ЭЛ АРДОҒИДАГИ АЁЛ

Юртдошларимиз орасида ҳаёт сўқмоқларида ўз йўлини, ўрнини топиб, Ватанига, эл-юртига фидойилиги, чин инсонлиги билан бошқаларга ўрнак бўлиб келаётган кишиларни кўриб, ҳамиша қувониб юрамиз.

Мен ана шундай эл ардоғидаги кишилар орасида ўз шогирдим ва ҳамкасбим Айимжон Жуманиёзованинг ҳам борлигидан доимо фахрланаман.

Айимжон Жуманиёзова 2017 йилнинг 1 июнидан нафақага чиқиб, жонажон мактаби, шу мактабнинг аҳил жамоаси билан хайрлашди. Мен шу дамларда кўз олдимда улғайиб, касбидан камол топган шогирдимнинг ҳаёт йўллари ҳақида ўйладим.

1978 йилда 17-сонли умумтаълим мактабига ишга келганимда  Айимжон ҳамма фанлардан аъло баҳоларга ўқийдиган, жамоат ишларида фаол қатнашадиган ўқувчи қиз эди. У мактабнинг волейбол тўгараги аъзоси сифатида турли мусобақаларда иштирок этиб, мактабда эпчил ва чаққон спортчи сифатида танилган эди.

Айимжон мактабни аъло баҳоларга тугатиб, 1980 йилда Низомий номли Тошкент давлат педагогика институтининг тарих-ҳуқуқ факультетига ўқишга кирди ва уни 1985 йилда муваффақиятли тугатди.

Олий маълумотга эга бўлган Айимжон шу йили ўзи ўқиган 17-сонли мактабда ўқитувчи сифатида иш бошлади. Бу қиздаги ғайрат-шижоатни олдиндан пайқаган устози, мактаб директори Зарифбой Собиров ва мактаб жамоаси уни илиқ кутиб олишди.

Педагог сифатида иш бошлаган Айимжон Жуманиёзова ўзининг масъулиятни чуқур ҳис қилиши, талабчанлиги, болажонлиги, ўз фанининг билимдони, айниқса самимий ва очиқкўнгиллиги билан бошқалардан ажралиб турарди. Бу хислатлар унинг ўқувчиларга  меҳрибон устоз, касбдошларига содиқ дўст ва элдошларига юрт фидойиси бўлиб танилишида муҳим омил бўлди.

Айимжон 32 йиллик иш фаолияти давомида синф раҳбари ва устоз сифатида ўқувчилар ҳамда уларнинг ота-оналари ҳурматига сазовор бўлди.

У 1999-2012 йилларда "Йил ўқитувчиси” кўрик-танловида муваффаиқятли иштирок қилди. Шунингдек, у 2007-2013 ўқув йилларида ўтказилган август кенгашларида ўз фанининг билимдони, таълим соҳасидаги янги инновацияларнинг илғор тарғиботчиси сифатида туман тарих-ҳуқуқ фани ўқитувчиларига мураббийлик қилиб келди.

У самимийлиги, қатъиятлилиги туфайли туман миқёсида ўтказилган фан олимпиадалари ва билимлар беллашувларида, жумладан, 2014 йилда фан олимпиадасининг ҳуқуқшунослик фани бўйича Республика босқичида ҳакамлик қилди.

Айимжон шогирдлари Насиба Маташева, Роза Ражабова, Муҳаббат Собировалар билан доимо тажриба алмашиб ишлади. Бундай фаолият Айимжон ва унинг шогирдлари педагогик маҳоратларининг ошишига самарали таъсир кўрсатди.

Унинг тажрибали ўқитувчи мавқеига етишишида устозлари – Роза Мустаева, Ражаб Авазбоев, Турсуной Саъдуллаева, Тожимурод Ўрозбоев ва Раҳимбой Ўрозбоевларнинг катта ҳиссаси борлигини чуқур ҳис қилади. Шу боисдан ҳам у ўз устозларига доимо ҳурматда бўлади.

Тажрибали ва жонкуяр муаллима Айимжон Жуманиёзова мактаб-маҳалла ҳамкорлигининг мустаҳкамланишига ҳам муносиб ҳисса қўшди.

Айимжон турмуш ўртоғи Ўктамбой Йўлдошев билан 3 нафар қиз ва 2 нафар ўғилни тарбиялаб, вояга етказди. Катта қизи Насиба Йўлдошева ўқитувчи, Шаҳноза инглиз тили фани ўқитувчиси, Севара эса тарих фани ўқитувчиси бўлиб етишаяпти.

Катта ўғли Бекзод – иқтисодчи. Кенжа ўғил Шаҳзодбек ҳам иқтисод йўналишини танлаган.

Йўлдошевлар оиласи намунали оила сифатида Холимбег овулидаги барча оилаларга ўрнак, десак хато бўлмайди.

Мен меҳнатдан обрў топиб, бахт топиб, эл назарига тушган, қалби эзгуликларга тўла шогирдим Айимжон Жуманиёзова ва унинг умр йўлдоши Ўктамбойга соғлик, омонлик тилайман.

Янгибой ЭШИММАТОВ,

17-сонли мактабнинг жисмоний тарбия фани ўқитувчиси, "Шуҳрат” медали соҳиби.