Obod turmush yili yangiliklari

Eʼtibor va olqish olib

Shu yilning 14-15-iyul kunlari Toshkent shahrining eng fayzli maskanlaridan biri – Milliy bogʻda boʻlib oʻtgan oʻzbek milliy dorbozlar guruhi, anʼanaviy tsirk sanʼati va havaskor qoʻgʻirchoq teatrlarining anʼanaviy respublika koʻrik-festivalida Qoraqalpogʻiston Respublikasi nomidan tumanimizdan chiqqan mashhur darboz Toʻraboy Yeshchanov rahbarligidagi "Jayhun” sim-dor guruhi ishtirok etib, minglab tomoshabinlar va koʻrik-festival tashkilotchilarining eʼtibor va olqishlariga sazovor boʻlishdi. Toʻraboy dorboz rahbarligidagi guruh aʼzolari – dorbozlar Karimboy Bobojonov, Javlonbek Toʻrayev va akrobatika sanʼati ustasi Rashidjon Sultonovlar tomonidan mohirlik bilan ijro etilgan dorbozlik va akrobatika oʻyinlari yuqori baholanib "Jayhun” sim-dor guruhi Oʻzbekiston Respublikasi madaniyat va sport ishlari vazirligi hamda xalq ijodiyoti va madaniy-maʼrifiy ishlar Respublika ilmiy uslubiyat markazining Faxriy Diplom bilan taqdirlanishdi.

Maʼrifat va ziyo ulashib

"Oʻz Davkitob savdo taʼminoti” MChJning 12-filiali Mangʻit shahrida joylashgan. Mazkur filial bugungi kunda tumanimiz kitobsevarlarining ilm-maʼrifat va maʼnaviyat maskaniga aylangan. Chunki filial kitob savdosi bilan shugʻullanuvchi yagona savdo shoxobchasi boʻlib, bu yerdan barcha sohalarga oid adabiyotlarni topish mumkin.

- Koʻproq badiiy adabiyotlar, Prezident asarlariga talab katta, - deydi filial boʻlimi boshligʻi Ozod Davletov. – Oʻzbekiston Milliy Entsiklopediyasi, sohalarga oid entsiklopediyalariga buyurtma beruvchilar ham koʻpchilikni tashkil etadi.

Filial kitob doʻkonida oylik va yillik rejalar ortigʻi bilan uddalanayotgani bois, iqtisodiy oʻsish surʼatlari ham yuqori. Oyiga 8-9 million soʻmlik savdo aylanmasiga ega filial hisobidagi mablagʻ ayni kunda 22 million soʻmni tashkil etadi.

Oila va el obodligi yoʻlida

"Choykoʻl” ovulining S.Ayniy nomli aholi punktida kasanachi Nasiba Kamolovani barcha ishbilarmon va chevar ayol sifatida yaxshi bilishadi. Oʻz uyida chevarlik ustaxonasini tashkil etib ovul yoshlariga bichish-tikish sirlarini oʻrgatayotgan Nasiba Kamolovaning ayni paytda oʻnlab shogirdlari oʻz chevarlik faoliyatini boshlab yuborishgan. Kasanachilik faoliyatidan daromad topib, oilasi va el obodligi uchun hissa qoʻshayotgan chevarlar mehnatidan ovuldoshlari ham mamnun.

Rejalari qatʼiy

Mangʻit shahridagi 36-umumtaʼlim maktabini bu yil 87-nafar oʻgʻil-qizlar bitkazib chiqishdi. Ularning har birining kelajak uchun tanlagan qatʼiy rejalari bor. Kasb-hunar kollejlarida, akademik litseyda taʼlimni davom ettirish, ixtisoslik egallash va keyinchalik oliy oʻquv yurtlarida ilm olib, malakali kadrlar boʻlib yetishish.

Maktab maʼmuriyati bitiruvchilarning ota-onalari bilan  bamaslahat ularning taʼlimning ularning taʼlimning keyingi bosqichiga toʻla jalb etish chora-tadbirlarini koʻrmoqda.

Aholi bandligi taʼminlanmoqda

Mangʻit shahrining Oybek nomli mahallasida 578 ta xonadonda 3500 nafardan ortiq turli millat vakillari ahil va inoq yashashmoqda.

Hududda 1 ta umumtaʼlim maktabi, 1 ta boalar bogʻchasi, 1 ta xususiy toʻyxona, 5 ta doʻkon, 6 ta maishiy xizmat koʻrsatish shohobchalari faoliyat olib bormoqda.

Mahalla ishga yaroqli  aholisining bandligini taʼminlash maqsadida tuman Bandlikka koʻmaklashish markazi bilan hamkorlikda hududdagi 1-gʻisht zavodiga 48 nafar yoshlar mavsumiy ishlarga, 4 nafar yoshlar kasanachilik, 22 nafari oilaviy tadbirkorlik, 14 nafari hunarmandlik, 2 nafari tunukasozlik faoliyatiga jalb qilindi. 8 nafar xotin-qizlarga uylarida parradachilik bilan shgʻullanishlari uchun imtiyozli kreditlar olishga koʻmaklashildi.

Mahalla yoshlari kollejda oʻqishadi

Oybek mahallasi hududidagi bu yil 68 nafar oʻgʻil-qizlar umumtaʼlim maktabining 9-sinflarini bitirib chiqishdi.

Ularni taʼlimning keyingi bosqichiga toʻla jalb etish maqsadida mahalla, maktab maʼmuriyati oʻquvchilar va ularning ota-onalari bilan suhbatlar oʻtkazdi, ularga 12 yillik taʼlimning majburiyligi, bunda ota-onalarning masʼuliyati, shuningdek, oʻqish davrida bolalarni uzluksiz nazorat qilib borishning lozimligi erta nikohning oldini olish kabi mavzularda suhbatlar oʻtkazishdi.

Hozirgi kunda  9-sinf bitiruvchilari kasb-hunar kollejlariga toʻliq biriktirib boʻlindi.

Mahallada yigʻilish

Yaqinda "Olmazor” mahallasida jinoyatchilikning oldini olish va sogʻlom turmush tarzini barqarorlashtirish masalalariga bagʻishlangan yigʻilish boʻlib oʻtdi.

Yigʻilishda tuman prokurorining katta yordamchisi R.Xolmurodov ishtirok etdi va kun tartibidagi masala yuzasidan maʼruza qildi. Yigʻilishda mahalla hududida turli huquq-buzarliklarning oldini olishga qaratilgan tushuntirish targʻibot ishlarini yanada yangi bosqichga koʻtarish, yoshlarning turli oqimlarga kirib ketishining oldini olish, oilalarda farzandlar tarbiyasiga masʼuliyat bilan qarash kabi vazifalar muhokama qilindi.