgust kuni yoʻlsozlar yoʻlning qora qoplamasini yotqizish ishlarini boshladilar. Ularning fidoyi va samarali sehnatlari bois tez kunlarda Mangʻit-Gurlan yoʻlining shaharga kirish qismi zamonaviy talablarga javob beradigan koʻrinishda foydalanishga topshiriladi.

Axborot-kommunikatsiya sohasi rivoji yoʻlida

Mamlakatimizda axborot-kommunikatsiya sohasi tobora takomillashib, jahon standartlari talablariga javob beradigan zamonaviy asbob-uskunalar bilan taʼminlanmoqda. Bu borada tuman telekommunikatsiya tarmogʻida ham qator amaliy ishlar qilinmoqda.

Korxona bugungi kunda 4 mingdan ortiq abonentga xizmat qilmoqda. Abonentlarga yanada qulaylik yaratish va ilgʻor texnologiyalarni joriy qilish maqsadida 2004-yilda analog telefon stantsiyalari zamonaviy raqamli telefon stantsiyalariga almashtirilgani ayni muddao boʻldi.

Ayni kunlarda korxona CDMA standartida ishlovchi uyali va simsiz statsionar telefon apparatlarini aholiga qulay narxlarda yetkazib bermoqda. Shuningdek, Uzonline internet provayderiga ulanish borasida qator imtiyozlar berilib, mamlakatimiz mustaqilligining 22 yilligi munosabati bilan joriy yil 30-sentyabrgacha tarmoqqa ulangan abonent (jismoniy shaxs)larga 2200 megabayt bepul internet trafigi berilmoqda.

(Reklama huquqi asosida. Xizmatlar litsenziyaga ega)

Sport – sogʻlom turmush garovi

Yurtimizda yoshlarning sport bilan shugʻullanishlari uchun barcha sharoitlar yaratilib, ularning jismonan sogʻlom boʻlib voyaga yetishlariga katta eʼtibor qaratilmoqda. Shu maqsadda tumanimizdagi 3 ta bolalar va oʻsmirlar sport maktablarida yoshlarimizning sport bilan shugʻullanishi uchun barcha sharoitlar yaratilgan.

Shuningdek, tuman umumtaʼlim maktablaridagi 40 dan ortiq maxsus sport zallari, 250 ga yaqin sport maydonchalari ham shu maqsadga xizmat qilmoqda. Tumanimizdagi sport majmualarida 3000 nafardan ortiq yosh sportchilar sportning turli toʻgaraklariga qatnashib kelmoqda.

Mahalla – oʻzini oʻzi boshqarishning noyob usuli

Bugungi kunda tumanimizda 43 ta fuqarolarning oʻzini oʻzi boshqarish organlari tomonidan ilgari mahalliy davlat hokimiyati organlari zimmasida boʻlgan 30 dan ziyod ijtimoiy yoʻnalishdagi vazifalar muvaffaqiyatli bajarib kelinmoqda.

Tumanimizdagi namunali mahalla fuqarolar yigʻinlari Respublikamiz boʻylab oʻtkazilayotgan turli tanlovlarda gʻoliblar safida kelmoqda. "Mahalla” xayriya jamoat fondi respublika boshqaruvi tomonidan oʻtkazib kelinayotgan "Eng namunali fuqarolarning oʻzini oʻzi boshqarish organlari” tanlovining tuman va Respublika bosqichlarida birinchi oʻrinlarni egallagan Qilichboy ovul fuqarolar yigʻini tanlovning mamlakat bosqichiga qatnashish imkoniyatini qoʻlga kiritgan edi. Endilikda ushbu fuqarolar yigʻinining ish tajribasidan koʻpchilik oʻzini oʻzi boshqarish organlari oʻrnak olmoqda.

Sportchiga eʼtibor

"Hech narsa mamlakatni sport kabi tez dunyoga tanita olmaydi”, degan edi muhtaram Prezidentimiz. Yaratilayotgan sharoit va imkoniyatlardan unumli foydalangan, oʻz ustida tinimsiz ishlab, malaka va tajribalarini, kuch va imkoniyatlarini oshirib borayotgan tumanimiz sportchilari bugun Respublika, mamlakat va dunyo miqyosidagi katta musobaqalarda ishtirok etib, gʻolib boʻlmoqdalar, sovrindorlar safidan joy olmoqdalar.

Ana shunday muvaffaqiyatga erishgan sportchilardan biri Elyor Masharipov sportning dzyu-do turi boʻyicha dunyo miqyosida erishgan natijalari uchun mustaqillik bayrami arafasida tuman hokimligining faxriy yorligʻi va qimmatbaho sovgʻalar bilan taqdirlandi.