КАСБ МАСЪУЛИЯТИНИ ЧУҚУР АНГЛАБ
Мустақиллик йилларида таълим-тарбия соҳасига қаратилган улкан эътибор туфайли ёш авлодга билим асосларини пухта ўргатиш, уларнинг дунёқарашини кенгайтириш, маънавий-ахлоқий сифатларни шакллантиришга эришилмоқда. Таълим-тарбия жараёнига кўплаб ўзгартиришлар, янгича ёндошувлар татбиқ этилмоқда.
Педагог кадрларнинг узлуксиз малака ошириб боришини таъминлашда "Устоз-шогирд” анъанаси жуда аҳамиятлидир. Мазкур усулда ўқув йили давомида амалга оширилган ишлар, илғор тажрибалар ўрганилиши, энг билимдон шогирд тайёрлаган устозлар тажрибаларини алмашиш, ўрганиш таълим сифатининг ошишига хизмат қилмоқда.
Бизнинг мактабимизда ҳам яратилган шароитлардан унумли фойдаланиб, самарали фаолият олиб бораётган ўқитувчиларимиз талайгина. Муассасамиз таълим сифати параметр кўрсаткичлари бўйича рейтингда туманда бешинчи ўринни эгаллади. Бу ютуқда француз тили ўқитувчиларининг ҳиссаси айниқса улкан.
Айни кунда нафақада, кексалик гаштини суриб яшаётган, мактабимизнинг собиқ француз тили ўқитувчиси Қурол ака Сафарбоев маҳорат билан дарс бериб, уларнинг кўнглида ўз касбига ихлос уйғота олган уч нафар ўқувчиси ҳозир устоз ишини қунт билан давом эттиришмоқда. Жамила Ҳайтакова – шуларнинг бири. Унинг мактабимиздаги ўқитувчилик фаолияти 1996 йилда бошланган.
Ўқитувчи маҳорати ўқувчиларининг фанни ўзлаштиришида, эришган ютуқларида акс этади. Жамила Ҳайтакованинг ўқувчилари 2012-2013 ўқув йилида Билимлар беллашувининг Ўзбекистон босқичи ғолиби, 2013-2014 ўқув йилида фанлар олимпиадасининг Қорақалпоғистон босқичи ғолиби бўлганлиги унинг ўз фанига шогирдларини қанчалик қизиқтира олганини ва ўзлаштиришларига эришганини кўрсатади.
Қурол Сафарбоевдан дарс бериш усулларини, болалар кўнглига йўл топиш сирларини чуқур ўрганган муносиб издошлар француз тили фани ўқитувчилари Роза Йўлдошева ва Мунаввар Холмуродовалардир.
Улардан таълим-тарбия олаётган ўқувчилар ҳам Билимлар беллашуви, фанлар олимпиадаси ва бошқа турли кўрик-танловларда ўзларининг салоҳияти ва фан асосларини чуқур ўзлаштирганликлари туфайли доимо ғолиблар сафида бўлишмоқда.
Мамлакатимизда ҳеч бир эзгу иш эътибордан четда қолмайди. Жамила Ҳайтакова 2014 йилда "Ўзбекистон Республикаси халқ таълими аълочиси” кўкрак нишони билан тақдирланганлиги бунинг исботидир.
Мен ишонч билан айта оламанки, дунёнинг ҳеч бир бурчагида бизнинг мамлакатимиздагидек ўқитувчи, мураббийлик касби улуғланган мамлакат йўқ. 1996 йилдан бошлаб, ҳар йили 1 октябрь – Ўқитувчилар ва мураббийлар куни умумхалқ байрами сифатида нишонланиши йўлга қўйилганлиги ҳам фикримизнинг далилидир.
Биз бундан фахрланамиз ва ана шундай юксак эътиборга лойиқ меҳнат қилишга интиламиз.
Бекмурод
ШОМУРОДОВ,
22-сонли мактаб директори.
(Фото: http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
