Обод турмуш йили янгиликлари

Эътибор ва олқиш олиб

Шу йилнинг 14-15 июль кунлари Тошкент шаҳрининг энг файзли масканларидан бири – Миллий боғда бўлиб ўтган ўзбек миллий дорбозлар гуруҳи, анъанавий цирк санъати ва ҳаваскор қўғирчоқ театрларининг анъанавий республика кўрик-фестивалида Қорақалпоғистон Республикаси номидан туманимиздан чиққан машҳур дарбоз Тўрабой Ешчанов раҳбарлигидаги "Жайҳун” сим-дор гуруҳи иштирок этиб, минглаб томошабинлар ва кўрик-фестиваль ташкилотчиларининг эътибор ва олқишларига сазовор бўлишди. Тўрабой дорбоз раҳбарлигидаги гуруҳ аъзолари – дорбозлар Каримбой Бобожонов, Жавлонбек Тўраев ва акробатика санъати устаси Рашиджон Султоновлар томонидан моҳирлик билан ижро этилган дорбозлик ва акробатика ўйинлари юқори баҳоланиб "Жайҳун” сим-дор гуруҳи Ўзбекистон Республикаси маданият ва спорт ишлари вазирлиги ҳамда халқ ижодиёти ва маданий-маърифий ишлар Республика илмий услубият марказининг Фахрий Диплом билан тақдирланишди.

Маърифат ва зиё улашиб

"Ўз Давкитоб савдо таъминоти” МЧЖнинг 12-филиали Манғит шаҳрида жойлашган. Мазкур филиал бугунги кунда туманимиз китобсеварларининг илм-маърифат ва маънавият масканига айланган. Чунки филиал китоб савдоси билан шуғулланувчи ягона савдо шохобчаси бўлиб, бу ердан барча соҳаларга оид адабиётларни топиш мумкин.

- Кўпроқ бадиий адабиётлар, Президент асарларига талаб катта, - дейди филиал бўлими бошлиғи Озод Давлетов. – Ўзбекистон Миллий Энциклопедияси, соҳаларга оид энциклопедияларига буюртма берувчилар ҳам кўпчиликни ташкил этади.

Филиал китоб дўконида ойлик ва йиллик режалар ортиғи билан уддаланаётгани боис, иқтисодий ўсиш суръатлари ҳам юқори. Ойига 8-9 миллион сўмлик савдо айланмасига эга филиал ҳисобидаги маблағ айни кунда 22 миллион сўмни ташкил этади.

Оила ва эл ободлиги йўлида

"Чойкўл” овулининг С.Айний номли аҳоли пунктида касаначи Насиба Камоловани барча ишбилармон ва чевар аёл сифатида яхши билишади. Ўз уйида чеварлик устахонасини ташкил этиб овул ёшларига бичиш-тикиш сирларини ўргатаётган Насиба Камолованинг айни пайтда ўнлаб шогирдлари ўз чеварлик фаолиятини бошлаб юборишган. Касаначилик фаолиятидан даромад топиб, оиласи ва эл ободлиги учун ҳисса қўшаётган чеварлар меҳнатидан овулдошлари ҳам мамнун.

Режалари қатъий

Манғит шаҳридаги 36-умумтаълим мактабини бу йил 87-нафар ўғил-қизлар битказиб чиқишди. Уларнинг ҳар бирининг келажак учун танлаган қатъий режалари бор. Касб-ҳунар коллежларида, академик лицейда таълимни давом эттириш, ихтисослик эгаллаш ва кейинчалик олий ўқув юртларида илм олиб, малакали кадрлар бўлиб етишиш.

Мактаб маъмурияти битирувчиларнинг ота-оналари билан  бамаслаҳат уларнинг таълимнинг уларнинг таълимнинг кейинги босқичига тўла жалб этиш чора-тадбирларини кўрмоқда.

Аҳоли бандлиги таъминланмоқда

Манғит шаҳрининг Ойбек номли маҳалласида 578 та хонадонда 3500 нафардан ортиқ турли миллат вакиллари аҳил ва иноқ яшашмоқда.

Ҳудудда 1 та умумтаълим мактаби, 1 та боалар боғчаси, 1 та хусусий тўйхона, 5 та дўкон, 6 та маиший хизмат кўрсатиш шоҳобчалари фаолият олиб бормоқда.

Маҳалла ишга яроқли  аҳолисининг бандлигини таъминлаш мақсадида туман Бандликка кўмаклашиш маркази билан ҳамкорликда ҳудуддаги 1-ғишт заводига 48 нафар ёшлар мавсумий ишларга, 4 нафар ёшлар касаначилик, 22 нафари оилавий тадбиркорлик, 14 нафари ҳунармандлик, 2 нафари тунукасозлик фаолиятига жалб қилинди. 8 нафар хотин-қизларга уйларида паррадачилик билан шғулланишлари учун имтиёзли кредитлар олишга кўмаклашилди.

Маҳалла ёшлари коллежда ўқишади

Ойбек маҳалласи ҳудудидаги бу йил 68 нафар ўғил-қизлар умумтаълим мактабининг 9 синфларини битириб чиқишди.

Уларни таълимнинг кейинги босқичига тўла жалб этиш мақсадида маҳалла, мактаб маъмурияти ўқувчилар ва уларнинг ота-оналари билан суҳбатлар ўтказди, уларга 12 йиллик таълимнинг мажбурийлиги, бунда ота-оналарнинг масъулияти, шунингдек, ўқиш даврида болаларни узлуксиз назорат қилиб боришнинг лозимлиги эрта никоҳнинг олдини олиш каби мавзуларда суҳбатлар ўтказишди.

Ҳозирги кунда  9 синф битирувчилари касб-ҳунар коллежларига тўлиқ бириктириб бўлинди.

Маҳаллада йиғилиш

Яқинда "Олмазор” маҳалласида жиноятчиликнинг олдини олиш ва соғлом турмуш тарзини барқарорлаштириш масалаларига бағишланган йиғилиш бўлиб ўтди.

Йиғилишда туман прокурорининг катта ёрдамчиси Р.Холмуродов иштирок этди ва кун тартибидаги масала юзасидан маъруза қилди. Йиғилишда маҳалла ҳудудида турли ҳуқуқ-бузарликларнинг олдини олишга қаратилган тушунтириш тарғибот ишларини янада янги босқичга кўтариш, ёшларнинг турли оқимларга кириб кетишининг олдини олиш, оилаларда фарзандлар тарбиясига масъулият билан қараш каби вазифалар муҳокама қилинди.