БУЮК ИНСОННИ ХОТИРЛАБ

Инсон ўзи учун энг азиз нарсасини йўқотса, ўзини қўйгани жой тополмайди, ҳаёт ҳам маъноси йўқдай туюлади, юриштуришида, қилаётган ишида унум бўлмайди.

Президентимиз И.А.Каримов бетоблигини эшитганимизда кўпчилик шу аҳволга тушди: ҳамма дуода, ҳамма илтижо қилган, бутун мамлакат Юртбошимиз соғлигини тилаган эди.

Афсус, ўлим ҳақ, Аллоҳнинг иродаси шу экан, тақдир бизни буюк инсондан, ўзбекни "ўзига бек” қилган, миллатни дунёга  танитган, юртини обод, халқини фаровон қила олган, ҳаммамизга ота бўлиб, бошимизни силаган Юртбошимиз И.Каримовдан жудо қилди.

Мотам кунларида бутун дунё аҳли ўзбек халқи, Ўзбекистонда яшаган ҳар бир фуқаро ўз Юртбошисини қандай севишига, унга қандай меҳр қўйганлигига гувоҳ бўлди.

И.А.Каримов 1990 йил 24 мартда Ўзбекистон Республикаси Олий Совети сессиясида Ўзбекистон Президенти қилиб сайланган эди. Собиқ иттифоқ даврида республикалар орасида биринчилардан бўлиб Президентлик бошқарувини жорий қилган журъатли ва дадил инсон, билимдон ва қўрқмас раҳбар эдилар.

... Ўшанда мен собиқ иттифоқ халқ депутати қилиб сайланган  эдим, ёш ва тажрибасизман, бошқарув тизимига унчалик тушунмасдим. Лекин бир ҳақиқатни жуда яхши билардим: И.Каримов Ўзбекистоннинг биринчи раҳбари бўлиб сайланганида унга қолдирилган мерос жуда аянчли эди: иқтисод издан чиққан, завод-фабрикалар ишламайди, ўлкада пахта яккаҳокимлиги ҳукм сурар, одамлар қашшоқ ва тушкун, кўпчилик эртанги кунига ишонмас, уларни руҳлантириб, олдинга етакловчи сиёсий куч ҳам йўқ – "ғоявий бўшлиқ” ҳукмрон эди. "Биз эскича яшаёлмаймиз, бундай яшашга замоннинг ўзи йўл қўймайди”, - деган И.Каримов дадил ва қўрқмасдан иш бошлади, халқини, ҳатто дунё сиёсатдонларини ҳам узоқни кўзлаб, халқ манфаатларини ҳимоя қилиб тузилган режасига ишонтира билди ва орқасидан эргаштира олди.

Унинг биринчи қилган иши "пахта иши” деб аталган, минглаб ўзбек оилалари ва миллатнинг етакчи кучлари жабрланган ва меҳнаткаш ҳалқ пешонасига босилган "қора тамға”ни олиб ташлаш бўлди. У бу ҳақда биз - ўша пайтдаги ўзбекистонлик СССР халқ депутатларини йиғиб, йўл-йўриқ кўрсатдилар.

Фарғона, Паркент, Бўка, Тошкент, Андижон воқеаларида Юртбошимиз ўз халқининг тинч яшаши учун қўлидан келган ҳамма ишни қилди: ҳалок бўлганларнинг оилаларини қўллаб-қувватлади, билиб-билмай ёвуз кучларга қўшилиб қолган ватандошларимизни бағрикенглик билан кечирди, уларга ўз элида ва болалари бағрида яшашлари учун яна имкон берди. Шу билан бирга минтақада тинчликни сақлаш учун дунё минбарларидан бонг урди, қўшни давлат раҳбарларини ҳамжиҳат ва дўст бўлиб яшашга чорлади, фуқаролар уруши ва хунрезликларнинг олдини ола олди. Ўз халқининг келажагини кўра олган раҳбар сифатида тараққиётнинг "Ўзбек модели” деб аталган ва бугун бутун дунё тан олган йўлга халқини бошлар экан, доим оддий халқ билан бирга бўлишга  ҳаракат қилди, халқни эртанги кун учун меҳнат қилишга ундади, ўз келажагига ишонтира олди. Ғалла мустақиллиги учун курашди. Халқимиз келажаги учун қилинган эзгу ишлар - санаб адо бўлмайдиган юртимиздаги ўсиш-ўзгаришлар, жамики эзгуликлар бевосита Юртбошимизнинг саъй-ҳаракатлари натижаси эканлигини ҳар биримиз яхши биламиз, бу ислоҳотларда ўзимиз ҳам руҳланиб иштирок этганмиз.

Халқимиз юртини обод, турмушини фаровон қилган инсоннинг хотирасини ҳеч қачон унутмайди. У бошлаб берган йўлдан ҳеч қачон адашмайди. Буюк инсон бошлаб берган эзгуликлар авлодлар орқали давом этаверади.

Санобар ХЎЖАМУРОДОВА,

40-сонли мактаб директори, халқ депутатлари туман Кенгаши депутати.

(Фото - http://uza.uz)