Бахт саройингизни қуришда асқотади
"Азиз келинчак!
Сиз кичкина қизалоқ эканлигингиздаёқ келин бўлишни орзу қилгансиз. Дугоналарингиз билан "келин-келин” ўйинларингиз бўларди. Дастлабки "келин салом”ингизни эслай ҳам олмайсиз. Эҳтимол, икки ёшингизда онангизнинг ҳарир рўмолини олиб "келин салом” қилиб, катталарнинг олқишини эшитгансиз, бундан қувониб, қайта-қайта салом қилавергансиз. Ўшанда "Бахтли келин бўлгин”, деб дуо қилишган...”
Ўзбекистон халқ ёзувчиси Тоҳир Маликнинг "Келинлар дафтарига” деб номланган рисоласи болаликнинг беғубор хотираларини ёдга солувчи мана шу жумлалар билан бошланади. Дарҳақиқат, қиз бола борки, келин бўлишни не-не орзу ҳаваслар ила, суюкли қайнонасига келин эмас, балки қизларча яқин бўлишни, саодатли "Бахт саройи”ни қуришни орзу қилади. Аммо мана шу саройни қуриш, тўғрироғи, бахтли ва мустаҳкам оилани барпо этиш учун бу каби ширин орзуларнинг ўзи камлик қилмасмикин?
Оила қураётган ёш келин-куёвлар қандай фазилатларни ўзларида мужассамлаштириши керагу, қандай иллатлардан воз кечиши керак? Таниқли ёзувчимизнинг мана шундай тарбиявий аҳамиятга эга бўлган "Келинлар дафтарига” деб номланган китоби айнан мана шу саволларга жавоб бера олади.
Маънавий-маърифий, ахлоқий мавзудаги бу рисола қирқта суҳбатдан иборат. Унда ҳаёт тажрибаси йўқ келин ва куёв бахт саройини қуришда нималарга аҳамият бериши зарурлиги ҳақида батафсил сўз юритилган.
Бу рисолада "Оила ҳаловати – жамият ҳаловати”, "Никоҳ”, "Иффат ва ҳаё”, "Вақт қадри” каби бир қанча долзарб мавзуларда сўз боради. Ушбу рисолани ўқиб туриб мен ҳам оила ва мустақил ҳаёт ҳақидаги тасаввурларимни бойитдим. Ҳамда бундаги пурмаъно фикрлар, нафақат келинлар учун, балки қизлар учун ҳам ўта муҳим эканлигини англадим.
Доно халқимизда: "Қиз бола бешикка тушди, сепи сандиққа” деган мақол бор.
Ҳа, қиз бола туғилибдики, онаси унга атаб турли хил сеп-у сарполар йиғишни бошлайди. То, қиз бола вояга етгунча бу сандиқни яхши ниятлар ила бойитиб боради.
Онажонларимиз, бувижонларимиз шунинг баробарида биз қизларнинг дил сандиғимизни ҳам бойитиб, оиланинг нақадар муқаддас эканлигини онгимизга сингдириб борадилар. Биз эса бу ўгитларга қулоқ тутган ҳолда мустақил ҳаётга қадам қўямиз.
"Ҳеч ким ўз-ўзидан "ёмон келин” ёки "ёмон қайнона” бўлиб қолмайди, бу борада уларнинг уқувсизлиги, ҳаёт тажрибаларининг етишмаслиги сабаб бўлиши мумкин”, дейди ёзувчимиз.
Азиз келинчак! Азиз дугоналар!
Мен сизларга мана шу "Келинлар дафтарига” деб номланган рисолани ўқиб чиқишингизни тавсия қиламан. Сабаби бу китоб пешонамизга суриб ўқишга арзийди.
Ажаб эмас, бу китоб ўша бахт саройини қуришимизга сабаб бўлса.
Азиза МАДРАҲИМОВА.
(Фото - http://glotr.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
