ЁШЛАР АСЛ МИЛЛИЙ ҲУНАРИМИЗНИ ЎРГАНИШМОҚДА
Асрлар оша ота-боболаримиздан мерос бўлиб келаётган шундай ҳунарлар борки, қанча вақтлар ўтса-да, қадр-қиммати йўқолмайди, халқ орасида урфдан қолмайди.
Зардўзлик, каштачилик ҳунари ҳам шуларнинг бири. Шу боисдан ҳам 2013 йилда 21-сонли Болалар мусиқа ва санъат мактабида зардўзлик ва каштачилик синфи очилганида ҳудуд аҳолиси қувониб-қувониб, қизларини шу ҳунарни ўрганиш учун етаклаб келишди.
Мазкур синф ўқувчиларига касб-ҳунар коллежини тўқимачилик мутахассислиги бўйича тугатган Хонимжон Исмоилова таълим бермоқда. Мураббий ишни зардўзлик, каштачилик учун керакли махсус асбоб-ускуна, жиҳозларни олиб келишдан бошлади. Эринмай Самарқанд, Бухоро шаҳарларига бориб, шу ҳунар усталаридан тажриба ўрганиб қайтди ва синф ўқувчиларига билганларини эринмай ўргатиб келмоқда. Дарс машғулотлари жараёнида ҳар бир кашта ё зардўзлик намуналари қандай кийимларни безатишда ишлатилиши, шу ҳунар орқали оддий бир кийимнинг улкан эътиборга лойиқ бўлишини қунт билан тушунтиради. Момоларимиз шу ҳунар орқали эларо машҳур бўлганликларини айтади.
Сидқидилдан қилинган меҳнат самарасиз бўлмайди. Хонимжон Исмоиловадан ҳунар ўрганаётган қизлар эришаётган ютуқлар ҳам талайгина. 2015 йилда Моҳира Собирова қўл ҳунари бўйича ўтказилган кўрик-танловда каштачилик, зардўзлик йўналишида туманда биринчи, якуний – Қорақалпоғистон Республика босқичида 2-ўринни, 2016 йилда эса яна туманда биринчи ўринни олиб, кейинги босқичда ҳам фаол қатнашиб келди.
Синфхонага кирган киши ўқувчилар тўқиган кийим, буюмларни, зардўзлик, каштачилик намуналарини кўриб, кўзи қувнайди. Асл миллий ҳунаримизнинг жозибасини сидқидилдан ҳис қилади ва беихтиёр мана шундай ибратли ишларни амалга ошираётган мактаб маъмуриятига, мураббийларига раҳматлар айтади.
Ойгул Ражабова.
Суратда: Х.Исмоилова ўқувчилари билан.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
