“Обод турмуш йили“ янгиликлари

ЭЛДАН ОЛҚИШ ОЛИБ

Назархон овули туманимизнинг энг чекка ҳудудларидан саналади. Лекин  шундай бўлса-да овул ёшлари ҳар соҳада фаол, интилувчан. Ўз оиласи, овул-эли, она юрт тараққиёти учун фидойи меҳнат қилиш, янгиликлар яратиб яшаш улар учун ҳаёт мазмунига айланган. Муяссар Холмуродова ана шундай фидойи ёшлардан. У ўз уйида тикувчилик цехи очиб, ҳам 3-4 нафар ҳамқишлоқ қизларни иш билан таъминлади, ҳам ўзи доимий ишли бўлди.

Ўз оиласи, фарзандлари бағрида касаначилик фаолияти билан шуғулланиб, ҳамқишлоқлари олқишига сазовор бўлаётган Муяссар Холмуродова устоз-шогирд анъанаси асосида  ундан чеварлик сирларини ўрганувчи овул ёшлари учун хонадонига яна камида 2 та тикув машинаси ўрнатиш ниятида.

 Уй ҳайвонларига ветеринария хизмати

"Чойкўл” овули ҳудудида яшовчи аҳоли ихтиёридаги уй ҳайвонларига ветеринария хизмати кўрсатувчи ветеринария фельдшери Юсуфбой Аҳмедовнинг хизматидан барча мамнун. Чунки у ўзига биркитилган ҳудудда уй ҳайвонлари, айниқса, парранда ва қорамолларни турли хил касалликларга қарши эмлаш  ишларини ўз вақтида олиб боргани боис, уй ҳайвонларининг бруцеллёз, кана чақиши, оқсил, қорасон каби касалликларга чалиниш ҳолатлари кескин камайган. Аҳоли қарамоғидаги уй ҳайвонлари дуркун ривожланмоқда.

 30 йилдан сўнгги дийдорлашув

Туманимиздаги 22-сонли мактабни 1983 йилда тугатган собиқ синфдошлар 30 йилдан сўнг қадрдон мактабларида қайта учрашдилар. Барчаси оилали, неварали бўлган собиқ ўқувчилар мустақиллик даврида янгидан қурилган, замонавий компьютер техникалари билан жиҳозланган мактабда устозлари даврасида ўзлари эришган ютуқлардан сўзладилар. Ҳаётдан эрта кетган дўстлари, азиз устозларини хотирлаб, ёдга олдилар.

 Инсон омилига эътибор

"Қорақалпоқ қишлоқ қурилиш сервис” МЧЖ ишчилари учун корхона ҳудудида барча қулайликларга эга ҳаммом қурилиши жадаллик билан олиб борилмоқда.

Ҳаммом битса, бир йўла 5-6 нафар мижозни қабул қилиш имконияти яратилади.

- Корхонамизда инсон омилига эътибор катта. Шунинг учун ҳам ишимизда сифат ва самара юқори, - дейди корхона ишчиси Жумабек Айтмуротов.

 Аҳоли бандлиги таъминланмоқда

Манғит шаҳрининг Ойбек номли маҳалласида 578 та хонадонда 3500 нафардан ортиқ турли миллат вакиллари аҳил ва иноқ яшашмоқда.

Ҳудудда 1 та умумтаълим мактаби, 1 та болалар боғчаси, 1 та хусусий тўйхона, 5 та дўкон, 6 та маиший хизмат кўрсатиш шохобчалари фаолият олиб бормоқда.

Маҳалла ишга яроқли аҳолисининг бандлигини таъминлаш мақсадида туман Бандликка кўмаклашиш маркази билан ҳамкорликда ҳудуддаги 1-ғишт заводига 48 нафар ёшлар мавсумий ишларга, 4 нафар ёшлар  касаначилик, 22 нафари оилавий тадбиркорлик, 14 нафари ҳунармандлик, 2 нафари тунукасозлик фаолиятига жалб қилинди. 8 нафар хотин-қизларга уйларида паррандачилик билан шуғулланишлари учун имтиёзли кредитлар олишга кўмаклашилди.

 "Парвоз - 2013”

Манғит шаҳрида жойлашган НДПИ қошидаги 3-сонли академик лицейда тугалланган ўқув йилида  687 нафар иқтидорли йигит-қизлар 4 та йўналиш бўйича бугунги  кун талаби даражасида таълим-тарбия олдилар. Шуларнинг 232 нафари лицейни муваффақиятли тамомлашди.

