ТОТУВЛИК ТАФТИДАН МУНАВВАР ХОНАДОН

Тотувлик – миллатларни бир-бирига қон-қардош, кўнгилларни пайваста қилгувчи туйғу. Тотувлик бор жойда қут-барака, файз, тинчлик ва аҳиллик, меҳр-оқибат, тараққиёт бўлади.

Аҳолисининг кўпчилик қисми туркман миллатига мансуб инсонлар бўлган Амир Темур номли овулда ҳар гал бўлганимда ана шулар ҳақида ўйлайман. Ва беихтиёр Биринчи Президентимиз И.А.Каримовнинг: "Ўзбекистоннинг бойликлари жуда кўп. Лекин бизнинг энг катта бойлигимиз, энг юксак қадриятимиз – жамиятимизда ҳукм сураётган тинчлик, миллатлараро дўстликдир”, – деган пурмаъно сўзларини эслайман. Назаримда улуғ Юртбошимизнинг бу фикрлари айнан Амир Темур номли овулнинг бири-бирини кўз қиймас, ораларидан қил ўтмас, аҳил-иноқ аҳолисига қарата айтилгандай.

Овулнинг "Меҳнаткаш” маҳалласининг ўзида 832 нафардан ортиқ туркман миллатига мансуб аҳоли истиқомат қилади. 105 та хонадонга бириккан 150 дан зиёд оилаларнинг аксарияти ёшлар оиласи.

– Туркман оилаларида фарзандлар тарбиясига алоҳида эътибор билан қарашади, – дейди Амир Темур номли ОФЙнинг диний маърифат ва маънавий-ахлоқий тарбия масалалари бўйича маслаҳатчиси Зулфия опа Йўлдошева. – Айниқса, қиз болаларни жуда  ёшлигидан ҳаётга тайёрлашади. Уларнинг бичиш, тикиш, гилам тўқиш, уст кийимларни йўрма нақшлар билан безаш, пазандалик санъатини пухта эгаллашлари шарт ҳисобланади.

Зулфия опанинг сўзлари исботини биз овулнинг "Меҳнаткаш” маҳалласида яшовчи меҳнат фахрийси Тиркаш оға Аманов ва Ўғилгул эже Жумашевалар оиласида кўрдик.

"Меҳнаткаш” маҳалласида, оддий деҳқон оиласида туғилиб-ўсган, то нафақага чиққунига қадар туманнинг аграр соҳасини ривожлантиришга катта ҳисса қўшган, гоҳ пахтачилик бригадаси бошлиғи, гоҳ зироатчи деҳқон сифатида умрини меҳнат майдонларида ўтказган Тиркаш оға ва Ўғилгул эже бири-биридан ақлли, меҳнатсевар фарзандларни тарбиялаб, элга қўшишди. Ўғиллари Дурдимурод, Бобомурод, келинлари Ўғилгарак ва Шакаржон, қизлари Ўғилжамол ҳамда Жаннатхонларнинг бири тадбиркор, бири ўқитувчи – барчаси эл корига камарбаста, ўзларидан тиниб, бахтли оила соҳиб ва соҳибалари бўлишган.

Наврўз байрами арафасида Тиркаш оға хонадонида бўлганимизда "ўнг бўлсин” маросими ўтказилаётган экан. Халқимизнинг қон-қонига сингиб кетган азалий урф-одатлари, бетакрор удумлари жуда кўп. Айниқса, туркман хонадонидаги "ўнг бўлсин” маросими ўзига хослиги билан ажралиб туради. Амир Темур номли овулда барпо этилган уч хонали намунали уйлардан бирига кўчиб ўтган оила аъзоларининг қувончи чексиз. Оила бекаси Ўғилгул эже келинлари ва қизлари билан меҳр-муҳаббатини қўшиб, соф жундан тўқиган туркмани гиламлар жозибасидан янада кўркам қиёфа касб этган хонадон дастурхони атрофи янги қўшни-ю қариндошлар билан гавжум. Ўғилгул эженинг азиз меҳмони бўлган ўзбек, қорақалпоқ миллатига мансуб янги қўшнилар бир-бирларининг қувончларига шерик.

Янги иморатга "ўнг бўлсин” айтиб келган меҳмонларга Тиркаш оға билан Ўғилгул эженинг кенжа келини ажиб тавозъе ила салом берганида, овулнинг туркман оилалари фарзандларига илм ўргатган устоз, меҳнат фахрийси Биби эже Аннасанова жўшиб-жўшиб туркманча ёр-ёрлар, ўланлар куйлади.

Бу ўланлардан кўнгиллар завққа тўлди. Ўзбек, туркман, қорақалпоқ миллатларига мансуб янги қўшнилар келинчакка эзгу тилаклар тиладилар. Гурбангул эже Аннамедова янги келинчакка "иш буюрди” маросимини ўтказди. Ўн бармоғинг ҳунарли бўлсин, деб урчуқ, хонадонингга қут-барака келтиргин, сариёғдай ёқиб қол деб, қатиқ ва сариёғ ушлатди. Янги иморат, янги оилага "ўнг бўлсин”лар айтишди. Овулнинг ёшулли отахони Холбой Буважонов қўлини дуога очди.

Отахоннинг тилаклари ижобат бўлишини чин дилдан тиладик. Тиркаш оғанинг бири-биридан ширин неваралари тилидан туркманча, ўзбекча янграган шеърлар айдимлардан кўнгиллар завққа тўлди. Туманимиздаги 25-сонли умумтаълим мактабида ўқувчиларга туркман тили ва адабиёти ҳамда  қорақалпоқ тили ва адабиётидан дарс берувчи муаллима келин Шакаржон Байрамдурдиева дамлаган ўзбекона палов билан чалпак дастурхонга тортилганида тўкин-сочинликдан, ўзаро меҳр-оқибатдан кўнгиллар нурланди. Тиркаш оға билан Ўғилгул эженинг кенжа келини ўз қўллари билан тиккан келинлик сарполарида, янги иморатга кўрк бағишлаб турган туркмани гиламларда гўё олам гўзалликлари акс этиб, бу гўзалликдан кўнгиллар яшнаб кетди.

Робия ЙЎЛДОШЕВА.