МАҚСАДИМИЗ – СОҒЛОМ ТУРМУШ ТАРЗИНИ ҚАРОР ТОПТИРИШ

Бизнинг Қиличбой овулимизда жами аҳоли сони 5284 нафар бўлиб, оилалар сони 1217 тани ташкил этади. Ушбу оилаларда 2670 нафар аёл-қиз, 1740 нафар вояга етмаган ёшлар истиқомат қилади.

Оилаларда соғлом муҳит, меҳр-оқибат, ўзаро ҳурмат ва тотувлик барқарор бўлмоғи, фарзандларимизни ёшлигидан ҳалол яшашга ўргатиш, саранжом-саришталик - буларнинг барчаси маҳалладаги соғлом турмуш тарзини қарор топтиришда муҳим омиллардан бири ҳисобланади.

Ҳар бир оилага кириб, аҳоли саломатлигидан хабардор бўлиб, оиланинг ижтимоий-маънавий муҳитини яхшилаш ишларини тизимли олиб бораётган "Саломатлик сектори” аъзоларимиз, маҳалла фаолларимиз билан ҳафтанинг белгиланган кунида режа асосида иш олиб боришмоқда. Ёшларни оилага тайёрлаш, соғлом турмушни кенг тарғиб қилиш мақсадида йиғин ҳузуридаги "Ораста қизлар” давраси аъзолари билан маҳаллаларимизда "Энг гулзор оила”, "Энг сариштали хонадон” каби тадбирларимиз маҳаллаларни ободонлаштириш ва санитария ҳолатини яхшилашда сезиларли таъсир ўтказмоқда. Йиғин ҳузуридаги "Хотин-қизлар билан ишлаш комиссияси”, "Маънавият-тарғибот комиссияси” "Яраштириш комиссияси”, "Вояга етмаганлар, ёшлар ва спорт масалалари бўйича комиссияси” аъзолари билан ҳамкорликда соғлом турмуш тарзини шакллантиришда кенг кўламли чора-тадбирларни амалга оширмоқдамиз. Жумладан оилаларда оилавий муносабатлар маданиятини юксалтириш, оқилона ҳаёт тарзини ташкил этиш, аҳолининг фаровонлик даражасини ошириш, оила бюджетини тўғри тақсимлаш, тўғри  ва сифатли овқатланиш, спиртли ичимликлар ичишни, гиёҳвандликни, чекишни қатъиян ман этиш, спорт билан мунтазам шуғулланиш каби муҳим масалалар бўйича аҳоли ва ёшлар орасида тарғибот ишлари амалга оширилмоқда.

Ҳудудда аҳолини, айниқса хотин-қизлар ва ёшларни спортга оммавий жалб қилиш, уй бекаларини жалб қилган ҳолда оилавий спорт мусобақаларини ташкил этиш ишлари яхши йўлга қўйилган. Ҳар йили маҳалламизда "Отам, онам ва мен – спортчи оиламиз”, "Биз – ақл идрокли оилалармиз”, "Футболимиз келажаги” номли спорт мусобақалари мунтазам ўтказилиб, мусобақа иштирокчилари туман ва Республика босқичларида фахрли ўринларни эгаллаб келмоқдалар.

Оилаларда соғлом турмуш тарзи асосида ҳаёт кечиришни шакллантиришимиз керак. Чунки, миллатнинг жисмоний ва маънавий соғломлиги жамиятимиз соғлигидир. Мақсадимиз – ҳар бир оилада соғлом турмуш тарзи барқарорлигига эришишдан иборат.

Раъно ЖУМАНИЁЗОВА,

Қиличбой ОФЙ диний маърифат ва маънавий-ахлоқий тарбия масалалари бўйича маслаҳатчиси.