Шу йилнинг 26 июнида битирувчиларга диплом топшириш маросими – "Парвоз - 2013”дея номланган тадбир бўлиб ўтди.

Тадбирни лицей директори Отабек Йўлдошев очди ва ўқув муассасасидан учирма бўлаётган битирувчиларнинг парвози юксак бўлишини тилади. Сўзга чиққан битирувчилар 3 йил мобайнида ўз фарзандларидек ғамхўрлик қилиб, таълим-тарбия берган устозларига миннатдорчилик билдирдилар.

Нодиранинг дўстлари кўпайди

83-мактаб боғча мажмуасининг 4-синфини аъло баҳоларга тугатган, фаол ўқувчи Нодира Эшимбетова Манғит шаҳрининг "Олмазор” маҳалласида яшайди.

У ёзги таътилни бекор ўтказмаслик учун Тошкентдаги "Чимён” болалар ёзги оромгоҳида бўлиб қайтди.

Оромгоҳда ўз тенгқурлари билан турли спорт мусобақалари ва танловларда фаол иштирок этиб, кўплаб дўстлар орттирган Нодиранинг оромгоҳда болажонлар учун яратилган шароитлардан қувончи чексиз.

 Суғориш маромида олиб борилаяпти

Чойкўлдаги Нурулла Ердошев раҳбарлигидаги фермер хўжалиги деҳқонлари жорий йилда 80 гектар пахта майдонидан 168 тонна ҳосил етиштириш ниятида меҳнат қилмоқдалар.

Айни кунларда бегона ўтлардан тозаланган пахта ниҳолларини суғориш ишлари маромида олиб борилмоқда.

Хўжалик пахта далаларида ниҳоллар тўлиқ ва ривожи яхши.

 ҚВПда йиғилиш ўтказилди

Ўзбекистон Республикаси Президенти томонидан 2013 йил 30 апрель куни имзоланган "Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Ўзбекистон Республикаси Қонунига мувофиқ никоҳ ёшига амал қилмасликка қарши қабул қилинган жазо чораларининг мазмун-моҳиятини, ўзгаришларга тўла-тўкис амал қилиш лозимлигини оммага кенг тарғиб қилиш мақсадида умумтаълим, касб-ҳунар таълими муассасаларида, маҳаллаларда ота-оналар, ёшлар билан йиғилишлар ўтказилаяпти.

Ана шундай йиғишлардан бири яқинда "Олмазор” қишлоқ врачлик пунктида бўлиб ўтди.

Ҳудуд аҳолиси туман ҳокими ўринбосари, хотин-қизлар қўмитаси раиси М.Аҳмедова, туман ФҲДЁ бўлими мудираси Н.Қўчқорова, туман тиббиёт бирлашмаси бош гинекологи Д.Абдураимоваларнинг шу мавзудаги маърузаларини тингладилар ва ўзларини қизиқтирган саволларга жавоб олдилар.

 Ишлайман, деганга имкон кўп

Хитой овулида аҳолининг иш билан бандлигини таъминлашга алоҳида эътибор берилади. Айни кунда 10 нафар овул ёшлари якка тартибда иморатлар қурилишида меҳнат қилишмоқда. Бундан ташқари, 3 нафар аёл-қизлар касаначилик фаолияти билан шуғулланиб, чеварлик сирларини ўрганишмоқда.

 Пантон кўприк мукаммал таъмирланади

4Р181 "Қипчоқ-Манғит ш. – Туркманистон Республикаси чегараси” давлат аҳамиятидаги автомабиль йўлининг 4-километрида жойлашган Қипчоқ пантон кўпригини Республика йўл жамғармаси ҳисобидан капитал таъмирлаш ишлари бошланмоқда.

Икки босқичда, яъни 2013 ва 2014 йилларда амалга оширилиши мўлжалланган бу капитал таъмирлаш ишларининг умумий тендер баҳоси 3 млрд. 304 миллион сўмни ташкил этади.

Пантон кўпригини таъмирлаш ишлари Тахиатошдаги Қорақалпоғистон кўприк хўжалигини сақлашга ихтисослаштирилган таъмирлаш, фойдаланиш корхонаси томонидан амалга оширилади.